កីឡា - Kampuchea Thmey Daily

ក្រុមនារីព្រះខ័នរាជស្វាយរៀង ប៉ះ ក្រុមនារីស្រុកស្វាយទាប ពានស្វាយរៀងខាប់នារី សប្តាហ៍ទី២

chean virakbot — Thu, 04 Jun 2026 08:20:53 +0000

ក្រុមនារីព្រះខ័នរាជស្វាយរៀង បន្តស្វែងរកជ័យជម្នះលើកទី២ នៅពេលត្រូវជួប ក្រុមនារី សសយក ស្រុកស្វាយទាប វេលាម៉ោង ៣:៣០ នាទីរសៀល នៅថ្ងៃអាទិត្យ ទី៧ ខែមិថុនា ឆ្នាំ ២០២៦ សម្រាប់ការប្រកួតសប្តាហ៍ទី២ ពានរង្វាន់ស្វាយរៀងខាប់នារី រដូវកាលទី២។

កាលពីសប្តាហ៍ទី១ ក្រុមនារី ព្រះខ័នរាជស្វាយរៀង បានយកឈ្នះ ក្រុមនារី សសយក ស្រុកកំពង់រោទិ៍ ដោយលទ្ធផល ៤-១។ ចំណែកក្រុមនារី សសយក ស្រុកស្វាយទាប មិនទាន់មានពិន្ទុរាប់ទេ បន្ទាប់ពីចាញ់ក្រុម សសយក ស្រុករមាសហែក ១-៣។

ម៉ោង៨ព្រឹក ថ្ងៃអាទិត្យ ទី៧ នេះ ក្រុម សសយក ស្រុករមាសហែក ក៏ត្រូវស្វែងជ័យជម្នះលើកទី២ដែរ ដោយត្រូវជួបក្រុម 2 Brothers។ នៅសប្តាហ៍ទី១ ក្រុម សសយក ស្រុករមាសហែក បានឈ្នះ ក្រុមសសយក ស្រុកស្វាយទាប ដោយលទ្ធផល ៣-១។ ចំពោះក្រុម 2 Brothers ទើបចាប់ផ្តើមប្រកួតលើកទី១។

នៅវេលាម៉ោង ១:៣០នាទីរសៀល ថ្ងៃដដែល ក្រុមវិទ្យាល័យព្រះពន្លា ត្រូវប្រកួតជាមួយក្រុមនារី សសយក ស្រុកកំពង់រោទិ៍។ កាលសប្តាហ៍ទី១ ក្រុម វិទ្យាល័យព្រះពន្លា បានចាញ់ក្រុម CRS Sports ដោយលទ្ធផល ៣-១ ដែរ ហើយក្រុម សសយក ស្រុកកំពង់រោទិ៍ បានចាញ់ក្រុម ព្រះខ័នរាជស្វាយរៀង ១-៤៕

អត្ថបទ៖ វិរបុត្រ

The post ក្រុមនារីព្រះខ័នរាជស្វាយរៀង ប៉ះ ក្រុមនារីស្រុកស្វាយទាប ពានស្វាយរៀងខាប់នារី សប្តាហ៍ទី២ appeared first on Kampuchea Thmey Daily.

ក្រុមសាំបា ប្រេស៊ីល នឹងមិនពិបាកឆ្លងផុតពូល C សម្រាប់ World Cup 2026

Kosal Sem — Thu, 04 Jun 2026 07:46:20 +0000

ក្រុមសាំបា ប្រេស៊ីល ត្រូវបានគេចាត់ទុកជាបេក្ខភាពធំមួយ ក្នុងការប្រជែងជើងឯកពិភពលោក World Cup 2026 ស្របពេលនៅវគ្គចែកពូល ពួកគេហាក់មិនពិបាក ដើម្បីឆ្លងទៅកាន់វគ្គ ៣២ ក្រុមនោះទេ។

ក្រុមជម្រើសជាតិ ប្រេស៊ីល ស្ថិតនៅក្នុងពូល C ជាមួយនឹងក្រុមជម្រើសជាតិ ម៉ារ៉ុក ហៃទី និង ស្កុតលែនដ៍។ ពូលនេះ មាន ប្រេស៊ីល និង ម៉ារ៉ុក គឺបេក្ខភាពធំជាងគេ។ ចំណែកក្រុម ២ ទៀតសុទ្ធតែស្ថិតនៅកម្រិតមធ្យម។ បើមើលទៅលើចំណាត់ថ្នាក់ពិភពលោក គឺ ប្រេស៊ីល ស្ថិតនៅលេខ ៦ ខណៈ ម៉ារ៉ុក ស្ថិតនៅលេខ ៧។ ចំណែក ស្កុតលែនដ៍ វិញនៅចំណាត់ថ្នាក់រហូតដល់លេខ ៤៣ ឯណោះ ហើយ ហៃទី នៅកាន់តែឆ្ងាយថែមទៀត ដោយស្ថិតនៅលេខ ៨២។

