ក្រុមហ៊ុនមួយជួយទិញស្ពៃក្រញាញ់ពីកសិករនៅស្រុកត្រាំកក់ក្នុងតម្លៃទីផ្សារ ក្រោយធ្លាក់ចុះ ៣០០ រៀល ក្នុងមួយគីឡូក្រាម

ក្រុមហ៊ុន ត្រូពិកខេម ដែលជាក្រុមហ៊ុនលក់បន្លែសុវត្ថិភាព បានចាប់ផ្ដើមទិញស្ពៃក្រញាញ់​ពីក​សិករ​​នៅស្រុកត្រាំកក់ ខេត្តតាកែវ ​​ក្នុងតម្លៃ ២.០០០ រៀលក្នុងមួយគីឡូក្រាម ដែលជាការជួយ​ដោះ​​​ស្រាយបញ្ហាប្រឈមចំពោះ​មុខនៃការធ្លាក់តម្លៃស្ពៃក្រញាញ់ដល់ ៣០០ រៀល ក្នុងមួយ​គីឡូ​ក្រាម​។

កញ្ញា អ៊ឹម រចនា​ អ្នកនាំពាក្យក្រសួង កសិកម្ម រុក្ខាប្រមាញ់ និងនេសាទ បានឱ្យដឹងថា ក្រុមហ៊ុន ត្រូពិកខេម សហការជាមួយក្រសួងកសិកម្ម ទទួលទិញបន្លែស្ពៃក្រញាញ់របស់កសិករ​នៅស្រុក​ត្រាំ​កក់​​ក្នុងតម្លៃ ២០០០​ រៀលក្នុងមួយគីឡូក្រាម ចាប់ផ្ដើមដឹកជើងទី១ នៅថ្ងៃទី ១១ ខែកក្កដានេះ បន្ទាប់​ពីតម្លៃ​ស្ពៃក្រញាញ់​បានធ្លាក់ចុះ។

កាលពីសប្ដាហ៍មុន កសិករដាំស្ពៃក្រញាញ់មួយចំនួន នៅស្រុកត្រាំកក់ បានត្អូញត្អែរពីតម្លៃស្ពៃ​ក្រញាញ់ធ្លាក់ចុះ រហូតដល់ ៣០០ រៀល ក្នុងមួយគីឡូក្រាម និងគ្មានអ្នកបញ្ជាទិញផងដែរ៕

អត្ថបទ៖ ឡេង ដេត