គិតចាប់ពីខែមេសា ដល់ ខែមិថុនា ឆ្នាំ ២០២៦ មានប្រជាពលរដ្ឋក្មេងចាស់សរុប ៣៧៤ នាក់ បានពិនិត្យព្យាបាលជំងឺនៅមន្ទីរពេទ្យបង្អែកខេត្តកោះកុង។ តួលេខ ត្រូវបានគ្រូពេទ្យបង្ហាញក្តីព្រួយបារម្ភដែលតម្រូវឱ្យមានវិធានការទប់ស្កាត់ជាបន្ទាន់ផងដែរ។

លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បង្ហាញថា អត្រាចំនួនអ្នកជំងឺគ្រុនឈាមនៅឆ្នាំនេះ បើធៀបនឹងរយៈពេលដូចគ្នាឆ្នាំទៅ កើន ២៥០ នាក់ គិតជាភាគរយស្មើនឹង ២០១.៨%។ ទោះយ៉ាងណា ក្រុមគ្រូពេទ្យអាចគ្រប់គ្រងពិនិត្យព្យាបាលបានដោយកែប្រែពីកម្រិតធ្ងន់មកជាសះស្បើយ ទន្ទឹមនោះក្តីក៏គ្រូពេទ្យនៅតែទាមទារឱ្យគ្រប់ពលរដ្ឋដែលសង្ស័យថាមានជំងឺគ្រុនឈាម សូមប្រញាប់មកកាន់មន្ទីរពេទ្យ ដើម្បីព្យាបាលទាន់ពេលវេលាបំផុត ចៀសវាងទុកឱ្យអាការជំងឺវិវឌ្ឍន៍ធ្ងន់ធ្ងររហូតដល់ហួសពេល។

លោកវេជ្ជបណ្ឌិត ហៃ ឡៃសុន បន្ថែមទៀតថា ក្រៅពីការពន្យល់អំពីមូលហេតុដែលកើនឡើង នៃចំនួនអ្នកកើតជំងឺគ្រុនឈាម មន្ទីរពេទ្យ ក៏ណែនាំដល់ប្រជាពលរដ្ឋទាំងអស់ចូលរួមសម្អាតអនាម័យបរិស្ថានជុំវិញលំនៅដ្ឋាន និង លុបបំបាត់ជម្រកមូសខ្លាញីឱ្យអស់ ទើបទប់ស្កាត់ការកើតជំងឺគ្រុនឈាមបានយ៉ាងមានប្រសិទ្ធភាព។

គួរជម្រាបថា រោគសញ្ញាសំខាន់ៗ នៃជំងឺគ្រុនឈាម មានអាការដូចខាងក្រោម សូមប្រញាប់ប្រញាល់នាំកូនទៅកាន់មន្ទីរពេទ្យរដ្ឋជាបន្ទាន់ ៖ ទី១.ក្តៅខ្លួនខ្លាំង (39 – 40 C) រយៈពេល ២ ទៅ ៣ ថ្ងៃ ហើយនៅតែមិនឆ្លើយតបនឹងថ្នាំបញ្ចុះកម្ដៅបារ៉ាសេតាម៉ុល, ទី២.ឈឺក្បាល , ទី៣.ឈឺសាច់ដុំ , ទី៤.ឈឺសន្លាក់ , ទី៥.ក្អួត ចង្អោរ , ទី៦.ចុកពោះ , ៧.ឈាមច្រមុះ ជុះឈាម ក្អួតឈាម សន្លឹម (ករណីធ្ងន់ធ្ងរ និង​ គ្រោះថ្នាក់)។ គ្រូពេទ្យ បានហាមប្រាមប្រើប្រាស់ ទី១ថ្នាំបញ្ចុះកម្ដៅ Asperin និង ២.នៅពេលក្មេងត្រជាក់ខ្លួន និង សន្លឹម ទូទៅថ្ងៃទី ៤ ទៅថ្ងៃទី ៥ គឺជាដំណាក់កាលគ្រោះថ្នាក់ (Critical phase)។

