ព្រោះហេតុផលស្រដៀងគ្នានេះ តារាកូរ៉េ ៥រូប សម្រេចធ្វើអត្តឃាត បន្សល់តែការសោកស្ដាយ

តារាប្រុសស្រីក្នុងវិស័យសិល្បៈកូរ៉េខាងត្បូង ប៉ុន្មានឆ្នាំចុងក្រោយនេះ បានផ្ទុះព័ត៌មានជុំវិញការធ្វើអត្តឃាតជាច្រើនរូប ហើយបានបង្កការភ្ញាក់ផ្អើលដល់ហ្វេនក្នុងស្រុក និងកក្រើកដល់អន្តរជាតិជាខ្លាំង។

ក្នុងនោះតារាកូរ៉េចំនួន ៥រូប សុទ្ធសឹងមានកេរ្តិ៍ឈ្មោះល្បីល្បាញ និងនៅវ័យក្មេង ប៉ុន្តែពួកគេបានសម្រេចចិត្តបញ្ចប់ជិវិតខ្លួនឯង ព្រោះមូលហេតុស្រដៀងៗគ្នា​ និងបានបន្សល់ទុកនូវការសោកស្ដាយជាទីបំផុតដល់អ្នកគាំទ្រ។

១. តារាចម្រៀង Kim Jong-hyun

Kim Jong-hyun ឬ Jonghyun បានធ្វើអត្តឃាត នៅអាយុ ២៧ឆ្នាំ កាលពីថ្ងៃទី១៨ ខែធ្នូ ឆ្នាំ២០១៧។ ចំពោះការសម្រេចបញ្ចប់ជីវិតខ្លួនឯងរបស់អតីតសមាជិក SHINee រូបនេះ ត្រូវបានផ្សព្វផ្សាយជាសាធារណៈនៅថ្ងៃបន្ទាប់ពីការស្លាប់ ដែលមូលហេតុមកពីលោកមានវិបត្តិផ្លូវចិត្តធ្ងន់ធ្ងរ។

២. តារាសម្ដែង Choi Jin-ri

Choi Jin-riឬ Sulli ជាតារាសម្ដែង តារាចម្រៀង និងជាតារាម៉ូឌែលល្បីឈ្មោះផងដែរ។ Sulli បានសម្រេចបញ្ចប់ជីវិតខ្លួនកាលពីថ្ងៃទី១៤ ខែតុលា ឆ្នាំ២០១៩ ក្នុងវ័យ ២៥ឆ្នាំ។ មូលហេតុពិតត្រូវបានគេរកឃើញថា ដោយសារនាងមានសម្ពាធពីអ្នករិះគន់លើបណ្ដាញសង្គមខ្លាំងពេក។

៣. តារាចម្រៀង Goo Hara

ប្រមាណជាង១ខែ បន្ទាប់ពី Sulli ស្លាប់ តារា K-pop ម្នាក់ទៀតនាង Goo Hara ត្រូវបានគេប្រទះឃើញស្លាប់នៅក្នុងផ្ទះរបស់នាង។ ចំពោះការធ្វើអត្តឃាតរបស់តារាចម្រៀងរូបនេះ  ត្រូវបានគេដឹងថា ព្រោះតែនាងភ័យខ្លាចមិត្តប្រុសបង្ហោះវីដេអូរឿងមិនល្អរបស់នាងជាសាធារណៈ។

៤. តារាសម្ដែង Lee Jae-ho

ត្រឹមតែពីរថ្ងៃបន្ទាប់ពី Goo Hara ស្លាប់ គេបានប្រទះឃើញ Lee Jae-ho បានស្លាប់នៅក្នុងផ្ទះ នៅទីក្រុងសេអ៊ូល។ គេជឿថា តារាប្រុសរូបនេះធ្វើអត្តឃាត ប៉ុន្តែមិនមានមូលហេតុច្បាស់លាស់បង្ហាញជាសាធារណៈឡើយ។

៥. តារាសម្ដែង Song Yoo-jung

តារាសម្ដែងរូបនេះ បានទទួលមរណភាពកាលពីថ្ងៃទី ២៣ ខែមករា ឆ្នាំ២០២១ ក្នុងវ័យ២៦ឆ្នាំ។ គេមិនដឹងច្បាស់ពីមូលហេតុនៃការធ្វើអត្តឃាតរបស់នាងទេ ប៉ុន្តែអ្វីច្បាស់នោះគឺ ​Song Yoo-jung សម្លាប់ខ្លួន ព្រោះមានជំងឺផ្លូវចិត្ត៕

ប្រែសម្រួល៖ ​សន្យា

ចុចអាន៖ ក្បួនសាមញ្ញៗទាំង ៦ ជួយថែទាំផ្លូវចិត្តមិនឱ្យស្ត្រេសផ្ដេសផ្ដាស

ចុចអាន៖ បណ្ដាញសង្គម បង្កផលប៉ះពាល់ផ្លូវចិត្តក្មេងស្រីជំទង់ធ្ងន់ធ្ងរ