នៅ World Cup 2026 នេះ ក្រុម ប្រេស៊ីល បានបង្ហាញការត្រៀមខ្លួនបានល្អមែនទែន ក្រោមការដឹកនាំរបស់លោក Carlo Ancelotti។ ពួកគេបានកោះហៅកីឡាករមានគុណភាពជាច្រើន មានដូចជា Neymar, Vinicius Jr., Raphinha, Casemiro, Marquinhos និង Gabriel Magalhães ជាដើម។ សមាសភាពប៉ុណ្ណេះ បានបង្ហាញ ថា ពួកគេមានសមត្ថភាពគ្រប់គ្រាន់ ដើម្បីឆ្លងផុតពូល C ហើយអាចឡើងដល់វគ្គជ្រៅៗបន្តទៀត។

ទាក់ទិននឹងការប្រកួតវិញ គឺ ប្រេស៊ីល បានប្រកួតមិត្តភាព ៥ លើក ក្នុងនោះទើបតែចាញ់ ១ លើកប៉ុណ្ណោះ ហើយក្រៅពីនោះបានឈ្នះ ៣ និងស្មើ ១។ ពួកគេបានឈ្នះ សេណេហ្គាល់ ២-០, ស្មើ ទុយនីស៊ី ១-១, ចាញ់ បារាំង ១-២, ឈ្នះ ក្រូអាត ៣-១ និងចុងក្រោយឈ្នះ ប៉ាណាម៉ា ៦-២។

នៅក្នុងពូល C នេះ មានតែ ម៉ារ៉ុក មួយប៉ុណ្ណោះ ដែលចាត់ទុកជាឧបសគ្គធំសម្រាប់ ប្រេស៊ីល។ ដោយឡែកក្រុមផ្សេងៗទៀត មិនមែនជាបញ្ហាចោទនោះទេ។ នៅក្នុងវគ្គចែកពូលនេះ ត្រូវបានកំណត់មួយពូលត្រូវមាន ២ ក្រុម ដើម្បីឡើងទៅវគ្គ ៣២ ក្រុម។ ដូច្នេះ នេះកាន់តែអំណះអំណាងបន្ថែមទៀត ដែលបញ្ជាក់ ថា ប្រេស៊ីល មិនពិបាកឆ្លងវគ្គចែកពូល។

កាលវិភាគប្រកួតសម្រាប់ពូល C គឺ ប្រេស៊ីល ត្រូវបើកឆាកជួបក្រុម ម៉ារ៉ុក នៅថ្ងៃទី ១៤ ខែ មិថុនា ម៉ោង ៥ ជិតភ្លឺ។ ចំណែកមួយគូទៀត ក្រុមហៃទី ត្រូវជួប ស្កុតលែនដ៍ នៅថ្ងៃទី ១៤ ខែ មិថុនា ម៉ោង ៨ ព្រឹក។ ឈានចូលប្រកួតទី ២ ក្រុម ស្កុតលែនដ៍ ត្រូវជួប ក្រុមម៉ារ៉ុក នៅថ្ងៃទី ២០ ខែ មិថុនា ម៉ោង ៥ ព្រឹក។ ប្រេស៊ីល ត្រូវជួបក្រុម ហៃទី នៅថ្ងៃដដែលម៉ោង ៧:៣០ ព្រឹក។

ចុងក្រោយ ជាការប្រកួតទី ៣ ក្រុម ស្កុតលែនដ៍ ត្រូវជួប ប្រេស៊ីល និង ម៉ារ៉ុក ត្រូវជួបក្រុម ហៃទី នៅថ្ងៃទី ២៥ ខែ មិថុនា ម៉ោង ៥ ព្រឹកទាបភ្លឺដំណាលគ្នា៕

អត្ថបទ៖ សេម កុសល

The post ក្រុមសាំបា ប្រេស៊ីល នឹងមិនពិបាកឆ្លងផុតពូល C សម្រាប់ World Cup 2026 appeared first on Kampuchea Thmey Daily.

ក្រុមបញ្ជាការដ្ឋានអង្គរក្ស គិតមកដល់ពេលនេះមានប្រាក់រង្វាន់ ៧លានរៀលក្នុងដៃហើយនៅតេជោលីគ

Sina Noun — Thu, 04 Jun 2026 07:45:18 +0000

ក្រុមខ្លាំងបញ្ជាការដ្ឋានអង្គរក្សជាប់ចំណាត់ថ្នាក់លេខ១ ប្រចាំជុំទី១ ដែលទើបបញ្ចប់កាលពីថ្ងៃទី២ ខែមិថុនា ឆ្នាំ២០២៦ នេះដោយឆ្លងកាត់ ៧ប្រកួតឈ្នះទាំង៧ ខណៈសរុបថវិកាដែលមានក្នុងដៃគឺឡើងដល់ ៧លានរៀលហើយនៅអំឡុងពេលនេះ។

ក្រុមបញ្ជាការដ្ឋានអង្គរក្ស

សម្រាប់ការប្រកួតនៅរដូវកាលទី៣ នេះគឺពិសេស និងមានទឹកប្រាក់ឡើងជាបន្តបន្ទាប់ផងដែរចំពោះបណ្ដាក្រុមដែលបានជាប់មកចូលរួមតេជោលីគ ២០២៦។ បញ្ជាក់ពីទឹកប្រាក់ដែលក្រុមខ្លាំងបញ្ជាការដ្ឋានអង្គរក្សមានក្នុងដៃនៅពេលនេះគឺ៖