អ្នកស្រី សេន ចាន់ និង អ្នកស្រី ស្រីរៀម ម្តាយរបស់កុមារដែលជំងឺគ្រុនឈាម បានលើកឡើងថា ពួកគាត់នាំកូនមកព្យាបាល ២ ទៅ ៣ ថ្ងៃហើយ ដោយឥឡូវអាការធូរស្រាលច្រើន ក្រោមការយកចិត្តទុកដាក់ពិនិត្យព្យាបាលរបស់ក្រុមគ្រូពេទ្យ។ ដំបូងឡើយ ពួកគាត់ នាំកូនទៅពេទ្យឯកជន ប៉ុន្តែអាការមិនបាត់ ទើបសម្រេចិត្តនាំកូនមកមន្ទីរពេទ្យបង្អែក។

ពលរដ្ឋទាំង ២ ខាងលើ ប្រាប់ទៀតថា នៅតំបន់ពួកគាត់រស់នៅសំបូរទៅដោយជម្រកសត្វខ្លាញី គ្រាមានព្រៃលិចទឹក គំនរសំរាម និង ប្រព័ន្ធប្រឡាយលូចាស់ៗ ដែលជាសំបូរដោយមូស ដូច្នេះទើបងាយនឹងបង្កជាជំងឺគ្រុនឈាម ទោះបីជាពួកគាត់ខិតខំមានវិធីការពារទប់ស្កាត់យ៉ាងណាក្តី។ ទោះយ៉ាងណា ក្រោយការព្យាបាលជាសះស្បើយហើយ គឺ​ ក្រុមគ្រូពេទ្យ នៅតែបង្កើនការផ្សព្វផ្សាយអប់រំយល់ដឹងកាន់តែច្រើនអំពីវិធីកម្ចាត់ប្រភពដែលនាំឱ្យកើតជំងឺគ្រុនឈាមនារដូវវស្សា ដោយចែកជូនថ្នាំអាបែត ជំរុញឱ្យពលរដ្ឋលុបបំបាត់ជម្រកសត្វមូសខ្លា គេងដាក់មុង និង បាញ់ថ្នាំសម្លាប់មូលទៅតាមលំនៅដ្ឋានពលរដ្ឋ និង សាលារៀន៕
អត្ថបទ ៖ សិរិវឌ្ឍនៈ

The post ខេត្តកោះកុង មានអ្នកជំងឺគ្រុនឈាមជិត ៤០០ នាក់ អំឡុងពេល ៣ ខែមកនេះ appeared first on Kampuchea Thmey Daily.

បើតាមវេជ្ជបណ្ឌិតជំនាញផ្នែក ត្រចៀកនៅមន្ទីពេទ្យអង្គឌួង តាមរយៈសារណែនាំលើហ្វេសប៊ុកផេក បានពន្យល់ថា ជំងឺរលាកឆ្អឹងត្រចៀកខ្ចីកើតឡើងដោយសាររបួសត្រចៀក ការឆ្លងមេរោគបាក់តេរី (Pseudomonas, Staphylococcus) និងរលាកត្រចៀកខាងក្រៅធ្ងន់ធ្ងរជាដើម។

ចំពោះរោគសញ្ញាដែលបញ្ជាក់ពីជំងឺរលាកឆ្អឹងត្រចៀកខ្ចី នឹងបង្ហាញចេញដូចជា៖
– ត្រចៀកក្រហម និងហើម
– ឈឺចាប់ខ្លាំង ក្ដៅនៅក្នុងត្រចៀក ឬអាចធ្វើឲ្យមានខ្ទុះ ដែលបណ្ដាលមានការឈឺចាប់ទៀតផង។

ដូចនេះដើម្បីការពារពីជំងឺនេះ ប្រភពដដែលបានណែនាំឱ្យគប្បីសម្អាតត្រចៀក ឬក៏រក្សាអនាម័យត្រចៀកឱ្យស្អាតជានិច្ច ជៀសវាងការអេះ ឬការប្រើប្រាស់ឧបករណ៍មិនមានអនាម័យ។

