ព័ត៌មានអន្ដរជាតិ

វៀតណាម៖ ផ្សារទំនើប Aeon ខាតប្រាក់ជាង ៧ លានដុល្លារ ចំពោះការលុបចោលគម្រោងនៅហាណូយ

បានផុស

២ years មុន

នៅ

ថ្ងៃចន្ទ ១៤ តុលា ២០២៤

ដោយ

កាសែត The Investor វៀតណាម បានចុះផ្សាយកាលពីថ្ងៃអាទិត្យថា ក្រុមហ៊ុនផ្សារទំនើបយក្សរបស់ជប៉ុន Aeon បានខាតបង់ប្រាក់សរុបប្រមាណ ៧,៤ លានដុល្លារ ចំពោះការលុបចោលនូវគម្រោងសាងសង់ផ្សារទំនើបថ្មីទី៣នៅទីក្រុងហាណូយរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនបានឱ្យដឹងក្នុងរបាយការន៍វាយតម្លៃលទ្ធផលប្រចាំត្រីមាសរបស់ខ្លួនថា គម្រោងដែលលុបចោលគ្របដណ្ដប់លើផ្ទៃដីប្រមាណ ៨,០៣ ហិចតា ស្ថិតនៅខណ្ឌ Hoang Mai នៃរដ្ឋធានីហាណូយ។ ផែនការព្រាងនៃគម្រោងនោះត្រូវបានអាជ្ញាធរវៀតណាមអនុម័ត កាលពីខែកុម្ភៈ ឆ្នាំ ២០២៣ ប៉ុន្តែក្រោយពីនោះ គឺមិនឃើញមានដំណើរការសាងសង់ជាដុំកំភួនអ្វីនោះទេ។

Aeon មិនបានបញ្ជាក់ជាព័ត៌មាន ឬសេចក្ដីលម្អិតពីការលុបចោលគម្រោងសាងសង់ដដែលនោះទេ។

ទោះបីជាយ៉ាងណាក៏ដោយ ក្នុងរបាយការន៍វាយតម្លៃលទ្ធផលប្រចាំត្រីមាស ក្រុមហ៊ុន Aeon បាននិយាយថា ចន្លោះពីខែមីនា ដល់ខែសីហា ឆ្នាំ ២០២៤ ដែលជាឆមាសទី១នៃឆ្នាំសារពើពន្ធ ២០២៤ ខ្លួនបានកត់ត្រាពីប្រាក់ចំណេញប្រតិបត្តិការចំនួន ១៦,២ លានដុល្លារ ក្នុងប្រទេសវៀតណាម ដោយកើនឡើង ២១,២ ភាគរយ ខណៈប្រាក់ចំណូលប្រតិបត្តិការវិញ មានប្រមាណ ៥៤,៩ លានដុល្លារ ដោយកើនឡើង ១៤,៥ ភាគរយ។

តួលេខនេះបង្ហាញថា វៀតណាមជាទីផ្សាររបស់ក្រុមហ៊ុន Aeon ដ៏ធំបំផុតទី៣ទូទាំងពិភពលោក និងធំបំផុតទី១នៅអាស៊ីអាគ្នេយ៍។ Aeon បានមើលឃើញថា ប្រតិបត្តិការដ៏រឹងមាំក្នុងប្រទេសវៀតណាម កើតឡើងដោយសារតែភាពជោគជ័យរបស់ហាងទំនិញក្នុងផ្សារទំនើបដែលមានស្រាប់។ បច្ចុប្បន្ន Aeon មានផ្សារទំនើបធំៗក្នុងប្រទេសវៀតណាម ប្រមាណ ៧ សាខា៕