និយ័តករមូលបត្រកម្ពុជាក្រើនរំលឹកសាធារណជនជាពិសេសវិនិយោគិនចំពោះការក្លែងឯកសារ

និយ័តករមូលបត្រកម្ពុជា (ន.ម.ក.) ឱ្យដឹងនៅថ្ងៃព្រស្បត្តិ៍នេះថា កន្លងមកមានជុនទុច្ចរិតបានក្លែងឯកសារនិងប្រើប្រាស់ឈ្មោះថ្នាក់ដឹកនាំដើម្បីបោកប្រាស់សាធារណជនជាពិសេសវិនិយោគិនដែលអាចបណ្តាលឱ្យមានការចាញ់បោកឈានទៅដល់ការបាត់បង់នូវថវិកានានា។

បើយោងតាមសេចក្តីជូនដំណឹងរបស់ន.ម.ក. នៅថ្ងៃនេះថា​និយ័តករមូលបត្រកម្ពុជា ​សូមជម្រាបជូនសាធារណជនទាំងអស់មេត្តាជ្រាបថា​ ថ្មីៗនេះ ន.ម.ក. បានពិនិត្យឃើញថាមានជនទុច្ចរិតមានបំណងមិនល្អបានក្លែងឯកសារដោយប្រើប្រាស់និមត្តសញ្ញា និងនាមករណ៍របស់ ន.ម.ក. ទាំងភាសាខ្មែរ និងអង់គ្លេស ត្រា និងនាមករណ៍របស់គណៈកម្មការមូលបត្រកម្ពុជា ព្រមទាំងហត្ថលេខា និងឈ្មោះរបស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. និងនិមិត្តសញ្ញារបស់ក្រសួងសេដ្ឋកិច្ចនិងហិរញ្ញវត្ថុ  ក្នុងចេតនាបន្លំបោកប្រាស់ ដែលអាចធ្វើឱ្យប៉ះពាល់ដល់ផលប្រយោជន៍ស្របច្បាប់ណាមួយរបស់សាធារណជន ពិសេសអ្នកវិនិយោគក្នុងវិស័យមូលបត្រ។

ន.ម.ក. បានលើកឡើងថា៖«ដើម្បីជៀសវាងនូវការខាតបង់ផ្នែកហិរញ្ញវត្ថុជាយថាហេតុ សូមសាធារណជនមានការប្រុងប្រយ័ត្នខ្ពស់ ព្រមទាំងផ្តល់កិច្ចសហការផ្តល់ព័ត៌មានមកនាយកដ្ឋានកិច្ចការគតិយុត្តនៃន.ម.ក.»៕