ប្រភពដដែលគូសបញ្ជាក់ទៀតថា ការព្យាបាលជម្ងឺនេះទាមទារឱ្យមានការពិនិត្យពីគ្រូពេទ្យជំនាញ ឱ្យទាន់ពេលវេលា។ប្រសិនជាមិនបានទទួលការព្យាបាលទាន់ពេលនោះ វាអាចបណ្ដាលឲ្យត្រចៀកខូចទ្រង់ទ្រាយបាន។បើអ្នកមានរោគសញ្ញាណាមួយ សូមមកពិគ្រោះជាមួយវេជ្ជបណ្ឌិតឯកទេស ត្រចៀក ច្រមុះ បំពង់ក ដើម្បីវាយតម្លៃ ត្រូវប្រើប្រាស់ថ្នាំ ឬ ត្រូវធ្វើការវះកាត់ ឱ្យបានឆាប់រហ័ស និងបានទាន់ពេលវេលា៕ ដោយ៖ ជុំ សុជាតា

The post យល់ដឹងអំពីជំងឺរលាកឆ្អឹងខ្ចីត្រចៀក ដើម្បីចៀសវាងការខូចទ្រង់ទ្រាយត្រចៀក appeared first on Kampuchea Thmey Daily.

យ៉ាងណាមិញ ជំងឺរីកក្រពេញប្រូស្តាត មិនមែនជាជំងឺមហារីកនោះទេ ប៉ុន្តែប្រសិនបើមានរោគសញ្ញាមិនប្រក្រតី គួរប្រញាប់ទៅពិគ្រោះជាមួយគ្រូពេទ្យជំនាញ ដើម្បីទទួលបានការព្យាបាលទាន់ពេលវេលា។

យោងតាមសារចែករំលែកចំណេះដឹងសុខភាពពីរបស់ មន្ទីរពេទ្យព្រះអង្គឌួង បង្ហាញថា ជំងឺរីកក្រពេញប្រូស្តាតអាចសង្កេតឃើញតាមរោគសញ្ញាមួយចំនួន និងមានវិធីព្យាបាលជាច្រើន អាស្រ័យលើស្ថានភាពជំងឺរបស់អ្នកជំងឺ។

១. រោគសញ្ញាព្រមានដែលគួរប្រុងប្រយ័ត្ន
– នោមញឹកញាប់ ឬលំហូរទឹកនោមខ្សោយជាងធម្មតា។
– នោមដាច់ៗ ឬត្រូវប្រឹងខ្លាំងពេលបត់ជើងតូច។
– មានអារម្មណ៍មិនស្រួល ឬឈឺចាប់នៅពេលអង្គុយ។
– មានឈាមលាយក្នុងទឹកនោម ឬទឹកកាម។

២. ការព្យាបាល
ចំពោះការព្យាបាលវិញ គឺអាស្រ័យលើកម្រិតធ្ងន់ស្រាលនៃជំងឺ ហើយអ្នកជំងឺគួរតែទៅពិនិត្យ និងពិគ្រោះជាមួយគ្រូពេទ្យឯកទេស ដើម្បីទទួលបានការព្យាបាលសមស្រប។ ជាទូទៅ វិធីព្យាបាលមានដូចជា ការកែប្រែទម្លាប់រស់នៅ ដោយផ្លាស់ប្ដូររបបអាហារ និងទម្លាប់ប្រចាំថ្ងៃ ដើម្បីជួយបន្ថយរោគសញ្ញា ការព្យាបាលដោយប្រើប្រាស់ថ្នាំតាមការណែនាំរបស់គ្រូពេទ្យ និងក្នុងករណីចាំបាច់ អាចត្រូវការវះកាត់ដោយប្រើបច្ចេកវិទ្យាទំនើប ដែលមានប្រសិទ្ធភាពខ្ពស់ និងជួយឱ្យអ្នកជំងឺឆាប់ជាសះស្បើយ។

គ្រូពេទ្យឯកទេសនៃមន្ទីរពេទ្យព្រះអង្គឌួង បានណែនាំដែរថា ប្រសិនបើមានរោគសញ្ញាដូចបានរៀបរាប់ខាងលើ ជាពិសេសក្នុងករណី នោមមិនចេញទាល់តែសោះ ឬ មានឈាមក្នុងទឹកនោម ត្រូវប្រញាប់ទៅជួបគ្រូពេទ្យជំនាញជាបន្ទាន់ ដើម្បីទទួលបានការពិនិត្យ និងព្យាបាលឱ្យបានទាន់ពេលវេលា ហើយដាច់ខាត កុំទិញថ្នាំមកប្រើប្រាស់ដោយខ្លួនឯង៕ ដោយ៖ ជុំ សុជាតា

The post បុរសវ័យកាន់តែច្រើន គួរកត់សម្គាល់! នោមញឹក នោមខ្សោយខុសធម្មតា អាចជាសញ្ញានៃជំងឺរីកក្រពេញប្រូស្តាត appeared first on Kampuchea Thmey Daily.

