សេដ្ឋកិច្ច

ស្វាយខុសរដូវ ដែលមានឱជារសឈ្ងុយឆ្ងាញ់ កំពុងល្បីឈ្មោះនៅលើទីផ្សារ

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

ស្វាយខុសរដូវ គឺជាពពួកស្វាយមួយប្រភេទដែលខុសពីស្វាយដទៃទៀតត្រង់ថា ស្វាយនេះពេលអស់រដូវស្វាយ គឺវាចាប់ផ្ដើមផ្លែតែម្នាក់ឯង ព្រមទាំងមានខ្នាតប៉ុនៗ គ្នា ដោយមិនមានធំតូចឡើយ ហើយអាចទទួលទានបានលុះត្រាណាតែស្វាយនេះទុំ ទើបមានឱជារសឈ្ងុយឆ្ងាញ់ខុសពីស្វាយទាំងពួង ប៉ុន្តែបើខ្ចី និងចាស់ គឺជូរខ្លាំងបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី សាន់ សុគន្ធា រស់នៅភូមិវត្តតាមិម ឃុំអូរដំបង ១ ស្រុកសង្កែ ខេត្តបាត់ដំបង បានរៀបរាប់ថា នៅលើដីរបស់អ្នកស្រីមានដើមស្វាយជាច្រើនដើម ដែលក្នុងនោះមានទាំងកែវល្មៀត ស្វាយដោះក្រមុំ និងស្វាយខុសរដូវនេះផងដែរ ប៉ុន្តែរាល់ពេលដែលស្វាយដទៃទៀតអស់ផ្លែ គឺស្វាយខុសរដូវចាប់ផ្ដើមផ្លែតែម្នាក់ឯង លុះដល់រដូវស្វាយដទៃទៀតផ្លែ វាក៏ចាប់ផ្ដើមផ្លែមួយសារទៀតដូចគេដូចឯង។

អ្នកស្រី បានបន្តថា សម្រាប់ស្វាយផ្សេងៗ គេអាចបេះយកនៅពេលដែលវាចាស់ គឺអាចយកទៅបន្ទុំបាន ប៉ុន្តែសម្រាប់ស្វាយខុសរដូវ គឺយកទៅបន្ទុំវាមិនទុំជាដាច់ខាត ដូច្នេះមានតែរង់ចាំបេះនៅលើដើមតែប៉ុណ្ណោះ ហើយពេលបេះម្ដងៗ មិនខ្វះទេអ្នកសុំចែកទិញទាំងទីជិតទីឆ្ងាយ ព្រោះដោយសារតែរសជាតិវាឆ្ងាញ់ខុសគេដែលញ៉ាំហើយចង់ញ៉ាំទៀត។

អ្នកស្រី បានបន្តទៀតថា សព្វថ្ងៃ ស្វាយខុសរដូវ កំពុងផ្លែព្រោងព្រាតដូចគេដូចឯង ហើយក្រហមទុំសឹងតែមិនទាន់គឺមានអ្នកសុំទិញដោយគេសុខចិត្តឡើងបេះដោយខ្លួនឯង ហើយស្វាយខុសរដូវនេះ បើទោះបីជាមនុស្សខ្លះមិនចូលចិត្តទទួលទានផ្លែស្វាយក៏ដោយ ឱ្យតែបានសាកល្បងជាមួយផ្លែស្វាយខុសរដូវ គឺដឹងតែជាប់មាត់ចង់ទទួលទានបន្ថែមទៀត។ សព្វថ្ងៃ អ្នកស្រី លក់ឱ្យគេក្នុងមួយគីឡូក្រាមបានត្រឹមតែ ៤ ០០០ រៀលប៉ុណ្ណោះ ដើម្បីទុកឱ្យគេយកទៅលក់បន្តបានកម្រៃខ្លះ ហើយផ្លែទុំមានប៉ុន្មានក៏គេយកទាំងអស់មិនដែលសល់ម្ដងណាឡើយ៕

អត្ថបទ ៖ សោ និយមរ័ត្ន