ទឹកប្រាក់ ១លានរៀល៖ បានមកពីការចូលរួមនៅជុំទី១ (ក្រុមទាំង ៨ដែលមានឈ្មោះលេងនេះទទួលបានមួយក្រុម១លានរៀល)។

ទឹកប្រាក់ ៤លានរៀល៖ បានមកពីការជាប់ចំណាត់ថ្នាក់លេខ១ ប្រចាំជុំទី១។ ទឹកប្រាក់នេះលើកទឹកចិត្តចំពោះក្រុមដែលធ្វើបានល្អជាងគេដោយជាប់ចំណាត់ថ្នាក់លេខ១ ប្រចាំជុំនីមួយៗ។

ប្រាក់ ២លានរៀល៖ បានដោយសារតែក្រុមមួយនេះឡើងទៅលេងនៅវគ្គវិលជុំសន្សំពិន្ទុនៅជុំទី២ ដែលមានសរុប ៦ក្រុម។ ក្រុមដែលបានឆ្លងផុតពីមួយជុំទៅមួយជុំប្រាក់តម្លៃក្លឹបចូលរួមគឺគុណទ្វេដង ( x 2 )។ ដូច្នេះហើយក្រុមដែលបានទៅជុំបន្តបន្ទាប់គឺប្រាក់ក្លឹបកើនឡើងរហូតផងដែរ៕

គ្រូបង្វឹកក្រុមបញ្ជាការដ្ឋានអង្គរក្ស

អត្ថបទដោយ៖ នួន ស៊ីណា

The post ក្រុមបញ្ជាការដ្ឋានអង្គរក្ស គិតមកដល់ពេលនេះមានប្រាក់រង្វាន់ ៧លានរៀលក្នុងដៃហើយនៅតេជោលីគ appeared first on Kampuchea Thmey Daily.

ក្រុម Esports កម្ពុជា សង្ឃឹមខ្ពស់ទទួលបានកៅអី ទៅកីឡា Asian Games នៅជប៉ុន

chean virakbot — Thu, 04 Jun 2026 05:20:00 +0000

ការប្រកួតជម្រុះកីឡាអេឡិចត្រូនិកលើវិញ្ញាសា Mobile Legends Bang Bang នឹងចាប់ផ្តើមពីថ្ងៃទី១៨ ដល់ទី២១ ខែមិថុនា ឆ្នាំ ២០២៦ នៅប្រទេសសិង្ហបុរី ដោយមានក្រុមជម្រើសជាតិចំនួន ២២ មកពីទូទាំងទ្វីបអាស៊ី។

ក្រុមជម្រើសជាតិចំនួន ២២ ត្រូវបានបែងចែកជា ៤ ពូល សម្រាប់ការប្រកួតជម្រុះ និងជ្រើសរើសយកតែ ១២ ក្រុមឡើងទៅជុំចុងក្រោយក្នុងព្រឹត្តិការណ៍កីឡាទ្វីបអាស៊ី លើកទី២០ នៅប្រទេសជប៉ុន ដើម្បីដណ្តើមមេដាយមាស ប្រាក់ និងសំរិទ្ធ។

ពូល A

ពូល A ប្រចាំតំបន់អាស៊ាន មានក្រុមច្រើនជាងគេគឺចំនួន ៨ ប្រទេស មានដូចជា កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី និង វៀតណាម។ ពូលនេះជ្រើសរើសយក ៥ ក្រុមឡើងទៅជុំចុងក្រោយ។

ផ្អែកតាមស្ថិតិ និងសមិទ្ធផលប្រកួតអន្តរជាតិកន្លងមក កម្ពុជា មានសង្ឃឹមខ្ពស់ក្នុងការឡើងទៅជុំចុងក្រោយ។ ក្រុមដែលមើលទៅមានកម្រិតទាបមិនលើសកម្ពុជា គឺ ឡាវ វៀតណាម និង សិង្ហបុរី ហើយក្រុមដែលមានគុណភាពខ្ពស់មានដូចជា ហ្វីលីពីន ឥណ្ឌូណេស៊ី ម៉ាឡេស៊ី និង មីយ៉ាន់ម៉ា។

កាលពីល្ងាចថ្ងៃទី៣ ខែមិថុនា ឆ្នាំ ២០២៦ សហព័ន្ធកីឡាអេឡិចត្រូនិកកម្ពុជា បានប្រកាសបញ្ជីឈ្មោះកីឡាករជម្រើសជាតិ និងគ្រូបង្វឹកជាផ្លូវការហើយដើម្បីទៅប្រកួតជម្រុះ។