កត្តាបង្កហានិភ័យ និងរោគសញ្ញា
បើតាមការបញ្ជាក់ កត្តាដែលអាចបង្កនៃជំងឺនេះ មានដូចជា មានមេរោគក្រពះ កត្តាចំណីអាហារ (អាហារប្រៃ, អាហារផ្អាប់ និងមានផ្សែង), មានគ្រួសារកើតជំងឺមហារីក ជក់បារី និងពិសាស្រាជាដើម។ ប្រភពដដែលបន្ថែមទៀតថា រោគសញ្ញានៃជំងឺកាចសាហាវនេះ អាចកត់សម្គាល់បានតាមរយៈអាការៈមួយចំនួន ដូចជា ៖
– ឈឺចុងដង្ហើម, ឆ្អល់ពោះ, អត់រំលាយអាហារ
– ស្រកទម្ងន់ ឬមិនឃ្លានអាហារ
– លាមកខ្មៅ, ចង្អោរ ក្អួត និង ស្លេកស្លាំង។

ការជួបពិគ្រោះ និងពិនិត្យជាមួយវេជ្ជបណ្ឌិតឯកទេស គឺចាំបាច់
តែយ៉ាងណា រោគសញ្ញាខាងលើនេះ គ្រាន់តែជាសេចក្តីសន្និដ្ឋានជំហានដំបូងប៉ុណ្ណោះ។ ដើម្បីដឹងថាអ្នកជំងឺកើតជំងឺមហារីកក្រពះឬអត់នោះ ពេទ្យឯកទេសណែនាំឱ្យជួបពិគ្រោះយោបល់ និងពិនិត្យតាមដាន តាមរយៈការឆ្លុះក្រពះ និងច្រឹបសាច់យកទៅពិនិត្យ។ ប្រភពដដែលពន្យល់ទៀតថា ជំងឺមហារីកក្រពះ អាចព្យាបាលបានដោយ ការវះកាត់ ការចាក់ថ្នាំគីមី និងការបញ្ចាំងកាំរស្មី។

ការពារខ្លួនពីហានិភ័យមហារីកក្រពះ
បើយោងតាមការណែនាំ ដើម្ពីបង្ការជំងឺមហារីកក្រពះ គួរតែទទួលទានសាប, ជៀសវាងចំណីអាហារកំប៉ុង ឬផ្អាប់ ទទួលទានផ្លែឈើស្រស់ និងបន្លែទៀតទាត់។ មួយវិញទៀត ត្រូវរក្សាទម្ងន់ដោយការហាត់ប្រាណ ចៀសវាងជក់បារី និង ពិសាស្រា។

យ៉ាងណាមិញ ប្រភពដដែលគូសបញ្ជាក់ដែរថា ជំងឺមហារីកក្រពះ អាចព្យាបាលជាសះស្បើយ បើរកឃើញវាទាន់ពេលវេលា។ ដូច្នេះបើមានរោគសញ្ញាដូចខាងលើ គប្បីទៅមន្ទីពេទ្យដើម្បីទទួលលបានការពិនិត្យបានទាន់ពេលវេលា៕ ដោយ៖ ជុំ សុជាតា

The post កុំមើលស្រាលជំងឺមហារីកក្រពះ! គប្បីស្វែងយល់កត្តាបង្កហានិភ័យ រោគសញ្ញា និងវិធីការពារ appeared first on Kampuchea Thmey Daily.

