អាមេរិក ជំរុញឲ្យមានការបង្ក្រាបជាសកលលើលំហូរអាវុធទៅឲ្យកងកម្លាំង RSF របស់ស៊ូដង់

លោក Marco Rubio រដ្ឋមន្ត្រីការបរទេសសហរដ្ឋអាមេរិកបានជំរុញឱ្យសហគមន៍អន្តរជាតិកាត់ផ្តាច់ការផ្គត់ផ្គង់អាវុធដល់កងកម្លាំងគាំទ្ររហ័ស (RSF) របស់ស៊ូដង់ ដោយចោទប្រកាន់ក្រុមនេះថាបានប្រព្រឹត្តអំពើឃោរឃៅទ្រង់ទ្រាយធំនៅក្នុងទីក្រុង el-Fasher ដែលទើបត្រូវបានកាន់កាប់ថ្មីៗនេះ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១៤ខែវិច្ឆិកា។

ថ្លែងបន្ទាប់ពីកិច្ចប្រជុំ G7 នៅប្រទេសកាណាដា លោក Rubio បាននិយាយថា កងកម្លាំងប្រដាប់អាវុធ (RSF) បានធ្វើការសម្លាប់ជាប្រព័ន្ធ ការរំលោភ និងអំពើហិង្សាផ្លូវភេទប្រឆាំងនឹងជនស៊ីវិលនៅរដ្ឋ Darfur។ បើតាមរូបភាពផ្កាយរណបបង្ហាញពីសាកសពជាជ្រើននៅទូទាំងទីក្រុង el-Fasher បន្ទាប់ពីការឡោមព័ទ្ធរយៈពេល ១៨ ខែ។

កងទ័ពស៊ូដង់និយាយថា អារ៉ាប់រួមបានបញ្ជូនអាវុធដោយសម្ងាត់ទៅឱ្យ RSF តាមរយៈផ្លូវរត់ពន្ធនៅអាហ្វ្រិក ទោះបីជា UAE បដិសេធរឿងនេះក៏ដោយ។ រដ្ឋមន្ត្រីការបរទេសអាមេរិកលោក Marco Rubio មិនបានស្តីបន្ទោស UAE ដោយផ្ទាល់ទេ ប៉ុន្តែបាននិយាយថា ប្រទេសណាមួយដែលជួយបញ្ជូនអាវុធត្រូវតែបញ្ឈប់ជាបន្ទាន់។

គួរបញ្ជាក់ថាកងទ័ពស៊ូដង់ និង RSF បានប្រយុទ្ធគ្នាចាប់តាំងពីខែមេសា ឆ្នាំ ២០២៣ ដែលបង្កើតអ្វីដែល G7 ហៅថាវិបត្តិមនុស្សធម៌ដ៏អាក្រក់បំផុតរបស់ពិភពលោក។ មនុស្សជាង ១៥០,០០០នាក់ត្រូវបានសម្លាប់ និង ១២ លាននាក់ត្រូវបានបង្ខំឱ្យរត់គេចខ្លួនពីផ្ទះរបស់ពួកគេ។

សូម្បីតែបន្ទាប់ពីយល់ព្រមលើបទឈប់បាញ់ក៏ដោយ RSF នៅតែបន្តវាយប្រហារ ហើយឥឡូវនេះគ្រប់គ្រងទីក្រុងសំខាន់ៗទាំងអស់នៅរដ្ឋ Darfur។ របាយការណ៍ពីអង្គការលើកលែងទោសអន្តរជាតិ និងអង្គការសហប្រជាជាតិនិយាយថា អាវុធពីប្រទេសស៊ែប៊ី រុស្ស៊ី ចិន តួកគី យេម៉ែន និង UAE កំពុងឈានដល់ជម្លោះ ជារឿយៗតាមរយៈផ្លូវរត់ពន្ធដែលឆ្លងកាត់ UAE និង Chad។

ទោះយ៉ាងណា RSF បដិសេធការទទួលបានអាវុធពីបរទេស ហើយផ្ទុយទៅវិញបានស្តីបន្ទោសកងទ័ពចំពោះការរារាំងការចរចាសន្តិភាព។ សហរដ្ឋអាមេរិក UAE អេហ្ស៊ីប និងអារ៉ាប៊ីសាអូឌីតកំពុងព្យាយាមធានាបទឈប់បាញ់ និងផ្លាស់ប្តូរប្រទេសស៊ូដង់ឆ្ពោះទៅរកការគ្រប់គ្រងស៊ីវិល ប៉ុន្តែការប្រយុទ្ធនៅតែបន្តកាន់តែអាក្រក់ទៅៗ។

បច្ចុប្បន្នអង្គការសហប្រជាជាតិមានបម្រាមលក់អាវុធតែលើរដ្ឋ Darfur ប៉ុណ្ណោះ មិនមែនលើប្រទេសស៊ូដង់ផ្សេងទៀតទេ ហើយឥឡូវនេះមនុស្សជាច្រើនកំពុងអំពាវនាវឱ្យមានការគ្រប់គ្រងកាន់តែតឹងរ៉ឹង៕

អត្ថបទ៖ ប៊ុន សុភាព