មេបក្ស​​​ប្រឆាំង​តៃ​វ៉ាន់​ទៅ​ចិន ​​​​ព្រោះ​ចង់ផ្សះផ្សា​«សន្តិភាព»​​ ប៉ុន្តែ​ក៏​អាច​ធ្វើ​ឲ្យ​​​តៃ​វ៉ាន់​កាន់​តែ​ឯកោ​

ខណៈ​ពិភព​លោក​កំពុង​​មាន​ភាព​តាន​តឹង​ខ្លាំង​ឡើង ប្រទេស​មួយ​ចំនួន​ដែល​មាន​ឥទ្ធិពល​កំពុង​បន្ត​ដុះ​ខាត់​​ និង​​​បង្កើត​​សមត្ថភាព​ផ្នែក​យោធា ឯ​ប្រទេស​ដទៃ​ទៀត​កំពុង​សម្តែង​ភាព​ស្និទ្ធ​ស្នាល​ដាក់​គ្នា​វិញ​។ ជាក់​ស្តែង​មេដឹកនាំ​បក្ស​ប្រឆាំង​ដ៏សំខាន់របស់​តៃវ៉ាន់​ធ្វើ​ដំណើរ​ទស្សន​កិច្ច​ដ៏​កម្រមួយទៅកាន់ប្រទេសចិន​នៅថ្ងៃអង្គារ ថ្ងៃទី៧ ខែមេសា ឆ្នាំ ​២០២៦ ដោយ​ទីក្រុង​ប៉េកាំង​រំពឹងថា នឹង​ប្រើប្រាស់ដំណើរ​ទស្សន​កិច្ច​​ខាង​លើ​​ ដើម្បីបង្កើន​ឥទ្ធិពល​លើ​កោះប្រជាធិបតេយ្យ​មួយ​នេះ​។

យោង​តាមសារព័ត៌មាន The Strait Times ផ្សាយ​ថ្ងៃ​ទី​៧ ខែមេសា ឆ្នាំ​២០២៦ លោកស្រី Cheng Li-wun ប្រធានគណ Kuomintang (KMT) ​ជា​អ្នក​នយោ​បាយ​ដំបូង​គេដែល​ធ្វើដំណើរទៅកាន់ប្រទេសចិន​ក្នុងរយៈពេល​ជាង​មួយទសវត្សរ៍។ លោកស្រី​លើក​ឡើង​ថា​ ខ្លួន​ចង់​ជួប​ជាមួយ​ប្រធានាធិបតី​ចិន លោក ស៊ី ជីនពីង ដើម្បី​កសាងសន្តិភាពឆ្លង​កាត់​ច្រក​សមុទ្រ​។

យ៉ាងណាមន្ត្រីនិង​អ្នកជំនាញតៃវ៉ាន់​លើក​ឡើង​ថា លោក ស៊ី មើល​ឃើញឱកាស​ដើម្បី​ពង្រឹងជំហរ​របស់លោកស្រី​ Cheng ក្នុង​គណ​បក្ស KMT និង​រារាំងការលក់អាវុធរបស់​សហរដ្ឋអាមេរិក​​ទៅ​ឱ្យ​តៃវ៉ាន់បន្ថែម​ទៀត។​

គណបក្ស KMT បាន​ធ្វើ​ការ​តស៊ូមតិជាយូរមក​ហើយ​សម្រាប់ទំនាក់ទំនង​ជិតស្និទ្ធ​ជាមួយប្រទេសចិនដែល​អះអាងថា​តៃវ៉ាន់ជាផ្នែកមួយ​នៃទឹកដី​របស់ខ្លួន ហើយ​បាន​គំរាមកំហែងប្រើកម្លាំង​យោ​ធា​ដើម្បីដណ្តើមយកវិញ​។ ប៉ុន្តែការ​ឡើង​កាន់​តំណែង​របស់​ ​លោក​ស្រី​ Cheng ដោយ​មិននឹក​ស្មាន​ដល់ជា​​ប្រធាន​​គណបក្ស KMT ទទួល​បាន​ការអបអរសាទរពី​លោក ស៊ី​ ក្នុងខែតុលា តែ​មាន​អ្នករិះគន់ រួមទាំងមន្រ្តី​​​ក្នុង​គណបក្ស​ផង​ដែរ ចោទ​ថា​គាំទ្រ​ចិន​ខ្លាំង​ពេក។

