ជីវិតកម្សាន្ដ

គូម៉ា ថា «បងប្អូនអ្នកគាំទ្រគ្រប់គ្នា គឺជាកម្លាំងចិត្តដ៏ធំធេងបំផុតសម្រាប់ខ្ញុំ»

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

តារាចម្រៀងមនោសញ្ចេតនា លោក គូម៉ា សម្ដែងក្តីរំភើប និងអរគុណដល់អ្នកគាំទ្រដែលស្រលាញ់គាំទ្រចូលចិត្តលោក និងគ្រួសារ ដោយបញ្ជាក់ថា «បងប្អូនអ្នកគាំទ្រគ្រប់គ្នា គឺជាកម្លាំងចិត្តដ៏ធំធេងបំផុតសម្រាប់ខ្ញុំ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាចម្រៀងប្រុស លោក គូម៉ា ក្រោយរៀបអាពាហ៍ពិពាហ៍តាមប្រពៃណីខ្មែរជាមួយ តារាសម្ដែង អ្នកនាង ម៉ៅ គឹមធីតា កាលពីឆ្នាំ ២០២៤ កន្លងទៅ និង ទទួលបានចំណងដៃកូនប្រុសដំបូងម្នាក់នោះ ស្រាប់តែថ្មីៗ នេះ លោកបានបង្ហោះសារតាមរយៈបណ្ដាញសង្គមហ្វេសប៊ុកផ្ទាល់ខ្លួន ហាក់បារម្ភ និងចោទជាសំនួរទៅកាន់អ្នកគាំទ្រថា «សំនួរមួយនេះ សុំសួរជាពិសេសទៅកាន់ហ្វេនៗ និងអ្នកគាំទ្ររូបខ្ញុំរហូតមក តើអ្នកនៅតែបន្តស្រលាញ់គាំទ្រខ្ញុំបន្តទៀតទេក្នុងអាជីពសិល្បៈរបស់ខ្ញុំ នៅពេលដែលខ្ញុំមានប្រពន្ធមានកូន? ព្រោះគេតែងតែនិយាយថា នៅពេលដែលអ្នកសិល្បៈមានគ្រួសារមានកូននោះ នឹងធ្លាក់ប្រជាប្រិយភាព តើពិតមែនឬទេហ្វេនៗ? តែសម្រាប់ខ្ញុំ គឺចង់បង្ហាញប្រាប់អ្នកគាំទ្រខ្ញុំថា នេះគឺជាគ្រួសាររបស់ខ្ញុំ ហើយអរគុណខ្លាំងបំផុតសម្រាប់អ្នកគាំទ្រខ្ញុំ ដែលគាំទ្រខ្ញុំរហូតមកដល់ខ្ញុំមានថ្ងៃនេះ»។

ក្រោយសួរសំនួរទៅកាន់អ្នកគាំទ្រពាក់ព័ន្ធរឿងនៅពេលដែលលោកមានប្រពន្ធកូន តើមានអ្នកបន្តស្រលាញ់គាំទ្រទៀតទេ? ពេលនេះ តារាចម្រៀង លោក គូម៉ា ហាក់សប្បាយចិត្ត និងសម្តែងក្តីរំភើប ដោយសរសេរសារយ៉ាងដូច្នេះថា «ខ្ញុំបានអានគ្រប់ខមិនរបស់បងប្អូនទាំងអស់គ្នា ក្នុងផុសមួយនេះ ខ្ញុំពិតជារំភើប និងមានក្ដីសុខខ្លាំងណាស់ បងប្អូនអ្នកគាំទ្រគ្រប់គ្នា គឺជាកម្លាំងចិត្តដ៏ធំធេងបំផុតសម្រាប់ខ្ញុំ អរគុណខ្លាំងណាស់ដែលបងប្អូនគ្រប់គ្នាស្រលាញ់គាំទ្រចូលចិត្តខ្ញុំ និងគ្រួសាររបស់ខ្ញុំ»។

គួរជម្រាបថា តារាចម្រៀងប្រុស លោក គូម៉ា និង តារាសម្ដែងវ័យក្មេង អ្នកនាង ម៉ៅ គឹមធីតា បានសម្រេចចិត្តចូលរោងការ កាលពីថ្ងៃទី ៣ ខែឧសភា ឆ្នាំ ២០២៤ កន្លងទៅ បន្ទាប់ពីអ្នកទាំងពីរភ្ជាប់ទំនាក់ទំនងស្នេហ៍ជាមួយគ្នាអស់រយៈពេលជាច្រើនឆ្នាំ និង ទទួលបានចំណងដៃកូនប្រុសដំបូងម្នាក់ ឈ្មោះ បូឡា គូម៉ាបាហ៊ូ។

បច្ចុប្បន្ន លោក គូម៉ា តារាចម្រៀងមនោសញ្ចេតនាដែលមានសំនៀងស្រទន់រូបនេះ មិនបានបោះបង់អាជីពសិល្បៈរបស់ខ្លួនឡើយ ពោលនៅតែបន្តបម្រើអារម្មណ៍ទស្សនិកជនតាមរយៈសំនៀងក្នុងបទចម្រៀងថ្មីបន្តបន្ទាប់ទៀត បើទោះបីលោកមានប្រពន្ធកូនក៏ដោយ៕

អត្ថបទ ៖ ពិសី