ក្រោយកែលម្អរៀបចំ ភ្នំ​ទឹកធំ​ ក្លាយជាតំបន់រមណីយដ្ឋានដ៏ទាក់ទាញ ជាប់ព្រំដែនវៀតណាម

តំបន់រមណីយដ្ឋានភ្នំទឹកធំ ត្រូវបានអាជ្ញាធររៀបចំដាក់ជាតំបន់សហគមន៍រមណីយដ្ឋានភ្នំ​ទឹក មាន​ភាព​ទាក់ទាញ​ទេសចរ​ជាង​មុន បន្ទាប់ពី​មានគំនិត​ផ្តួចផ្តើម​រៀប​ចំជា​តំបន់​ទេសចរណ៍ ធម្មជាតិ និងទេសចរណ៍​សាសនា ពី​ព្រះចៅអធិការ​វត្តភ្នំ​រាប។ តំបន់ទេសចរណ៍សាសនានេះ នៅជាប់​ខ្សែបន្ទាត់​ព្រំដែន កម្ពុជា​-​វៀតណាម ក្នុង​ភូមិ​អន្លង់​ថ្ងាន់ ឃុំ​ឫស្សីស្រុក​ខាងលិច ស្រុក​កំពង់ត្រាច ខេត្តកំពត។

លោក កឹម ប៊ុនថន អនុប្រធានមន្ទីរ តំណាង ប្រធានទេសចរណ៍ខេត្តកំពត បានប្រាប់ឱ្យដឹងថា មន្ទីរបានមករៀបចំតំបន់រមណីយដ្ឋានភ្នំទឹកនេះដើម្បីស្នើទៅក្រសួងដាក់ជា តំបន់សហគមន៍រមណីយដ្ឋានទេសចរណ៍ធម្មជាតិភ្នំទឹក ដើម្បីការពារអភិរក្ស និង​បម្រើ​ប្រយោជន៍​សាធារណៈរួម។ កិច្ចពិភាក្សានេះមានការចូលរួមពី ប្រធានមន្ទីរធម្មការសាសនាខេត្ត និង លោក ឃឹម សាមី អភិបាលរងស្រុក តំណាង អភិបាលស្រុកកំពង់ត្រាច និងមានការចូលរួមពីកងកម្លាំង ប្រជាពលរដ្ឋ អាជ្ញាធរមូលដ្ឋាន និង​មន្ត្រី​ជំនាញ​ពាក់ព័ន្ធ។

ព្រះភិក្ខុ សិត ដាវី ព្រះចៅអធិការវត្តភ្នំរាប មានសង្ឃដីកាថា ដោយ​មើល​ឃើញ​ពី​សក្តានុពល​តំបន់ភ្នំ​ទឹក​ ជា​តំបន់​ដែលនៅជាប់​ខ្សែបន្ទាត់​ព្រំដែន កម្ពុជា-វៀតណាម និង​ដើម្បី​រួមរួមចំណែកក្នុងការ​អភិវឌ្ឍជាមួយអាជ្ញាធរគ្រប់ជាន់ថ្នាក់ដល់ថ្នាក់មូលដ្ឋាន ទើបភាគីពាក់ព័ន្ធបានសម្រេចរួមគ្នាដាក់ស្នើទៅក្រសួងដើម្បីកែលម្អតំបន់ភ្នំទឹកនេះឱ្យប្រែក្លាយជាតំបន់សហគមន៍ និង​អាច​ទាក់ទាញ​ទេសចរ​​មកលេងកម្សាន្ត ដើម្បី​បង្កើត​ឱកាស​ការងារ​ឱ្យប្រជាពលរដ្ឋនៅក្នុង​មូលដ្ឋាន​ និង​ដើម្បី​ការពារអភិរក្ស​ភ្នំ​ទឹក​ដ៏​កម្រ​នេះ​។

ព្រះភិក្ខុ សិត ដាវី ដែលបានផ្តួចផ្តើម​ច្នៃរៀបចំ​តំបន់ភ្នំ​ទឹកតាំងពីដើមឆ្នាំនេះ ទៅជា​តំបន់​សហគមន៍រមណីយដ្ឋានធម្មជាតិ​ មានសង្ឃដីកាបន្តថា ព្រះអង្គបាន​បង្កើត​ស្ពាន​ឫស្សី​ដើរ​ជុំវិញ​ភ្នំ​ទឹក​សម្រាប់​ភ្ញៀវទេសចរជាតិ និងអន្តរជាតិ ដើរថតរូប​អនុស្សាវរីយ៍​ និងមានជិះ​ទូក​ដោយ​ឥតគិតថ្លៃ​ក្នុង​ល្អាង​ភ្នំ និង​តំបន់​ជុំវិញ និង​សាង​កាំជណ្តើរ​សម្រាប់​ដើរ​ទស្សនា​នៅក្នុង​រូងភ្នំ​ជាដើម​។

អាជ្ញាធរបានយល់ឃើញថា វត្តគុកកំបោរនៅជាប់តំបន់ភ្នំទឹកនេះដែរ ដូច្នេះអាជ្ញាធរបានសុំផ្សារភ្ជាប់ជាមួយព្រះចៅអធិការវត្តគុកកំបោរ ចូលរួមកែលម្អ។

ប្រជាពលរដ្ឋ​លក់ដូរ​ចំណីអាហារ​នៅ​តំបន់ភ្នំ​ទឹក សប្បាយចិត្ត បន្ទាប់ពីបានឃើញអាជ្ញាធរ និងមន្ទីរទេសចរណ៍ខេត្ត រៀបចំតំបន់ភ្នំទឹកឱ្យក្លាយទៅជាតំបន់សហគមន៍រមណីយដ្ឋាន។ អ្នកលក់ដូរបានឱ្យដឹងថា ចាប់​តាំង​ពី​ព្រះចៅអធិការ​វត្ត​ បានមរៀបចំ​ភ្នំ​ទឹកធំ និង​ភ្នំទឹកតូច រយៈពេល​ប្រមាណ​ជាង ៧ខែ​កន្លងមកនេះ​ មានការទាក់ទាញ​ភ្ញៀវទេសចរ​ជាច្រើន​ដែលមកពីបណ្តា​ខេត្ត​នានា​ទូទាំងប្រទេសមក​លេងកម្សាន្ត ហើយ​ពលរដ្ឋ​ក្នុង​មូលដ្ឋាន​ជាច្រើន​គ្រួសារ អាចមក​លក់ដូរ​នៅទីតំបន់ភ្នំទឹកនេះ​ផងដែរ។

​

ភ្ញៀវ​ទេទេសចរដែលមកលេងបានឱ្យដឹងថា ដោយ​មើលឃើញ​គំនិត​ផ្តួចផ្តើមល្អ​របស់​ព្រះចៅអធិការ​វត្ត​ ចង់ជួយ​គាំទ្រ​ដល់​ជីវភាព​ប្រពលរដ្ឋ និង​ការអភិវឌ្ឍ​មូលដ្ឋាន ពិសេស​រក្សា​កេរដំណែល​ធម្មជាតិ​ដ៏​កម្រ​ផង​នោះ ពួកគាត់​បាននាំគ្នា​មក​ធ្វើបុណ្យ​ និង​មក​​កម្សាន្ត​នៅ​ភ្នំ​ទឹក​នេះ​ផង៕

អត្ថបទ៖ សួង រ៉ាត់