ផ្នែកចក្ខុរោគ នៃមន្ទីរពេទ្យព្រះអង្គឌួង បានឱ្យដឹងថា ជំងឺនេះ បណ្តាលមកពីភាពមិនប្រក្រតីនៃប្រព័ន្ធបង្ហូរទឹកក្នុងភ្នែកដែលជាហេតុធ្វើឱ្យសម្ពាធក្នុងភ្នែកកើនឡើងខ្លាំងខូចខាតសរសៃប្រសាទអ៊ុបទិច និងឈានទៅដល់ការងងឹតភ្នែក។

រោគសញ្ញាទូទៅដែលត្រូវចាប់អារម្មណ៍ គឺការហូរទឹកភ្នែកខ្លាំងខុសពីធម្មតា ការកន្ត្រាក់ត្របកកភ្នែក ការខ្លាចនិងពន្លឺខ្លាំងុ។ ចំណែករោគសញ្ញាផ្សេងៗ សភាពគ្រាប់ភ្នែករីកធំ និងប្រែពណ៌ កញ្ចក់ភ្នែកឡើងហើម និងមានស្នាមឆ្កូត ស្តើងសរសៃអ៊ុបទិច។

ប្រភពដដែល បានបញ្ជាក់ថា ការធ្វើរោគវិនិច្ឆ័យនៃជំងឺនេះ គឺពឹងផ្អែកទៅលើការពិនិត្យទារកដោយប្រើថ្នាំសណ្តំ។ ចំណែកការព្យាបាល គឺការប្រើប្រាស់ថ្នាំបញ្ចុះសម្ពាធភ្នែក និងការវះកាត់បើកមុំចម្រោះទឹក។

ជាមួយគ្នានេះ មន្ទីរពេទ្យ បានណែនាំឱ្យប្រញាប់នាំកុមារទៅជួបគ្រូពេទ្យជំនាញភ្នែកជាបន្ទាប់ ប្រសិនបើពិនិត្យឃើញកុមារមានរោគសញ្ញាដូចខាងលើ៕

The post ឈ្វេងយល់ពីជំងឺទឹកដក់ក្នុងភ្នែកពីកំណើតចំពោះកុមារ និងការព្យាបាល appeared first on Kampuchea Thmey Daily.

បើសារចែករំលែកបានឱ្យដឹងថា កត្តាដែលធ្វើឱ្យប្រឈមនឹងបញ្ហាឈឺចង្កេះ មានច្រើនប្រភេទ ក្នុងនោះរួមមាន ស្ត្រីដែលចូលចិត្តពាក់ស្បែកជើងកែងខ្ពស់ៗ, អ្នកធ្វើការងារដែលប្រើកម្លាំងកាយខ្លាំង, អ្នកអង្គុយ ឬឈររយៈពេលយូរ, ស្ត្រីមានផ្ទៃពោះ, អ្នកលើសទម្ងន់, មនុស្សវ័យចំណាស់ និងអ្នកដែលមិនសូវហាត់ប្រាណជាប្រចាំជាដើម។

ប្រភពដដែលពន្យល់ដែរថា មានមូលហេតុជាច្រើនដែលបណ្តាលឱ្យឈឺចង្កេះរួមមាន វិបត្តិសាច់ដុំ សរសៃពួរតឆ្អឹងត្រង់សន្លាក់ ការសឹកសន្លាក់ឆ្អឹង ការគាប ឬសង្កត់ទៅលើសរសៃប្រព័ន្ធប្រសាទ ជំងឺមហារីក ជាដើម។ល។ ឯមូលហេតុភាគច្រើន គឺបណ្ដាលមកពីការលូនមកក្រៅនៃទ្រនាប់ឆ្អឹង ហើយប្រសិនបើមិនបានធ្វើរោគវិនិច្ឆ័យឱ្យបានឆាប់រហ័ស វាអាចផ្ដល់ផលវិបាកដូចជា ពិការជើង វិបត្តិបន្ទោរបង់ និងការឈឺចាប់ខ្លាំងរហូតមិនអាចធ្វើការបាន។

យ៉ាងណាមិញ មួយក្នុងចំណោមមូលហេតុជាច្រើន គឺការពាក់ស្បែកជើងកែងខ្ពស់ អាចធ្វើឱ្យទម្ងន់រាងកាយផ្លាស់ប្តូរទៅផ្នែកខាងមុខ បង្ខំឱ្យឆ្អឹងខ្នង និងសាច់ដុំចង្កេះធ្វើការច្រើនជាងធម្មតា។ ដូច្នេះ ប្រសិនបើពាក់ជាញឹកញាប់ ឬក្នុងរយៈពេលយូរ វាអាចបង្កឱ្យមានការឈឺចាប់ និងបញ្ហាលើប្រព័ន្ធសាច់ដុំ-ឆ្អឹងបាន។

