កីឡា

វិភាគ World Cup៖ ព័រទុយហ្គាល់ ស្ថិតនៅពូល K ជាពូលមិនងាយស្រួលឡើងវគ្គបន្ត

បានផុស

៣ នាទី មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

ពូល K ត្រូវបានចាត់ជាពូលគួរឲ្យអារម្មណ៍មួយក្នុងព្រឹត្តិការណ៍បាល់ទាត់ពិភពលោក ឆ្នាំ ២០២៦ ដោយមានក្រុមជម្រើសជាតិ ព័រទុយហ្គាល់ កូឡុំប៉ី កុងហ្គោ និង អ៊ូបេគីស្ថាន។ ព័រទុយហ្គាល់ និង កូឡុំប៉ី ត្រូវបានគេគិតថា នឹងឆ្លងផុតពូល ប៉ុន្តែមិនងាយស្រួល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័រទុយហ្គាល់ ជាក្រុមខ្លាំងជាងគេបំផុតនៅក្នុងពូលនេះដោយពួកគេស្ថិតនៅចំណាត់ថ្នាក់លេខ ៩ ក្នុងតារាងពិភពលោក FIFA Ranking និងធ្លាប់បង្ហាញខ្លួននៅ World Cup ជុំចុងក្រោយ ៩ លើក ខណៈ កូឡុំប៊ី ស្ថិតនៅលេខ ២០ ធ្លាប់បង្ហាញខ្លួននៅជុំចុងក្រោយ ៧ លើក។ ចំណែកក្រុមពីតំបន់អាស៊ីគឺ អ៊ូបេគីស្ថាន ទើបតែបង្ហាញខ្លួនជុំចុងក្រោយ លើកដំបូង ហើយ កុងហ្គោ បានឡើងដល់ជុំចុងក្រោយលើកទី២ បន្ទាប់ពីបានឡើងលើកទី១ តាំងពីឆ្នាំ ១៩៧៤។

អ្នកគាំទ្រផ្តោតអារម្មណ៍លើកីឡាករ Cristiano Ronalldo ដែលមានវ័យ ៤១ ឆ្នាំ និងធ្លាប់លេងជើងឯកពិភពលោកជុំចុងក្រោយ ៦ លើក។ គោលដៅបំណងធំបំផុតរបស់ប្រធានក្រុមព័រទុយហ្គាល់រូបនេះគឺការឈ្នះជើងឯកពិភលោកដែលរូបគេមិនទាន់ស្គាល់រសជាតិឡើយ។ កីឡាករផ្សេងៗទៀតរបស់ ព័រទុយហ្គាល់ សុទ្ធតែលំដាប់ពិភពលោកមានដូចជា Bruno Fernandes, Vitinha, Joao Naves, Nuno Mendes និង Goncalo Ramos ជាដើម។

គូប្រជែងធំរបស់ ព័រទុយហ្គាល់ នៅក្នុងពូលនេះ គឺ កូឡុំប៊ី ដែលមានតួសំខាន់ដូចជា Luis Diaz ដែលកំពុងក្លាយជាតារារះនៅក្នុងពិភពលោក។ ជាមួយគ្នានេះតារាជើងចាស់ James Rodriguez អាយុ ៣៤ ឆ្នាំ និងកម្លាំងសំខាន់ Davinson Sanchez។

ក្រោយរង់ចាំអស់រយៈពេល ៥២ ឆ្នាំ ក្រុមជម្រើសជាតិ កុងហ្គោ បានវិលត្រឡប់ទៅកាន់ឆាក World Cup ជុំចុងក្រោយជាលើកទី២ បន្ទាប់ពីបានយកឈ្នះ ចាម៉ៃកា ក្នុងវគ្គខ្វែងអន្តរទ្វីប។ តួសំខាន់ៗសំខាន់របស់ពួកគេមានដូចជា Yoane Wissa មកពីក្លិប Newcastle, កីឡាករ Aaron Wan Bissaka មកពីក្លិប West Ham និងកីឡាករ Axel Tuanzebe មកពីក្លិប Burnley។ ពួកគេជាក្រុមមិនអាចមើលស្រាលបានឡើយ។

ក្រុមឡើងជុំចុងក្រោយលើកដំបូងពីអាស៊ីគឺ អ៊ូបេគីស្ថាន បានត្រៀមខ្លួនមិនសូវល្អប្រសើរទេ ប៉ុន្តែវិរបុរសបាល់ទាត់អ៉ីតាលី លោក Fabio Cannaavaro ត្រូវបានតែងតាំងជាគ្រូបង្គោលដែលធ្វើឲ្យទទួលបានការចាប់អារម្មណ៍ខ្លាំង។ តួសំខាន់ជាងគេគឺកីឡាករ Abdukodir Khusanov មកពីក្លិប Manchester City ដែលនឹងក្លាយរនាំងធំដើម្បីទប់ស្កាត់ Ronaldo និង Luis Diaz។ ក្រោមការដឹកនាំរបស់គ្រូបង្គោលដែលធ្លាប់ឈ្នះជើងឯកពិភពលោកអាចធ្វើឲ្យដៃគូជួបបញ្ហា ហើយពួកគេអាចមានឱកាសអ៊ុតមើលចំណាត់ថ្នាក់លេខ៣ល្អបំផុតក្នុងពូល។

ការប្រកួតវគ្គសន្សំពិន្ទុរបស់ពួកគេ ថ្ងៃបើកឆាក ព័រទុយហ្គាល់ ជួប កុងហ្គោ និង អ៊ូបេគីស្ថាន ជួប កូឡុំប៊ី នាថ្ងៃទី១៧ ខែមិថុនា។ ការប្រកួតទី២ ថ្ងៃទី២៣ ខែមិថុនា ព័រទុយហ្គាល់ ជួប អ៊ូបេគីស្ថាន និង កូឡុំប៊ី ជួប កុងហ្គោ។ ការប្រកួតសន្សំពិន្ទុចុងក្រោយ ថ្ងៃទី២៧ ខែមិថុនា ព័រទុយហ្គាល់ ជួប កូឡុំប៊ី ដែលត្រូវបានគេគិតជាការប្រកួតដណ្តើមចំណាត់ថ្នាក់លេខ១ក្នុងពូល ហើយ កុងហ្គោ ជួប អ៊ូបេគីស្ថាន។

តាមការព្យាករ ព័រទុយហ្គាល់ អាចរកបាន ៧ ពិន្ទុ ឈរលើកំពូលតារាង ហើយ កូឡុំប៊ី អាចរកបាន ៦ ពិន្ទុ ស្ថិតនៅលេខ ២ ដែលនឹងបានឡើងទៅកាន់វគ្គ ៣២ ក្រុមចុងក្រោយ ខណៈ កុងហ្គោ អាចរកបាន ២ ពិន្ទុ និង អ៊ូបេគីស្ថាន អាចរកបាន ១ ពិន្ទុ ដែលធ្លាក់ត្រឹមវគ្គសន្សំពិន្ទុក្នុងពូលទាំងពីរ៕