នៅក្នុងប្រវត្តិសាស្ត្រកីឡាទ្វីបអាស៊ី កម្ពុជា បានឈ្នះមេដាយមាសចំនួន ៣ គ្រឿងគឺដោយកីឡាការិនី ស៊ន សៀវម៉ី លើប្រភេទកីឡាតេក្វាន់ដូ កាលពីឆ្នាំ ២០១៤ នៅកូរ៉េខាងត្បូង។ កីឡាការិនី ខាន់ ចេសា លើប្រភេទកីឡាជឺជីតស៊ូ និងកីឡាករ សាលី អ៊ូម៉ើត លើប្រភេទកីឡាម៉ូតូទឹក កាលពីឆ្នាំ ២០១៨ នៅឥណ្ឌូណេស៊ី។

ពូល B

ពូល B ប្រចាំតំបន់អាស៊ីខាងលិច មានប្រទេស ៥ ប្រទេសគឺ អ៉ីរ៉ង់ អារ៉ាប៊ីសាអ៊ូឌីត ហ្សក់ដានី អារ៉ាប់រួម និង អូម៉ង់។ ពូលនេះជ្រើសរើសយក ៣ ក្រុមឡើងទៅជុំចុងក្រោយ។

ពូល C

ពូល C តំណាងឲ្យ តំបន់អាស៊ីកណ្តាល មាន ៤ ប្រទេស គឺ កាហ្សាស្ថាន អ៊ូបេគីស្ថាន គៀរហ្ស៊ីស្ថាន និង តាហ្ស៊ីគីស្ថាន។ ពូលនេះជ្រើសរើសយក ២ ក្រុមឡើងទៅជុំចុងក្រោយ។

ពូល D

ពូល D ប្រចាំតំបន់អាស៊ីខាងកើត និងខាងត្បូង មាន ៥ ប្រទេស គឺ នេប៉ាល់ ស្រីលង្កា ហុងកុង ម៉ុងហ្គោលី និង ប៉ាគីស្ថាន។ ពូលនេះជ្រើសរើសយក ២ ក្រុមទៅជុំចុងក្រោយ។

សូមបញ្ជាក់ថា ការប្រកួតជម្រុះនឹងធ្វើនៅប្រទេស សិង្ហបុរី ចាប់ពីថ្ងៃទី១៨ ដល់ ថ្ងៃទី២១ ខែមិថុនា ឆ្នាំ ២០២៦។

យោងតាមកិច្ចប្រជុំ លើកទី ១០១ របស់ក្រុមប្រឹក្សាកីឡាអូឡាំពិកអាស៊ី បានបញ្ជាក់ថា ដំណើរការប្រកួតកីឡាអេឡិចត្រូនិកបគ្រប់គ្រងដោយ ក្រុមប្រឹក្សាកីឡាអូឡាំពិកអាស៊ី (OCA) ទាំងស្រុង សូម្បីតែ សហព័ន្ធកីឡាអេឡិចត្រូនិកអាស៊ី (AESF) ក៏មិនពាក់ព័ន្ធដែរ៕

អត្ថបទ៖ វិរបុត្រ

The post ក្រុម Esports កម្ពុជា សង្ឃឹមខ្ពស់ទទួលបានកៅអី ទៅកីឡា Asian Games នៅជប៉ុន appeared first on Kampuchea Thmey Daily.

សូត្រ ប៊ុនធី មិនច្រណែនអ្វីនោះទេពេលឃើញក្លឹបប្រដាល់ថ្មីៗមានម្ចាស់ឧបត្ថម្ភរាប់រយលានរៀលនោះ

Sina Noun — Thu, 04 Jun 2026 04:11:56 +0000

កីឡាករ សូត្រ ប៊ុនធី និងជាអ្នកកាន់ក្លឹបប្រដាល់បក្សីស្លាបដែក ថាមិនច្រណែនអ្វីនោះទេចំពោះក្លឹបថ្មីៗដែលទទួលបានការឧបត្ថម្ភ (Sponsor) រាប់រយលានរៀលដើម្បីអភិវឌ្ឍន៍ ឬដើម្បីបណ្ដុះធនធាន ព្រោះធ្វើម៉េចក្លឹបទាំងនោះល្បីៗមានសិស្សប្រកួតច្រើន។

ទិដ្ឋភាពក្លឹប

ជុំវិញសំនួរថាយល់យ៉ាងណាដែរនៅពេលឃើញក្លឹបថ្មីៗទើបបង្កើតតែមានការឧបត្ថម្ភថវិកាច្រើន(Sponsor) ស្របពេលក្លឹបបក្សីស្លាបដែកជាក្លឹបចាស់បែរជាមិនមានការជួយជ្រោមជ្រែងបែបនេះ? សូត្រ ប៊ុនធី ឆ្លើយតបថា មិនមានច្រណែនអ្វីនោះទេ ព្រោះក្លឹបទាំងនោះពិតជាល្បីឈ្មោះ និងមានសិស្សច្រើននៅក្នុងវិស័យប្រដាល់នេះមែន។ បើអ្នកម្ចាស់ឧបត្ថម្ភបច្ចុប្បន្ននេះគឺផ្ដោតតែលើក្លឹបល្បីៗបែបនោះរូបគេឃើញហើយក៏មិនមានអ្វីលើកឡើងច្រើនពាក់ព័ន្ធរឿងនេះដែរ។

