កូនអាន យល់ថា គួរបន្តតម្កល់ «សន្តិភាព» ជាគុណតម្លៃខ្ពស់បំផុត ព្រោះសន្តិភាព ទើបនាំមកនូវការអភិវឌ្ឍន

នាដការីរបាំ កញ្ញា សុខគា គីមលាង ហៅ កូនអាន បានលើកឡើងពីគុណតម្លៃនៃសន្តិភាព ពិសេសសម្រាប់កម្ពុជា ដែលជាប្រជាជាតិមួយធ្លាប់ឆ្លងកាត់សង្គ្រាមយ៉ាងក្រាសក្រែល ទម្រាំកសាងបាននូវសន្តិភាពមួយដែលមានស្ថេរភាព មកទល់សព្វថ្ងៃ ហើយគប្បីបន្តតម្កល់ «សន្តិភាព» ជាគុណតម្លៃខ្ពស់បំផុត ព្រោះថា ទាល់តែមានសន្តិភាព ទើបប្រទេសជាតិមានការរីកចម្រើន។ ការលើកឡើងនេះ គឺស្របពេលដែល «ទិវាសន្តិភាពអន្តរជាតិ» កាន់តែខិតជិតមកដល់ នាចុងសប្តាហ៍ខាងមុខនេះ។

ជារៀងរាល់ឆ្នាំ អង្គការសហប្រជាជាតិ បានកំណត់យកថ្ងៃទី២១ ខែកញ្ញា ជាថ្ងៃដ៏ពិសេស សម្រាប់បណ្តាប្រទេសនៅទូទាំងសកលលោក ប្រារព្ធ «ទិវាសន្តិភាពអន្តរជាតិ» ដើម្បីបង្ហាញនូវការប្តេជ្ញាចិត្តរួមគ្នា លើកគុណតម្លៃសន្តិភាព ក៏ដូចជាការរំលឹកដល់វីរភាពនានា ក្នុងការរួមចំណែកធ្វើឱ្យសម្រេចបាននូវសន្តិភាព។ តួយ៉ាង បើទោះបីជាស្ថិតក្នុងកាលៈទេសៈអស្ថិរភាពតាមព្រំដែនកម្ពុជា-ថៃបច្ចុប្បន្ន ក៏រាជរដ្ឋាភិបាលកម្ពុជានៅតែតម្កល់ «សន្តិភាព» ជាគុណតម្លៃខ្ពស់បំផុត ក្នុងការដោះស្រាយបញ្ហាផងដែរ។

កញ្ញា សុខគា គីមលាង បានបង្ហាញការយល់ឃើញថា សន្តិភាព នាំមកនូវសេចក្តីសុខជូនប្រជាជន និងការអភិវឌ្ឍន។មិនតែប៉ុណ្ណោះ អាចឱ្យយើងបានឃើញនូវហេដ្ឋារចនាសម្ព័ន្ធ និងសមិទ្ធផលនានា ខណៈទាំងនេះហើយ ជាអ្វីដែលពលរដ្ឋខ្មែរគ្រប់រូបចង់បានសម្រាប់ប្រទេសជាតិ។

នាដការីរូបនេះ បន្ថែមថា “នាងសូមអគុណទៅដល់អតីតនាយករដ្ឋមន្ត្រី «សម្តេចតេ ជោ ហ៊ុន សែន បិតានៃសន្តិភាព» និងសូមរគោរពដឹងគុណទៅកាន់វីរៈកងទ័ពដែលបានបូជាសាច់ស្រស់ឈាមស្រស់ដើម្បីបូរណភាពទឹកដី នៃប្រទេសកម្ពុជា ហើយសូមឱ្យបងៗកងទ័ពទាំង ១៨នាក់ ឆាប់វិលមកមាតុភូមិជួបជុំគ្រួសារវិញ”។

គួររំលឹកប្រសាសន៍សម្តេចធិបតី ក្នុងទិវាសន្តិភាពក្រោមមូលបទ «សកម្មភាព ដើម្បីសន្តិភាព៖ ការប្តេជ្ញាចិត្តរួមគ្នា សម្រាប់គោលដៅសកល» ឆ្នាំ២០២៣ លើកឡើងដូច្នេះថា សន្តិភាពមិនមែនជាអ្វីដែលកើតឡើងដោយចៃដន្យនោះទេ។ ដើម្បីកសាងសន្តិភាព យើងទាំងអស់គ្នាត្រូវពុះពារគ្រប់ឧបសគ្គ ប្រកាន់យ៉ាងខ្ជាប់ខ្ជួននូវស្មារតីសាមគ្គីភាព រួបរួមគ្នាជាធ្លុងមួយ និងភាតរភាពជាអន្តរជាតិ។ ភ្នក់ភ្លើងសង្គ្រាម សោកនាដកម្ម ការបែកបាក់រងទុក្ខវេទនាខ្លោចផ្សារកទីបំផុតគ្មាន ដែលប្រជាជាតិយើងបានឆ្លងកាត់ គឺជាមេរៀន និងបទពិសោធដ៏ជូរចត់ដែលមិនអាចបំភ្លេចបាន។ ខណៈទាំងអស់នេះហើយដែលនាំឱ្យយើងទាំងអស់គ្នាបានយល់យ៉ាងច្បាស់ ពីគុណតម្លៃនៃសន្តិភាព៕ ចាន់រ៉ា