ទិដ្ឋភាពថ្ងៃចូលរោងជ័យនៃពិធីរៀបអាពាហ៍​ពិពាហ៍ ហ៊ិន ចន្ទ័នីរ័ត្ន និងស្វាមី ឌី ពេជ្រ

ដូចដែលការគ្រោងទុកនៅថ្ងៃទី២១ ខែធ្នូ ឆ្នាំ២០២៣ ពិធីការិនីរូបស្រស់ ហ៉ិន ចន្ទ័នីរ័ត្ន និងគូស្នេហ៍បណ្ដូលចិត្តលោក ឌី ពេជ្រ បានដឹកដៃគ្នាប្រារព្ធពិធីថ្ងៃចូលរោងជ័យនៃពិធីរៀបអាពាហ៍ពិពាហ៍យ៉ាងអធិកធម និងមានភាពកក់ក្តៅ​ជាទីបំផុត។

តាមរយ:ការបង្ហោះរូបភាពជាច្រើនបង្ហាញពីទិដ្ឋភាពនៃថ្ងៃចូលរោងជ័យរបស់អ្នកនាង ហ៉ិន ចន្ទ័នីរ័ត្ន និងគូស្នេហ៍បណ្ដូលចិត្តលោក ឌី ពេជ្រ នាល្ងាចម្សិលមិញ គឺគេសង្កេតឃើញមានការរៀបចំតែងលម្អរោងជ័យយ៉ាងស្រស់ស្អាតប្រណិត និងសម្រិតសម្រាង ខណ:មានការចូលរួមពីសមាជិកគ្រួសារ ព្រមទាំងភ្ញៀវកិត្តិយសក៏ដូចជាមិត្តក្នុងរង្វង់សិល្បៈមួយចំនួន។

ជាក់ស្តែងនេះបើតាមរូបភាពជាច្រើនសន្លឹកដែលត្រូវបានចែករំលែកនៅលើបណ្តាញសង្គមហ្វេសប៊ុក និងTik Tokក៏ត្រូវបានគ្រប់គ្នាចាប់អារម្មណ៍យ៉ាងខ្លាំង បន្ទាប់ពីបានឃើញកូនក្រមុំ-កំលោះ១គូនេះបង្ហាញ​ខ្លួន​ក្នុង​ឈុតរៀបការ និងឈុតប្រពៃណីតាមទំលៀមទំលាប់របស់ខ្មែរយ៉ាងស្រស់ស្អាត។

នៅក្នុងឱកាសនេះដែរអ្នកនាង ហ៉ិន ចន្ទ័នីរ័ត្ន និងស្វាមីលោក ឌី ពេជ្រ  បានបង្ហាញនូវស្នាមញញឹមដ៏ផ្អែមល្ហែមមានសេចក្តីសុខដែល​ពោរពេញ​ទៅ​ដោយ​ភាព​សប្បាយ​រីក​រាយ​រហូតអាចធ្វើឲ្យអ្នកគ្រប់គ្នាអាច​ដឹងថា នេះគឺជាថ្ងៃដ៏មានសុភមង្គលគួរឲ្យចងចាំ។ តាមរយ:នេះមានអ្នកគាំទ្រ និងមិត្តភក្តិសិល្ប:ជាច្រើនបានសម្តែងការចូលរួមអបអរ និងជូនពរដល់គូស្នេហ៍ ហ៉ិន ចន្ទ័នីរ័ត្ន និងស្វាមីលោក ឌី ពេជ្រ ផងដែរ៕

អត្ថបទ៖ ចាន់រ៉ា