សមិទ្ធផលក្លឹប

សិស្សច្បងនៃត្រកូល សូត្រ រូបនេះបន្ថែមទៀតថា ក្លឹបបក្សីស្លាបដែករបស់ខ្លួនគឺមានកីឡាករតែ ៤នាក់បងប្អូននេះទេ ដូច្នេះបន្តតាមដំណើរ ឬតាមលទ្ធភាពរបស់ខ្លួនដដែល។ តទៅមុខទៀតបើមានខាងណាឧបត្ថម្ភដើម្បីជួលជុលក្លឹប ឬជួយជាសម្ភារក៏ទទួលយក និងបន្តអភិវឌ្ឍន៍ជាងនេះ។ ប៉ុន្តែបើមិនមានទេក៏ធ្វើតាមធម្មតា ព្រោះពីមុនមកលំបាកយូរណាស់ហើយលំបាកតទៅទៀតមិនថ្វីដែរ។

ទីតាំងក្លឹបបក្សីស្លាបដែកដែលជួលនៅក្បែរ CTN

បញ្ជាក់ដែរថា ក្លឹបប្រដាល់បក្សីស្លាបដែកជាក្លឹបប្រដាល់មានអាយុកាល ២០-៣០ឆ្នាំមកហើយ និងបង្កើតឡើងដោយលោក សួន ប៊ុនសូត្រ ដែលជាគ្រូផង និងជាមន្ត្រីចៅក្រម អាជ្ញាកណ្ដាលផង។ បន្ទាប់ពីលោក សួន ប៊ុនសូត្រ ទទួលមរណៈភាពទៅគឺកីឡាករ សូត្រ ប៊ុនធី ជាអ្នកមើលការខុសត្រូវបន្ត។ វិស័យប្រដាល់មានភាពរីកចម្រើនមកដល់ពេលនេះក៏មានការរួមចំណែកធំពីក្លឹបប្រដាល់បក្សីស្លាបដែកដែលមានត្រកូល សូត្រ នេះផងដែរ។ រយៈពេលប៉ុន្មានឆ្នាំចុងក្រោយនេះក្លឹបប្រដាល់ថ្មីៗជាច្រើនបានទទួលការឧបត្ថម្ភរាប់រយលានរៀលលើការបណ្ដុះធនធានកីឡាករ និងអភិវឌ្ឍន៍ក្លឹប៕

បងប្អូនត្រកូល សូត្រ

អត្ថបទដោយ៖ នួន ស៊ីណា

The post សូត្រ ប៊ុនធី មិនច្រណែនអ្វីនោះទេពេលឃើញក្លឹបប្រដាល់ថ្មីៗមានម្ចាស់ឧបត្ថម្ភរាប់រយលានរៀលនោះ appeared first on Kampuchea Thmey Daily.

មុនជួប ប៊ូតាន ល្ងាចនេះ គ្រូ Koji ទម្លាយ ថា លោកមានសម្ពាធ ២ ចំណុច

Kosal Sem — Thu, 04 Jun 2026 03:12:27 +0000

គ្រូបង្វឹករបស់ក្រុមបាល់ទាត់ជម្រើសជាតិ កម្ពុជា លោក Koji Gyotoku ហាក់មិនខ្វាយខ្វល់ច្រើនឡើយ អំពីលទ្ធផលអវិជ្ជមានរបស់ក្រុមគោព្រៃនាមួយរយៈចុងក្រោយនេះ ប៉ុន្តែអ្វី ដែលជាក្តីព្រួយបារម្ភ និងជាសម្ពាធសម្រាប់លោក ក្នុងជំនួបទល់ក្រុម ប៊ូតាន ល្ងាចនេះ គឺ «លទ្ធផល» និង «ការលេងរបស់កូនក្រុមលោកមានភាពល្អប្រសើរឬអត់»។

លោក Koji បានថ្លែងបែបនេះ នៅក្នុងសន្និសីទសារព័ត៌មានកាលពីល្ងាចថ្ងៃ ពុធ ទី ៣ ខែ មិថុនា ឆ្នាំ ២០២៦ មុនការប្រកួតរវាងក្រុមជម្រើសជាតិ កម្ពុជា ទល់នឹង ប៊ូតាន នាល្ងាចថ្ងៃ ព្រហស្បតិ៍ ទី ៤ ខែ មិថុនា ឆ្នាំ ២០២៦ នៅ ពហុកីឡដ្ឋានជាតិអូឡាំពិក។

គ្រូបង្គោលសញ្ជាតិ ជប៉ុន វ័យ ៦១ ឆ្នាំបានឱ្យដឹងថា លោកមិនមានសម្ពាធអ្វីឡើយ ទោះបីជាការប្រកួត ៥ ប្រកួតចុងក្រោយរបស់ កម្ពុជា មិនទាន់ឈ្នះសោះ ព្រោះទាំងនេះគឺជារឿងអតីតកាល។ ទោះបីជាយ៉ាងណា លោកបានបញ្ជាក់ ថា អ្វីដែលធ្វើឱ្យលោកខ្វល់ខ្វាយ និងជាសម្ពាធ គឺការប្រកួតល្ងាចនេះ ទទួលបានលទ្ធផលល្អឬអត់ ហើយកូនក្រុមរបស់លោកបង្ហាញទម្រង់លេងបានល្អកម្រិតណា។

