កម្ពុជា​ អនុម័តទុនវិនិយោគជិត ៥ ​ពាន់លានដុល្លារ ​នៅឆមាសទី១​ ឆ្នាំនេះ

ក្រុមប្រឹក្សាអភិវឌ្ឍន៍កម្ពុជា ​បានអនុម័ត​គម្រោងវិនិយោគចំនួន ២៧៦ ដែលមានទំហំទុន​វិនិយោគ​ប្រមាណ ៤,៧ ​ពាន់លានដុល្លារ អាចបង្កើតការងារបានប្រមាណ១៦០​ពាន់​កន្លែង ​នៅ​ក្នុង​ឆមាសទី១ ឆ្នាំ២០២៦។ ​​

​ក្នុងចំណោមគម្រោងវិនិយោគទាំង២៧៦ មានគម្រោងវិនិយោគចំនួន១៨១ ក្នុងទំហំទុនវិនិយោគប្រមាណ ៤,៤ ពាន់លានដុល្លារ​ និងអាចបង្កើតការងារ​បានប្រមាណជាង១២០ពាន់កន្លែង ត្រូវបានចុះបញ្ជីដោយ ក្រុមប្រឹក្សាអភិវឌ្ឍន៍កម្ពុជា ដែលក្នុងនោះ គម្រោងវិនិយោគនៅក្រៅតំបន់សេដ្ឋកិច្ចពិសេសមានចំនួន១០៥, គម្រោងបង្កើត តំបន់សេដ្ឋកិច្ច​ពិសេស​ចំនួន៧,​ និង​គម្រោងវិនិយោគនៅក្នុងបណ្តាតំបន់សេដ្ឋកិច្ចពិសេសចំនួន៦៩។

ដោយឡែក គម្រោងវិនិយោគដែលត្រូវបានចុះបញ្ជីដោយអនុគណៈកម្មការវិនិយោគរាជធានីខេត្ត ​មានចំនួន ៩៥ ​ដែលមានទំហំទុន ២៩១ ​លានដុល្លារ ​និងអាចបង្កើតការងារបាន ៣៥ ​ពាន់កន្លែង។​

លោកឧបនាយករដ្ឋមន្ត្រី​ ស៊ុន ចាន់ថុល ​អនុប្រធានទី១ ​ក្រុម​ប្រឹក្សាអភិវឌ្ឍន៍​កម្ពុជា មាន​ប្រ​សា​សន៍​​ថា​ ការវិនិយោគមានសន្ទុះ​ស្របនឹង​ភាព​ធន់​នៃ​សេដ្ឋកិច្ច។

ឧបនាយករដ្ឋមន្ត្រី​ បញ្ជាក់ថា រំហូរវិនិយោគមានវឌ្ឍនភាពល្អប្រសើរ ក្នុងនោះតំបន់សេដ្ឋកិច្ចពិសេស បានដើរតួនាទីសំខាន់ ក្នុងការទាក់ទាញវិនិយោគ និងជាយន្តការគន្លឹះក្នុងការជំរុញពិពិធកម្ម​ឧស្សា​ហ​កម្ម​នៅកម្ពុជា មុខសញ្ញាវិនិយោគ ក្នុងវិស័យឧស្សាហកម្មថ្មីៗ ក្រៅពីវិស័យកាត់ដេរ សម្លៀក​បំពាក់​ ស្បែកជើង និងផលិតផលធ្វើដំណើរ ភាគច្រើនប្រមូលផ្ដុំ និងមានសកម្មភាព​ក្នុងតំបន់​សេដ្ឋកិច្ច​ពិសេស ដូចជា ការផ្គុំដំឡើងយានយន្ត គ្រឿងបង្គុំយានយន្ត គ្រឿងអេឡិចត្រូនិក និងអគ្គិ​សនី។

​លោក ស៊ុន ចាន់ថុល បាន​បន្ថែមថា ​ការបន្តទទួលបានរំហូរវិនិយោគ ​មិនត្រឹមតែបង្ហាញពីស្ថិរភាព និង​កំណើន​ប៉ុណ្ណោះ​ទេ ​ប៉ុន្តែ​ឆ្លុះ​បញ្ចាំង​អំពីទំនុកចិត្ត​របស់​វិនិយោគ​នៅ​កម្ពុជា។

​នៅ​ក្នុង​ឆ្នាំ ​២០២៥ ​ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៦៣០ ជាមួយនឹង​ទុន​វិនិយោគ ១០ ពាន់លានដុល្លារ ​កើនឡើងជាង ​៤០% ធៀបនឹងឆ្នាំ ២០២៤។

​គម្រោងវិនិយោគ​ដែលមានភាពលេចធ្លោនៅឆមាសទី១ ឆ្នាំនេះរួមមាន៖

-​ គម្រោងបង្កើតកសិដ្ឋានចិញ្ចឹម ​និងបង្កាត់ពូជ​សត្វស្វា ​ស្ថិតនៅស្រុកកំពង់ស្វាយ ខេត្តកំពង់ធំ ​មានទុន វិនិយោគ ៤០ ​លានដុល្លារ ​និងបង្កើតការងារ ២៨២ ​កន្លែង។​

​- គម្រោងបង្កើតកសិដ្ឋានឈើហូបផ្លែ ​និងសាងសង់រោងចក្រកែច្នៃ ​ស្ថិតនៅស្រុកបាណន់ ​ខេត្តបាត់​ដំបង ​ដែលមានទុន ២០ លានដុល្លារ។​

​- គម្រោងពង្រីកផលិតកម្ម ​នៅស្រុកសំរោងទង ​ខេត្តកំពង់ស្ពឺ ​ជាមួយទុនវិនិយោគ ១៤ ​លានដុល្លារ ​និងបង្កើតការងារជាង ២ ពាន់កន្លែង៕