ព័ត៌មានជាតិ

ក្រៅពីផ្លូវ ២១ ខ្សែរបស់ ADB ក្រុងបាត់ដំបងទទួលបានគម្រោងស្ថាបនាផ្លូវ ១៤ ខ្សែទៀតផ្តល់ថវិកាដោយសម្តេចធិបតី ហ៊ុន ម៉ាណែត

បានផុស

២ ខែ មុន

នៅ

ថ្ងៃអង្គារ ២៦ ឧសភា ២០២៦

ដោយ

ផ្លូវមួយខ្សែដែលរត់កាត់ក្នុងសង្កាត់ទួលតាឯកក្នុងក្រុងបាត់ដំបង ខេត្តបាត់ដំបង ចាប់ពីចំណុចផ្លូវជាតិលេខ ៥ ទៅទល់នឹងផ្លូវបំបែកពេទ្យ ព២ ដែលមានប្រវែង ២.៦០០ ម៉ែត្រ កំពុងស្ថាបនាដោយកងវិស្វកម្មលេខ ១៧៨ មកពីខេត្តសៀមរាប។

ផ្លូវនេះស្ថិតនៅក្នុងគម្រោងផ្លូវចំនួន ១៤ ខ្សែ ដែលទទួលបានការឧបត្ថម្ភថវិកាពីសម្ដេចធិបតី ហ៊ុន ម៉ាណែត នៅក្នុងក្រុងបាត់ដំបង ក្រៅពីផ្លូវចំនួន ២១ ខ្សែ ដែលជាគម្រោងរបស់ធនាគារអភិវឌ្ឍន៍អាស៊ី ADB។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបងបានឲ្យដឹងថា បច្ចុប្បន្នផ្លូវមួយចំនួនក្នុងក្រុងបាត់ដំបងដែលទទួលបានការគាំទ្រថវិកាពីសម្ដេចធិបតី កងវិស្វកម្មកំពុងស្ថាបនាជាបណ្ដើរៗ ដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋ ខណៈគម្រោងផ្លូវខ្លះក៏បានបញ្ចប់រួចរាល់ជាស្ថាពរ។

ជាមួយគ្នានេះ ប្រធានមន្ទីរសាធារណការនិងដឹកជញ្ជូនខេត្ត ក៏ស្នើសុំការយោគយល់ពីពលរដ្ឋលើផ្លូវមួយចំនួនដែលខូចខាតបង្កការលំបាកសម្រាប់ការធ្វើដំណើរ ដោយសារតែមានការយឺតយ៉ាវពីការដេញថ្លៃរបស់ធនាគារអភិវឌ្ឍន៍អាស៊ី ADB ក្រោយពីការដាក់បង្កប់លូ ទាញយកទឹកកខ្វក់ចេញពីក្រុងរួចរាល់ ខណៈអាជ្ញាធរក៏នឹងជួយសម្រួលផ្លូវដែលលំបាកខ្លាំងនៅកណ្ដាលក្រុង ដើម្បីពលរដ្ឋអាចធ្វើដំណើរបណ្តោះអាសន្ន។

លោកសង្ឃឹមថា ផ្លូវទាំងអស់នេះនឹងអាចរួចរាល់ជាស្ថាពរនៅចុងឆ្នាំ ២០២៦ នេះ៕

អត្ថបទ សោ និយមរ័ត្ន