លោក Koji បានមានប្រសាសន៍ ថា៖ «សម្រាប់ខ្ញុំ រឿងពីមុនៗ មិនមែនជាសម្ពាធសម្រាប់ខ្ញុំឡើយ។ បើយើងសួរ ថា លទ្ធផលមិនល្អសម្រាប់ប៉ុន្មានឆ្នាំមុន តើកីឡាករមានសម្ពាធឬទេ? សម្រាប់ការប្រកួតនេះ គឺមិនមានសម្ពាធទេ ប៉ុន្តែអ្វី ដែលយើងចាប់អារម្មណ៍ ថា មានសម្ពាធ គឺការប្រកួតថ្ងៃស្អែក (ថ្ងៃនេះ)។ តើកីឡាកររបស់យើងលេងបានល្អឬអត់ ហើយទទួលបានលទ្ធផលល្អឬអត់»។

ការប្រកួតទល់នឹងក្រុម ប៊ូតាន ល្ងាចនេះ គឺជាត្រឡប់មកវិញរបស់ក្រុមជម្រើសជាតិ កម្ពុជា បន្ទាប់ពីអាក់ខានតាំងពីខែ វិច្ឆិកា ឆ្នាំ ២០២៥ ដែលពេលនោះបានប្រកួតស្មើជាមួយក្រុម ចិនហុងកុង ១-១ នៅទឹកដី ហុងកុង។

គួរបញ្ជាក់ផងដែរ ថា លទ្ធផល ៥ ប្រកួតចុងក្រោយរបស់ កម្ពុជា គឺធ្វើមិនបានល្អនោះទេ ក្នុងនោះបានចាញ់ ថៃ ២-៣, ចាញ់ វៀតណាម ១-២, ចាញ់ អារូបា ១-២, ចាញ់ តាជីគីស្ថាន ១-២ និងស្មើ ហុងកុង ១-១៕

អត្ថបទ៖ សេម កុសល

The post មុនជួប ប៊ូតាន ល្ងាចនេះ គ្រូ Koji ទម្លាយ ថា លោកមានសម្ពាធ ២ ចំណុច appeared first on Kampuchea Thmey Daily.

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង

Sina Noun — Thu, 04 Jun 2026 02:06:43 +0000

កីឡាករជនជាតិអាមេរិក Penrose ដែលក្រុមបាល់ទះស្នងការខេត្តស្វាយរៀងយកមកជួយក្រុមក្នុងតេជោលីគ រដូវកាលទី៣ ហាក់នៅមិនទាន់បានបញ្ចេញសមត្ថភាពឲ្យល្អខ្លាំងនៅឡើយទេប៉ុន្មានប្រកួតជុំទី១ កន្លងទៅនេះ ខណៈអ្នកគាំទ្រហាក់ឆ្ងល់លេងមិនខ្លាំងដូចតាមវីដេអូលើបណ្ដាញសង្គម។

កីឡាករអាមេរិក Penrose

ជុំវិញសមត្ថភាពកីឡាករអាមេរិក Penrose ម្នាក់នេះលោក សូ សែម គ្រូបង្វឹករបស់ស្នងការខេត្តស្វាយរៀង បានឲ្យដឹងថា ដោយសារបញ្ហាផ្លាស់ប្ដូរទីកន្លែងមិនទាន់សម្របបរិយាកាស និងម្ហូបអាហានៅកម្ពុជារហូតដល់រាគប៉ុន្មានថ្ងៃជាប់គ្នាទៀតផង។ ដោយសារបញ្ហាសុខភាពនេះទើបធ្វើឲ្យរូបគេមិនមានកម្លាំងក្នុងការជួយក្រុម ឬលេងឲ្យបានល្អពេញលេញនោះទេ។

គ្រូបង្វឹកខាងលើបន្ថែមទៀតថា មួយវិញទៀតរូបគេជាកីឡាករមកតំបន់ជឿលឿនខ្លាំងខាងបាល់ទះ និងមានទម្រង់លេងខុសពីអាស៊ាននេះ ដូច្នេះទើបធ្វើឲ្យរូបគេមិនទាន់អានលេងឲ្យត្រូវស៊ីសង្វាក់ជាមួយក្រុមភ្លាមៗបានឡើយ។ យ៉ាងណាអំឡុងពេលសម្រាកប្រហែល ២សប្ដាហ៍នេះលោកសង្ឃឹមថា Penrose អាចនឹងសម្របខ្លួនបានប្រសើរឡើងវិញទាំងបរិយាកាសរស់នៅ និងទម្រង់លេងជាមួយមិត្តរួមក្រុម។

កីឡាករអាមេរិក Penrose

បញ្ជាក់ដែរថា ក្រុមបាល់ទះស្នងការខេត្តស្វាយរៀង បាននាំយកកីឡាករអាមេរិក Penrose អំឡុងពាក់កណ្ដាលខែឧសភា ឆ្នាំ២០២៦ កន្លងទៅនេះដើម្បីមកជួយក្រុមក្នុងការប្រកួតតេជោលីគ រដូវកាលទី៣។ កីឡាករអាមេរិករូបនេះលេងក្នុងតំណែងស្មាត់ស្លាបឆ្វេង (Opposite Hitter) និងជាកីឡាករមានសេវាធ្ងន់ លឿន តាមរយៈការប្រកួតកន្លងទៅនេះ៕

អត្ថបទដោយ៖ នួន ស៊ីណា

The post មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង appeared first on Kampuchea Thmey Daily.

