ម៉ាឡេស៊ីកំពុងជំរុញ TVET ​​ដើម្បី​ដោះស្រាយ​កង្វះ​វិស្វករនៅ​ក្នុង​ប្រទេស​​

លោកលនាយករដ្ឋមន្រ្តី Datuk Seri Anwar Ibrahim មានប្រសាសន៍ថា កម្មវិធីអប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) ត្រូវតែធ្វើឱ្យប្រសើរឡើងបន្ថែមទៀត ដើម្បីដោះស្រាយកង្វះខាតវិស្វករចំនួន ៣ម៉ឺននាក់នៅទូទាំងប្រទេស។ នេះបើយោងតាមការចេញផ្សាយរបស់សារព័ត៌មាន Bernama របស់ម៉ាឡេស៊ី។

លោកក៏បានសង្កត់ធ្ងន់លើសារៈសំខាន់នៃការផ្តោតទៅលើបច្ចេកវិទ្យាបញ្ញានិម្មិតឬ Artificial Intelligence (AI) ដើម្បីបង្កើនល្បឿនឱ្យដើរស្របជាមួយនឹងតម្រូវការនាពេលបច្ចុប្បន្ន។

លោកបានថ្លែងថា៖«ខ្ញុំបានលើកឡើងវានៅចំពោះមុខថ្នាក់ដឹកនាំទាំងអស់នៅក្នុងប្រទេសអំពីកង្វល់របស់យើងទាក់ទងនឹងតម្លៃសីលធម៌ អត្តសញ្ញាណរបស់យើងជាជនជាតិម៉ាឡេស៊ី និងវប្បធម៌របស់យើងក្នុងការការពារបច្ចេកវិទ្យាថ្មីនេះ»។

លោកបានមានប្រសាសន៍បន្ថែមទៀតថា៖«យើងក៏កំពុងខិតខំរក្សាជំនឿ និងសីលធម៌របស់យើង ស្របតាមការយល់ដឹងអំពីសាសនារបស់យើង​​។ ហើយបច្ចេកវិទ្យា AI ក៏នឹងត្រូវបានបញ្ចូលទៅក្នុងកម្មវិធីសិក្សាសម្រាប់សិស្សានុសិស្សនៅក្នុង​កម្មវិធី TVETផងដែរ» ។

លោកបាននិយាយថា ដើម្បីសម្រេចបាននូវកិច្ចខិតខំប្រឹងប្រែងនេះ ក្រុមហ៊ុន Microsoft បានបង្ហាញពីចំណាប់អារម្មណ៍ក្នុងការវិនិយោគ RM10.5bil សម្រាប់ការអភិវឌ្ឍន៍បច្ចេកវិទ្យា AI នៅក្នុងប្រទេសម៉ាឡេស៊ី។

ទន្ទឹមនឹងនេះ លោក Anwar បានបង្ហាញទំនុកចិត្តថា ការដំឡើងប្រាក់បៀវត្សរ៍ច្រើនជាង ១៣ភាគរយដែលបានប្រកាសកាលពីម្សិលមិញសម្រាប់មន្ត្រីរាជការនឹងទទួលបានការគាំទ្រពីសមាជិកសភាទាំងអស់។

លោកបានមានប្រសាសន៍ថា ក្រោមប្រព័ន្ធប្រាក់បំណាច់សេវាសាធារណៈថ្មី (SSPA) ដែលកំពុងត្រូវបានបញ្ចប់ រដ្ឋាភិបាលក៏នឹងដំឡើងប្រាក់បៀវត្សរ៍ផងដែរ ដើម្បីធានាថា ប្រាក់ចំណូលអប្បបរមារបស់មន្ត្រីរាជការមានលើសពី RM2,000 ក្នុងមួយខែ បើប្រៀបធៀបទៅនឹងអប្បបរមាបច្ចុប្បន្នចំនួន 1,795 RM1 ក្នុងមួយខែ​ ដែលរួមមានប្រាក់ឈ្នួលគោល និងប្រាក់ឧបត្ថម្ភថេរ៕