បើតាមការណែនាំ បើសិនមានអាការៈឈឺចង្កេះជាប្រចាំ គួរកុំបណ្តោយឱ្យបញ្ហាឈឺចង្កេះនេះរំខានដល់ការរស់នៅតទៅទៀត ដោយគប្បីឆាប់មកពិនិត្យជាមួយក្រុមគ្រូពេទ្យឯកទេស នៃមន្ទីរពេទ្យកាល់ម៉ែត ដើម្បីជៀសវាងផលវិបាកធ្ងន់ធ្ងរទៅថ្ងៃក្រោយ៕ ដោយ ៖ ជុំ សុជាតា

The post ពិតទេ? ពាក់ស្បែកជើងកែងចោត អាចជាមូលហេតុមួយបណ្ដាលឱ្យឈឺចង្កេះ? appeared first on Kampuchea Thmey Daily.

គួរឱ្យដឹងដែរថា ក្រពេញទីរ៉ូអុីត មានតួនាទីផលិត និងបញ្ចេញអ័រម៉ូនទីរ៉ុកស៊ីន (Thyroxine) ដែលជួយជំរុញការបំលែងសារធាតុចិញ្ចឹម ការសំយោគ និងប្រតិកម្មប្រូតេអុីនរបស់សរីរាង្គ រំញោចការកន្រ្តាក់របស់សាច់ដុំបេះដូង និងប្រដាប់រំលាយអាហារ ហើយជាពិសេស ចំពោះក្មេងគឺចូលរួមក្នុងការការលូតលាស់ប្រព័ន្ធប្រសាទនិងឆ្អឹង។

បើតាមសារចែករំលែករបស់មន្ទីពេទ្យកាល់ម៉ែត្រ បានឱ្យដឹងថា រោគសញ្ញាដុំពកក្រពេញទីរ៉ូអុីត ឬជំងឺពក.ក ជាការរីកនូវក្រពេញទីរ៉ូអុីតធំខុសពីធម្មតា ដែលអាចមានអាការៈរីកក្រពេញទាំងមូល ដុំតែមួយ ឬច្រើនដុំ នៅក្នុងក្រពេញ។ ឯការរីកដុំក្រពេញនេះ អាចជាសញ្ញាបញ្ជាក់ពីវិបត្តិនៃការបញ្ចេញអ័រម៉ូន ការរលាកក្រពេញ ដុំពកស្លូតឬកាច ឬការរីកធម្មតារបស់ក្រពេញ។

ក្រៅពីការរីកធំរបស់ក្រពេញ រោគសញ្ញាដែលអាចកើតមានក្នុងករណីអ័រម៉ូនបញ្ចេញលើសធម្មតា រួមមាន ញ័រទ្រូង ញ័រដៃ បេះដូងលោតញាប់ គេងមិនលក់ មួម៉ៅ ឆាប់ហត់ និងកើនកំដៅក្នុងខ្លួនជាដើម។ល។ ប៉ុន្តែក្នុងករណីខ្លះ ការបញ្ចេញអ័រម៉ូនធម្មតា តែដោយសារដុំក្រពេញរីកធំខ្លាំង ធ្វើឱ្យមានវិបត្តិក្នុងការដកដង្ហើម ឬការលេបអាហារ។

ប្រភពដដែលបញ្ជាក់ដែរថា ក្នុងការព្យាបាលដុំពកក្រពេញទីរ៉ូអុីត គឺគ្រូពេទ្យត្រូវធ្វើរោគវិនិច្ឆ័យឱ្យបានច្បាស់លាស់ ថាតើវាជាប្រភេទដុំពកណាមួយហើយយើងត្រូវធ្វើការតាមដានបន្ត ឬត្រូវព្យាបាលដោយថ្នាំ ឬក៏ត្រូវធ្វើការវះកាត់ក្នុងលក្ខ័ណ្ឌចាំបាច់ផ្សេងៗ ឬសង្ស័យថាជាដុំមហារីក។

ចំណែកក្នុងករណីមហារីកក្រពេញទីរ៉ូអុីតដែលពុំទាន់រីករាលដាល បើធ្វើការវះកាត់បានទាន់ពេលវេលា គឺអាចទទួលបានអត្រាជាសះស្បើយខ្ពស់យ៉ាងល្អប្រសើរ។