វិភាគ World Cup៖ ព័រទុយហ្គាល់ ស្ថិតនៅពូល K ជាពូលមិនងាយស្រួលឡើងវគ្គបន្ត

chean virakbot — Thu, 04 Jun 2026 01:22:49 +0000

ពូល K ត្រូវបានចាត់ជាពូលគួរឲ្យអារម្មណ៍មួយក្នុងព្រឹត្តិការណ៍បាល់ទាត់ពិភពលោក ឆ្នាំ ២០២៦ ដោយមានក្រុមជម្រើសជាតិ ព័រទុយហ្គាល់ កូឡុំប៉ី កុងហ្គោ និង អ៊ូបេគីស្ថាន។ ព័រទុយហ្គាល់ និង កូឡុំប៉ី ត្រូវបានគេគិតថា នឹងឆ្លងផុតពូល ប៉ុន្តែមិនងាយស្រួល។

ក្រុមជម្រើសជាតិ ព័រទុយហ្គាល់ (REUTERS)

ព័រទុយហ្គាល់ ជាក្រុមខ្លាំងជាងគេបំផុតនៅក្នុងពូលនេះដោយពួកគេស្ថិតនៅចំណាត់ថ្នាក់លេខ ៩ ក្នុងតារាងពិភពលោក FIFA Ranking និងធ្លាប់បង្ហាញខ្លួននៅ World Cup ជុំចុងក្រោយ ៩ លើក ខណៈ កូឡុំប៊ី ស្ថិតនៅលេខ ២០ ធ្លាប់បង្ហាញខ្លួននៅជុំចុងក្រោយ ៧ លើក។ ចំណែកក្រុមពីតំបន់អាស៊ីគឺ អ៊ូបេគីស្ថាន ទើបតែបង្ហាញខ្លួនជុំចុងក្រោយ លើកដំបូង ហើយ កុងហ្គោ បានឡើងដល់ជុំចុងក្រោយលើកទី២ បន្ទាប់ពីបានឡើងលើកទី១ តាំងពីឆ្នាំ ១៩៧៤។

អ្នកគាំទ្រផ្តោតអារម្មណ៍លើកីឡាករ Cristiano Ronalldo ដែលមានវ័យ ៤១ ឆ្នាំ និងធ្លាប់លេងជើងឯកពិភពលោកជុំចុងក្រោយ ៦ លើក។ គោលដៅបំណងធំបំផុតរបស់ប្រធានក្រុមព័រទុយហ្គាល់រូបនេះគឺការឈ្នះជើងឯកពិភលោកដែលរូបគេមិនទាន់ស្គាល់រសជាតិឡើយ។ កីឡាករផ្សេងៗទៀតរបស់ ព័រទុយហ្គាល់ សុទ្ធតែលំដាប់ពិភពលោកមានដូចជា Bruno Fernandes, Vitinha, Joao Naves, Nuno Mendes និង Goncalo Ramos ជាដើម។

រុមជម្រើសជាតិ កូឡុំប៉ី (REUTERS)

គូប្រជែងធំរបស់ ព័រទុយហ្គាល់ នៅក្នុងពូលនេះ គឺ កូឡុំប៊ី ដែលមានតួសំខាន់ដូចជា Luis Diaz ដែលកំពុងក្លាយជាតារារះនៅក្នុងពិភពលោក។ ជាមួយគ្នានេះតារាជើងចាស់ James Rodriguez អាយុ ៣៤ ឆ្នាំ និងកម្លាំងសំខាន់ Davinson Sanchez។

ក្រោយរង់ចាំអស់រយៈពេល ៥២ ឆ្នាំ ក្រុមជម្រើសជាតិ កុងហ្គោ បានវិលត្រឡប់ទៅកាន់ឆាក World Cup ជុំចុងក្រោយជាលើកទី២ បន្ទាប់ពីបានយកឈ្នះ ចាម៉ៃកា ក្នុងវគ្គខ្វែងអន្តរទ្វីប។ តួសំខាន់ៗសំខាន់របស់ពួកគេមានដូចជា Yoane Wissa មកពីក្លិប Newcastle, កីឡាករ Aaron Wan Bissaka មកពីក្លិប West Ham និងកីឡាករ Axel Tuanzebe មកពីក្លិប Burnley។ ពួកគេជាក្រុមមិនអាចមើលស្រាលបានឡើយ។

