រោងកុនធំ ៣ ដាស់តឿនអ្នកលួចថតវីដេអូ​ភាពយន្តផ្សាយជាសាធារណៈ បញ្ឈប់ជាបន្ទាន់ ព្រោះបំពានកម្មសិទ្ធិបញ្ញា

ដោយកត់សម្គាល់ឃើញទស្សនិកជន ក៏ដូចជាអ្នកគាំទ្រមួយចំនួនដែលបានចូលទស្សនាបំពានសិទ្ធិ តាមរយ:ការលួចថតជាវីដេអូ​ខ្សែភាពយន្តចាក់បញ្ចាំងនៅតាមរោងកុន ទៅធ្វេីការផ្សព្វផ្សាយនៅលើផេកឬបណ្តាញសង្គមផ្ទាល់ខ្លួននោះ រោងភាពយន្តធំ ៣ ចេញសារក្រើនរំលឹកឱ្យបញ្ឈប់សកម្មភាពនេះ។

ជាក់ស្តែងគេឃើញមានរោងភាពយន្តធំចំនួន ៣ ដែលកំពុងបម្រេីសេវាបញ្ចាំងភាពយន្តខ្មែរនិងបរទេស ​គឺបានចេញសេចក្តីណែនាំរបស់ខ្លួនទៅដល់ទស្សនិកជនដែលបានចូលទស្សនាភាពយន្តខ្មែរ​ និងបរទេសគ្រប់ប្រភេទទាំង​អស់ឱ្យបញ្ឈប់ការថតជាវីដេអូគ្រប់ភាពយន្តស្របច្បាប់ទាំងអស់​ ដែលបានទស្សនា​ធ្វេីការផ្សព្វផ្សាយជាសាធារណៈ តាមបណ្តាញសង្គមគ្រប់ប្រភេទទាំងអស់​ ដោយហេតុថា ការថតបង្ហោះ​ជាអំពេីខុសច្បាប់​ និងរំលោភលេីកម្មសិទ្ធិបញ្ញានិងសិទ្ធិប្រហាក់ប្រហែល​ ។

តាមរយៈសំណេរលើផេកផ្លូវការ Legend Cinemas បានរៀបរាប់ថា “សួស្ដីអ្នកគាំទ្រលេជេនជាទីស្រឡាញ់ទាំងអស់គ្នា អរគុណចំពោះការស្រឡាញ់គាំទ្ររោងភាពយន្ដលេជេន និងរឿង “ភ្លើងឆេះក្លឹបក្រោមដី” យ៉ាងច្រើនកុះករ ប៉ុន្តែពួកយើងសុំចិត្តទស្សនិកជនទាំងអស់គ្នា ដែលបានមកទស្សនាសូមកុំថតរូបភាព ឬវីដេអូផ្សេងៗអំឡុងពេលចាក់បញ្ចាំងរឿងមកផ្សព្វផ្សាយតាមប្រព័ន្ធអុីធើណេតជាសាធារណៈ”។

ជាមួយគ្នានេះ រោងភាពយន្ត major cineplex បានសំណូមពរដល់អ្នកនិយមទស្សនាភាពយន្ត កុំថតរាល់រឿងដែលបានទស្សនាហើយចែករំលែកលើប្រព័ន្ធផ្សព្វផ្សាយជាសាធារណៈ ព្រោះនោះជាទង្វើខុសច្បាប់។ ដោយហេតុនេះ Major ស្នើដល់អ្នកទស្សនា ចូលរួមបញ្ចេញការពេញចិត្តតាមរយៈខមិន ឬ rate លើ Post រឿងដែលបានផ្សាយ ជៀសវាង spoil រឿង។

ដោយឡែក Prime Cineplex Cambodia ក្រើនរំលឹកទាក់ទងនឹងកម្មសិទ្ធិបញ្ញាផងដែរ និងសង្កត់ធ្ងន់ថា ការលក់សំបុត្រកុន គឺសម្រាប់ការចូលទស្សនា ពុំមែនសម្រាប់បើកទ្វារឱ្យចូលថតចម្លង ទៅចែករំលែកលើប្រព័ន្ធផ្សព្វផ្សាយសង្គមនោះឡើយ។

ទន្ទឹមនេះ ផេកផ្លូវការរោងភាពយន្តក៏ស្នើឱ្យអ្នកចូលទស្សនា ស្វែងយល់ពីគុណតម្លៃនៃការងារផលិត ដោយគោរពកម្មសិទ្ធិបញ្ញា ព្រោះការថតចម្លង ជាទង្វើខុសច្បាប់។ ក្នុងនោះ រោងភាពយន្តដាស់តឿនដល់អ្នកលួចចម្លងដែរថា បើក្រុមការងាររោងភាពយន្តផ្ទាល់ ចាប់បានអ្នកកំពុងថត គឺតម្រូវឱ្យលុបចោល ហើយបើមានការខូចខាតអ្វីនោះ គឺទទួលខុសត្រូវនោះឡើយ៕ អត្ថបទ៖ ចាន់រ៉ា