ដំណើរ​ទស្សនកិច្ចរបស់ ​លោកស្រី​ Cheng កើតឡើងពេល​សហរដ្ឋអាមេរិក ដែល​ជាអ្នកគាំទ្រសន្តិសុខ​ដ៏សំខាន់​បំផុត​របស់​តៃវ៉ាន់ ​បង្កើន​សម្ពាធលើសមាជិកសភា​ប្រឆាំងតៃវ៉ាន់ឱ្យអនុម័តសំណើ​សម្រាប់​ការទិញ​សម្ភារៈ​ការពារជាតិ រួមទាំង​អាវុធអាមេរិក​រាប់​ពាន់​លាន​ដុល្លារ ដើម្បី​ទប់ស្កាត់ការវាយប្រហារ​ដែលអាចកើត​មាន​ពីចិន។

មេដឹក​នាំគណបក្ស KMT បានរិះគន់ផែនការ​ទឹក​ប្រាក់​ចំនួន ៣៩ប៊ីលានដុល្លារ​របស់​រដ្ឋាភិបាល​តៃវ៉ាន់​ កំពុង​ប្រឈមមុខនឹងការបែក​បាក់​កាន់តែ​ខ្លាំងក្នុងគណបក្ស​របស់ខ្លួន​ ទប់ទល់​នឹងការគំរាមកំហែង​ផ្នែកយោធា​របស់​ចិន។ មិន​តែ​ប៉ុណ្ណោះ ទីក្រុង​ប៉េកាំងមើលឃើញពីតម្រូវ​ការ​​នៃ​ការ​ជួយ​សង្គ្រោះ​លោកស្រី​ Cheng Li-wun ពីវិបត្តិ​អំណាច។ នេះបើយោងតាមលោក Albert Tzeng អតីត​ទីប្រឹក្សាគណបក្ស KMT ប្រាប់​សារព័ត៌មាន​ AFP ។

លោក Tzeng និយាយថា៖ « ការ​គាំទ្ររបស់​លោក ស៊ី​ ចំពោះ​លោកស្រី ​Cheng នឹង​ធ្វើឱ្យអ្នករិះគន់​របស់​នាង​មានការប្រុងប្រយ័ត្ន​ក្នុងការ​វាយប្រហារ។ ហើយលោក ស៊ី​ បានភ្ជាប់​តៃវ៉ាន់​ទៅ​នឹង​ចក្ខុវិស័យ​របស់លោក​ពីការរស់ឡើង​វិញ​ដ៏អស្ចារ្យរបស់ប្រជាជាតិ​ចិន ដែល​អាច​បង្ហាញ​ថាទីក្រុងប៉េកាំងមិន​បាត់បង់តៃវ៉ាន់​ទាំងស្រុងទៅ​សហរដ្ឋអាមេរិក​ទេ​»។

ស្ថាប័ន​គោលនយោបាយ​​កំពូល​​របស់តៃវ៉ាន់ព្រមានថា៖ « ទីក្រុងប៉េកាំង​បានកោះហៅលោក​ស្រី​ Cheng ក្នុងគោលបំណង​កាត់ផ្តាច់ការ​ទិញ​សម្ភារៈ​យោធាពីសហរដ្ឋអាមេរិកនិងកិច្ច​សហប្រតិបត្តិ​ការ​ជាមួយ​ប្រទេសដទៃទៀត»។

អ្នក​នាំពាក្យក្រុមប្រឹក្សា​កិច្ចការ​ដីគោក លោក Liang Wen-chieh និយាយកាល​ពីថ្ងៃព្រហស្បតិ៍ថា​៖ «សរុបមក ចេតនា​របស់​ទីក្រុង​ប៉េកាំង​គឺធ្វើ​ឱ្យបញ្ហា​ឆ្លងច្រកសមុទ្រមានលក្ខណៈផ្ទៃក្នុង ដោយ​ចាត់​ទុក​វា​ជាបញ្ហា​ក្នុងស្រុក​របស់ចិន និង​ហាមឃាត់ការជ្រៀតជ្រែក​ពីបរទេស» ។

យ៉ាង​ណា​លោកស្រី​ Cheng បាន​វាយបកវិញដោយ​និយាយ​ថា៖ «ដំណើរ​ទស្សនកិច្ច​នេះគឺសម្រាប់​សន្តិភាពនិងស្ថិរភាពឆ្លងច្រកសមុទ្រ​ទាំងស្រុង! ដូច្នេះ​វាមិនទាក់ទងនឹងការទិញ​អាវុធឬបញ្ហាផ្សេង​ទៀត​ទេ​»៕

ប្រែសម្រួល៖ ណឺ មិនា