ក្រុមជម្រើសជាតិ អ៊ូបេគីស្ថាន

ក្រុមឡើងជុំចុងក្រោយលើកដំបូងពីអាស៊ីគឺ អ៊ូបេគីស្ថាន បានត្រៀមខ្លួនមិនសូវល្អប្រសើរទេ ប៉ុន្តែវិរបុរសបាល់ទាត់អ៉ីតាលី លោក Fabio Cannaavaro ត្រូវបានតែងតាំងជាគ្រូបង្គោលដែលធ្វើឲ្យទទួលបានការចាប់អារម្មណ៍ខ្លាំង។ តួសំខាន់ជាងគេគឺកីឡាករ Abdukodir Khusanov មកពីក្លិប Manchester City ដែលនឹងក្លាយរនាំងធំដើម្បីទប់ស្កាត់ Ronaldo និង Luis Diaz។ ក្រោមការដឹកនាំរបស់គ្រូបង្គោលដែលធ្លាប់ឈ្នះជើងឯកពិភពលោកអាចធ្វើឲ្យដៃគូជួបបញ្ហា ហើយពួកគេអាចមានឱកាសអ៊ុតមើលចំណាត់ថ្នាក់លេខ៣ល្អបំផុតក្នុងពូល។

ក្រុមជម្រើសជាតិកុងហ្គោ (REUTERS)

ការប្រកួតវគ្គសន្សំពិន្ទុរបស់ពួកគេ ថ្ងៃបើកឆាក ព័រទុយហ្គាល់ ជួប កុងហ្គោ និង អ៊ូបេគីស្ថាន ជួប កូឡុំប៊ី នាថ្ងៃទី១៧ ខែមិថុនា។ ការប្រកួតទី២ ថ្ងៃទី២៣ ខែមិថុនា ព័រទុយហ្គាល់ ជួប អ៊ូបេគីស្ថាន និង កូឡុំប៊ី ជួប កុងហ្គោ។ ការប្រកួតសន្សំពិន្ទុចុងក្រោយ ថ្ងៃទី២៧ ខែមិថុនា ព័រទុយហ្គាល់ ជួប កូឡុំប៊ី ដែលត្រូវបានគេគិតជាការប្រកួតដណ្តើមចំណាត់ថ្នាក់លេខ១ក្នុងពូល ហើយ កុងហ្គោ ជួប អ៊ូបេគីស្ថាន។

តាមការព្យាករ ព័រទុយហ្គាល់ អាចរកបាន ៧ ពិន្ទុ ឈរលើកំពូលតារាង ហើយ កូឡុំប៊ី អាចរកបាន ៦ ពិន្ទុ ស្ថិតនៅលេខ ២ ដែលនឹងបានឡើងទៅកាន់វគ្គ ៣២ ក្រុមចុងក្រោយ ខណៈ កុងហ្គោ អាចរកបាន ២ ពិន្ទុ និង អ៊ូបេគីស្ថាន អាចរកបាន ១ ពិន្ទុ ដែលធ្លាក់ត្រឹមវគ្គសន្សំពិន្ទុក្នុងពូលទាំងពីរ៕

កីឡាករ Ronaldo (REUTERS)

អត្ថបទ៖ វិរបុត្រ

The post វិភាគ World Cup៖ ព័រទុយហ្គាល់ ស្ថិតនៅពូល K ជាពូលមិនងាយស្រួលឡើងវគ្គបន្ត appeared first on Kampuchea Thmey Daily.

កីឡា - Kampuchea Thmey Daily

ក្រុម​នារីព្រះ​ខ័ន​រាជ​ស្វាយរៀង ប៉ះ ក្រុម​នារីស្រុក​ស្វាយទាប ពាន​ស្វាយរៀងខាប់​នារី សប្តាហ៍​ទី​២

ក្រុមសាំបា ប្រេស៊ីល នឹងមិនពិបាកឆ្លងផុតពូល C សម្រាប់ World Cup 2026

ក្រុម Esports កម្ពុជា សង្ឃឹម​​ខ្ពស់​​​ទទួល​បាន​កៅអី ទៅ​កីឡា​ Asian Games នៅ​ជប៉ុន

មុនជួប ប៊ូតាន ល្ងាចនេះ គ្រូ Koji ទម្លាយ ថា លោកមាន​សម្ពាធ ២ ចំណុច

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង​

វិភាគ World Cup៖ ព័រទុយហ្គាល់ ស្ថិតនៅពូល K ជាពូលមិនងាយស្រួលឡើងវគ្គបន្ត

ក្រុមនារីព្រះខ័នរាជស្វាយរៀង ប៉ះ ក្រុមនារីស្រុកស្វាយទាប ពានស្វាយរៀងខាប់នារី សប្តាហ៍ទី២

ក្រុម Esports កម្ពុជា សង្ឃឹមខ្ពស់ទទួលបានកៅអី ទៅកីឡា Asian Games នៅជប៉ុន

មុនជួប ប៊ូតាន ល្ងាចនេះ គ្រូ Koji ទម្លាយ ថា លោកមានសម្ពាធ ២ ចំណុច

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង