ជីវិតកម្សាន្ដ

តារាឆ្នើមតៃវ៉ាន់ Ning Chang ខាតឡុងចុងអស់រាប់លានដុល្លារ ពេលផ្សារហ៊ុនធ្លាក់ថ្លៃ

បានផុស

១ year មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

បន្ទាប់ពីលេចធ្លាយព័ត៌មានអំពីតារាស្រីដ៏ល្បីមួយរូបខាតលុយរាប់លានដុល្លារ ដោយសារផ្សារហ៊ុនធ្លាក់ចុះយ៉ាងគំហុកនោះ អ្នកលេងបណ្តាញសង្គមអនឡាញក្នុងរយៈពេលប៉ុន្មានថ្ងៃកន្លងមកនេះ បានបង្កើនការជជែកដេញដោលគ្នា និង បានដាក់ការសន្និដ្ឋានថា «គ្មាននរណាក្រៅពី Ning Chang» ជាតារាស្រីដ៏មានមុខមាត់ដែលទស្សនិកជនធ្លាប់ស្គាល់តាមរយៈតួសម្តែងដ៏គួរឲ្យចាប់អារម្មណ៍នៅក្នុងរឿងភាគរឿង «The Empress of China»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍របស់ប្រព័ន្ធផ្សព្វផ្សាយតៃវ៉ាន់ កាលពីថ្ងៃទី៧ខែមេសា ឆ្នាំ២០២៥ លេខកូដភាគហ៊ុនដែល តារាស្រីដ៏ប្រិមប្រិយ រៀមច្បងបានវិនិយោគភ្លាមៗស្រាប់តែធ្លាក់ចុះយ៉ាងខ្លាំង។ កាលពីក្នុងឆ្នាំ ២០២២ តារាស្រីរូបនេះបានចំណាយប្រាក់ជាង ៦០លានដុល្លាតៃវ៉ាន់ (១៨ម៉ឺនដុល្លារ) ដើម្បីទិញភាគហ៊ុននៅក្នុងផ្សារហ៊ុន ដោយរំពឹងថា នឹងទទួលបានប្រាក់ចំណេញដ៏កាក់កបលើសពី១០០លាន។

ថ្វីដ្បិតតែមិនទាន់បាត់លុយទាំងស្រុង ប៉ុន្តែប្រាក់ចំណេញក្នុងក្តីស្រមៃរបស់នាងបានរលាយអស់គ្មានសល់ដែលធ្វើឲ្យមហាជនមានការសោកស្តាយជំនួសតារាដែលមានទេពកោសល្យ និងស្រស់ស្អាតម្នាក់ប្រចាំប្រទេសចិន។

ទោះជាយ៉ាងណា ជាការឆ្លើយតបទៅនឹងការព្រួយបារម្ភរបស់សាធារណៈជន ក្រុមហ៊ុនដែលមានកិច្ចសន្យាគ្រប់គ្រងតួស្រីក្នុងរឿងភាគបុរាណនេះ បានត្រឹមតែឆ្លើយតបយ៉ាងខ្លីថា «ការវិនិយោគគឺជាជម្រើសផ្ទាល់ខ្លួន ក្រុមហ៊ុនមិនអាចជ្រៀតជ្រែកឡើយ។ អរគុណអ្នកទាំងអស់គ្នាសម្រាប់ការព្រួយបារម្ភរបស់អ្នក»។

Ning Chang ឬមានឈ្មោះពិតថា Janine Chang គឺជាតារាស្រីចាយសម្រស់ដែលទស្សនិកជននិយមពេញចិត្តនិងស្រលាញ់បំផុតលើកញ្ចក់ទូរទស្សន៍ចិន។ នាងមិនត្រឹមតែលេចធ្លោជាមួយនឹងសម្រស់ដ៏ឆើតឆាយប៉ុណ្ណោះទេ នាងក៏មានប្រវត្តិអប់រំដ៏គួរឲ្យចាប់អារម្មណ៍ដែលបានបញ្ចប់ការសិក្សាថ្នាក់អនុបណ្ឌិតផ្នែកច្បាប់ ពីសាកលវិទ្យាល័យ Chung Cheng ជាសាលាដ៏មានកិត្យានុភាពបំផុតមួយនៅតៃវ៉ាន់ ។

មិនត្រឹមតែបុណ្ណឹងនោះទេ តារាស្រីកើតក្នុងឆ្នាំ១៩៨២ ទទួលបានភាពល្បីល្បាញលឿនរហ័ស ដោយសារភាពទន់ភ្លន់ សម្រស់ដ៏បរិសុទ្ធ និងស្ទីលសម្ដែងបែបធម្មជាតិដ៏ទំនើបរបស់នាង។ ជាពិសេសថែមទៀត នាងគឺជាតារាតៃវ៉ាន់ដែលពុំធ្លាប់មានរឿងអាស្រូវជាប់កាយ និងបានយកឈ្នះទស្សនិកជនដោយវិជ្ជាជីវៈ ទេពកោសល្យ និងរូបភាពដ៏ស្រស់បំព្រង។ ដូច្នេះហើយ ឧបទ្ទវហេតុខាតបង់ហិរញ្ញវត្ថុនេះ បានធ្វើឲ្យអ្នកគាំទ្រកាន់តែព្រួយបារម្ភ និងសម្ដែងការអាណិតអាសូដល់តារាស្រីជាពន់ពេក។

យ៉ាងណាមិញ ទោះបីជាការវិនិយោគរាប់សិបលានដុល្លារ បានកាត់បន្ថយប្រាក់ចំណេញ ដែលជាអ្វីដែលគ្មាននរណាម្នាក់ចង់បានក៏ដោយ ក៏អ្នកគាំទ្រនៅតែជឿជាក់ថា ជាមួយនឹងភាពក្លាហាន និងភាពវៃឆ្លាតរបស់ Ning Chang នឹងអាចយកឈ្នះព្យុះនេះក្នុងពេលឆាប់ៗនេះ។ នាងមិនត្រឹមតែជាតារាសម្តែងដែលមានទេពកោសល្យប៉ុណ្ណោះទេ ប៉ុន្តែក៏ជានិមិត្តរូបនៃស្ត្រីសម័យទំនើបដែលឯករាជ្យភាព និងរឹងមាំ ៕

អត្ថបទ៖ សាង ស្រីល័ក្ខ

ចុចអាន៖ជិត៤០ឆ្នាំទៅហើយ តួស្រីក្នុងរឿង «យុទ្ធសិល្ប៍ស៊ុនអ៊ូខុង» នៅតែរក្សាសម្រស់ដ៏ផូរផង់