ក្រុមគ្រូពេទ្យក៏បានណែនាំដេរថា ប្រសិនបើប្រជាពលរដ្ឋមានបញ្ហាដុំពកក្រពេញទីរ៉ូអុីត ឬមានរោគសញ្ញា ដូចជា ញ័រដៃ ញ័រទ្រូង បេះដូងលោតញាប់ និងគេងមិនលក់ជាប្រចាំ គួរទៅពិគ្រោះជាមួយគ្រូពេទ្យជំនាញផ្នែកជំងឺក្រពេញ ជំនាញវិភាគកោសិកា និងជំនាញវះកាត់ក្រពេញទីរ៉ូអុីត ដើម្បីទទួលបានការពិនិត្យ និងព្យាបាលបានទាន់ពេលវេលា៕ ដោយ ៖ ជុំ សុជាតា

The post ញ័រដៃ ញ័រទ្រូង គេងមិនលក់! អាចជាសញ្ញាព្រមាននៃបញ្ហាក្រពេញទីរ៉ូអុីត “ជំងឺពក ក” appeared first on Kampuchea Thmey Daily.

បើតាមប្រភពពីមន្ទីរពេទ្យព្រះអង្គឌួង ជំងឺដុំសាច់ក្នុងពោះរៀនធំ គឺជាសកម្មភាពមួយដែលអ្នកជំងឺមានដុះដុំសាច់នៅលើជញ្ជាំងខាងក្នុងនៃពោះវៀនធំ ហើយដុំសាច់ទាំងនោះអាចជាដុំសាច់ស្លូត ឬអាចជាដុំសាច់មហារីក។

នៅពេលដែលលោកអ្នកចេញរោគសញ្ញា ដូចជាឈឺចុកពោះ / រាក / ទល់លាមករ៉ាំរ៉ៃ ដែលមិនអាចមកស្រាយបាន ឬបន្ទោបង់មានឈាម ស្រកទម្ងន់ ឬបាត់បង់គ្រាប់ឈាមដោយមិនសមហេតុផល ត្រូវទៅទទួលការឆ្លុះពោះវៀនធំជាបន្ទាន់។

ប្រភពដដែល បានបញ្ជាក់ថា ការឆ្លុះពោះវៀនធំ មិនបណ្តាលឱ្យមានគ្រោះថ្នាក់ដល់អ្នកជំងឺឡើយ ហើយថែមទាំងអាចឱ្យអ្នកជំងឺទទួលបានការធ្វើរោគវិនិច្ឆ័យទាន់ពេល និងការព្យាបាលដ៏មានប្រសិទ្ធភាព មុនពេលវាបង្កបញ្ហាសុខភាពធ្ងន់ធ្ងរ។

សម្រាប់វិធីដែលអាចជួយកាត់បន្ថយការដុះដុំសាច់ក្នុងពោះវៀនធំ ត្រូវថែរាង/រក្សាទម្ងន់ខ្លួន ឬសម្រកទម្ងន់សន្សឹមៗចំពោះអ្នកធាត់,​ ហាត់ប្រាណទៀងទាត់ជាប្រចាំរៀងរាល់ថ្ងៃ, បរិភោគបន្លែ ផ្លែឈើឱ្យបានច្រើន, កាត់បន្ថយការបរិភោគសាច់ អាហារផ្អាប់ ប្រៃ ផ្អែម និង/ឬប្រេងខ្លាញ់ច្រើន, ទទួលការឆ្លុះពោះវៀនតាមវ័យកំណត់ និងពេលមានរោគសញ្ញាដូចបានជំរាបខាងលើ។

ដើម្បីទទួលបាននូវគុណភាព និងសុវត្ថិភាពនៃការព្យាបាលបញ្ហាខាងលើ សូមទៅពិគ្រោះ ពិនិត្យ និងព្យាបាលជាមួយវេជ្ជបណ្ឌិតឯកទេស៕

The post ឈ្វេងយល់ពីជំងឺដុំសាច់ក្នុងពោះវៀនធំ និងវិធីជួយកាត់បន្ថយការដុះដុំសាច់ក្នុងពោះវៀនធំ appeared first on Kampuchea Thmey Daily.