នាយ ឆាង តស៊ូលើគ្រែពេទ្យប្រហែល ១ឆ្នាំ នៅតែមិនរួចរស់ជីវិត ខណៈគ្រួសារក៏ទីទាល់ខ្វះខាតថវិកាធ្វើបុណ្យ

នេះជាថ្ងៃគម្រប់ខួប ១ឆ្នាំ ដែលនាយឆាងបានចេញពីពេទ្យ ហើយថ្ងៃនេះក៏នាយបានលាចាកលោកផងដែរ ដោយសារជំងឺស្ទះសសៃឈាមបេះដូង។ នេះបើតាមការបញ្ជាក់ពីគណនីហ្វេសប៊ុករបស់លោក ខាន់ ចាន់សុផល ។

ប្រហែល ១ឆ្នាំមុន ពោលគឺក្រោយសមាជិក​ក្រុម​យក្ស​ម្នាក់ទៀតទទួលមរណភាពមិនដល់ ១សប្តាហ៍ផង នាយឆាង ក៏ធ្លាក់ខ្លួនឈឺធ្ងន់បន្ទាប់គ្នា និងត្រូវសង្គ្រោះ​បន្ទាន់​នៅមន្ទីរ​ពេទ្យ​ព្រះកុសមៈ។ បើតាមការបញ្ជាក់ឱ្យដឹង កាលណោះ នាយ ឆាង ឈឺធ្ងន់ត្រូវសង្គ្រោះបន្ទាន់ដោយសារតែជំងឺរលាក​សួត​ធ្ងន់ធ្ងរ។ ​ 

យ៉ាងណា ១ឆ្នាំគត់ នាយ ឆាង បានសម្រាកដេកសង្គ្រោះបន្ទាន់ និងត្រូវបានជួយសង្គ្រោះដោយក្រុមគ្រូពេទ្យ TYDA ខណៈក្រុមគ្រូពេទ្យបានចេញវេជ្ជបញ្ជាឱ្យនាយបន្ថយការហូប និងហាត់ប្រាណ។ បើតាមការឱ្យដឹងពីគណនី Khan Chan Sophal ការដែលក្រុមគ្រូពេទ្យចេញវេជ្ជបញ្ជាបែបនេះ ក៏ព្រោះតែជំងឺធាត់របស់តារាកំប្លែងរូបនេះ បានវាយប្រហារ អាចស្ទះសសៃឈាមបេះដូងគ្រប់ពេល ព្រោះតែខ្លាញ់អាក្រក់ឡើងខ្លាំង។ 

ដំណឹងនៃមរណភាពនេះ បានធ្វើឱ្យមហាជនដែលធ្លាប់ជាអ្នកគាំទ្រក្រុមកំប្លែងរូបនេះ មានការអាណិតអាសូរជាព​ន់ពេក ខណៈម្តាយរបស់នាយ ឆាង ក៏ទីទាល់និងកំពុងអំពាវនាវឱ្យមានជួយជាថវិកាសម្រាប់ធ្វើបុណ្យ។

គួរជម្រាបថា នាយ​ ឆាង គឺជា​សមាជិក​ម្នាក់​របស់​ក្រុមកំប្លែង​គីឡូធ្ងន់​ដែលរួមមាន នាយធុង នាយស្មាច់ នាយ​ឆាង និង​ នាយ​​ម៉េង ។ ក្រុមនេះ​តែងតែ​សម្ដែង​រួមគ្នា​ជា​ក្រុម​ដោយ​មាន​​នាយ​ក្រឹប និងនាយពាង​ ហើយផ្ដល់​សំណើចជូន​ទស្សនិកជន​តាមដានទស្សនា​តាម​រយៈ​ទំព័រ​ហ្វេសប៊ុក និង​ចែកចាយតាម​បណ្ដាញសង្គមនានា និងយូធូបទៀតផងដែរ។

ក្រោយសមាជិកនៃក្រុមឈឺបន្តបន្ទាប់គ្នា មហាជនដែលជាអ្នកគាំទ្រក៏លែងបានឃើញសកម្មភាពកំប្លុកកំប្លែងបន្តទៀត៕