ឧកញ៉ា កែវ មុំ មានផែនការយុទ្ធសាស្រ្តពង្រីក​ទីផ្សារនំស្រួយលីលី ទាំងថ្នាក់ជាតិ និងអន្តរជាតិ

ស្ថាបនិកក្រុមហ៊ុននំស្រួយលីលី បានគូសបញ្ជាក់ថា បច្ចុប្បន្នទីផ្សារនំស្រួយលីលី ទទួលបានចំណែកទីផ្សារ ក្នុងស្រុកប្រមាណ ៣៥ភាគរយ។  ក្រុមហ៊ុននំស្រួយលីលី ក៏បាននិងកំពុងចរាចរ នាំចេញទៅទីផ្សារមួយចំនួន នៅក្នុង​ប្រទេសជាសមាជិកអាស៊ាន ដូចជា ប្រទេសមីយ៉ាន់ម៉ា ម៉ាឡេស៊ី វៀតណាម ព្រមទាំង​នៅ​ទីផ្សារប៉ែកខាង​សហរដ្ឋអាមេរិក កាណាដា និងកូរ៉េផងដែរ។

ក្រុមហ៊ុនលីលីហ៊្វូដអ៊ិនដាសទ្រីខូអិលធី ទើបតែទទួលបានពានរង្វាន់ឯកតំណាងឱ្យប្រទេសកម្ពុជា ក្នុងអាជីវកម្មប​រិយាប័ន្នអាស៊ានឆ្នាំ២០២២ IB ( Inclusive business )ASEAN 2022  ក្នុងចំណោមប្រទេសចំនួន ១០ មកពីបណ្តាប្រទេសអាស៊ាន ក្នុងកិច្ចប្រជុំកំពូលអាជីវកម្មបរិយាប័ន្នអាស៊ានលើកទី៥ កាលពីថ្ងៃទី២៦ ខែតុលា ឆ្នាំ២០២២ នៅខេត្តសៀមរាប។ 

បើតាមលោកស្រីឧញ៉ា កែវ មុំ បានបញ្ជាក់ប្រាប់កម្ពុជាថ្មីថា ការទទួលបានរង្វាន់នេះ គឺដោយសារក្រុមហ៊ុនលីលីហ៊្វូដអ៊ិន​ដាសទ្រីខូអិលធីឌី អនុវត្តបានល្អ នូវការប្រកាន់ខ្ជាប់នូវគោលគំនិតអាជីវកម្មបរិយាប័ន្ននិងកាត់បន្ថយផលប៉ះពាល់​សេដ្ឋកិច្ច​សង្គមលើក្រុមប្រជាពលរដ្ធ នៅផ្ទៃបាតនៃជើងពីរ៉ាមីត (Base of the Pyramid – BoP)។

ទន្ទឹមនឹងការទទួលបានជោគជ័យនេះ លោកស្រីឧកញ៉ា កែវ មុំ មានទស្សនវិស័យវែងឆ្ងាយបន្ថែមទៀត និងមានផែនការ​ពង្រីកទីផ្សារឱ្យកាន់តែធំឡើង ទាំងថ្នាក់ជាតិ និងអន្តរជាតិ។ ឧកញ៉ា កែវ មុំ សង្កត់ធ្ងន់ថា« គោលបំណងធំបំផុត​របស់យើង គឺជួយផ្តល់ការងារដល់ប្រជាជនស្ថិតនៅក្នុងផ្ទៃបាតនៃជើងពីរ៉ាមីត»។

អាជីវកម្មបរិយាប័ន្ន គឺជាក្រុមហ៊ុនធ្វើអាជីវកម្មឈរលើគោលការណ៍ធុរកិច្ច អាចរកប្រាក់ចំណូល ដែល មាននវានុវត្តន៍ និងដំណោះស្រាយជាប្រព័ន្ធ ដើម្បីឆ្លើយតបទៅនឹងបញ្ហាប្រឈមចាំបាច់របស់ប្រជាជន ក្រីក្រ និងប្រជាជនដែល​មានចំណូលទាបនៅផ្ទៃបាតនៃជើងពីរ៉ាមីត៕