ព័ត៌មានអន្ដរជាតិ

ប្រធានាធិបតីម៉ិកស៊ិក ចោទ «ក្រុមស្តាំនិយម» នៅអាមេរិក ធ្វើទុកបុកម្នេញរដ្ឋាភិបាល

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

ប្រធានាធិបតីម៉ិកស៊ិក លោកស្រី Claudia Sheinbaum បានថ្លែងនៅថ្ងៃចន្ទ ទី១ ខែមិថុនា ថា ក្រុមស្តាំនិយមជ្រុលនៅក្នុងទឹកដីសហរដ្ឋអាមេរិក កំពុងសហការគ្នាជាមួយក្រុមក្នុងស្រុកដើម្បីវាយប្រហារលើរដ្ឋាភិបាលរបស់លោកស្រី ដែលនេះជាការបង្កើនការវាយប្រហារដោយពាក្យសម្តីកាន់តែខ្លាំងឡើង ប្រឆាំងនឹងដៃគូពាណិជ្ជកម្មដ៏ធំបំផុតរបស់ប្រទេសម៉ិកស៊ិក។

**ប្រធានាធិបតីម៉ិកស៊ិក លោកស្រី Claudia Sheinbaum (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បានធ្វើឡើង បន្ទាប់ពីការជួបជុំគ្នាមួយកាលពីចុងសប្តាហ៍ ដែលនៅក្នុងនោះលោកស្រី ប្រធានាធិបតី បានថ្កោលទោស ចំពោះអ្វីដែលលោកស្រីហៅថា ជាការជ្រៀតជ្រែកពីសំណាក់ទីភ្នាក់ងាររដ្ឋាភិបាល និងផលប្រយោជន៍អាជីវកម្មរបស់អាមេរិក។ នេះបើយោងតាមការចុះផ្សាយ ពីទីភ្នាក់ងារសារព័ត៌មាន Reuters។

លោកស្រី Sheinbaum បានប្រាប់សន្និសីទសារព័ត៌មានថា «ខ្ញុំជឿជាក់ថា ពួកគេគឺជាក្រុមស្តាំនិយមជ្រុលនៅក្នុងអាមេរិក ដែលចង់ឲ្យមានទំនាក់ទំនងមិនល្អជាមួយម៉ិកស៊ិក» ដោយសារតែភាពខុសគ្នាខាង «មនោគមវិជ្ជា»។

ទោះជាយ៉ាងណា ប្រធានាធិបតីម៉ិកស៊ិក ដែលមាននិន្នាការឆ្វេងនិយមរូបនេះ បានបញ្ជាក់ថា លោកស្រីមិនជឿថា ការវាយប្រហារទាំងនេះ ត្រូវបានរៀបចំឡើងដោយសមភាគីអាមេរិករបស់លោកស្រី គឺលោក ដូណាល់ ត្រាំ នោះឡើយ។

លោកស្រី Sheinbaum បានប្រាប់អ្នកគាំទ្រកាលពីថ្ងៃអាទិត្យ នៅឯព្រឹត្តិការណ៍រំលឹកខួបពីរឆ្នាំនៃជ័យជម្នះការបោះឆ្នោតប្រធានាធិបតីឆ្នាំ ២០២៤ របស់លោកស្រីថា៖ «តើនរណាជាអ្នកសម្រេចចិត្តនៅក្នុងប្រទេសម៉ិកស៊ិក ទីភ្នាក់ងារបរទេស ឬក៏ប្រជាជន? យើងនឹងការពារអធិបតេយ្យភាព និងឯករាជ្យភាពរបស់ម៉ិកស៊ិក»។

ទំនាក់ទំនងរវាងសហរដ្ឋអាមេរិក និងម៉ិកស៊ិក បានជួបភាពជូរចត់ ចាប់តាំងពីលោក ត្រាំ បានចាប់ផ្តើមចូលកាន់អំណាចសម្រាប់អាណត្តិទីពីររបស់លោក កាលពីខែមករាឆ្នាំ២០២៥ ដោយសារតែជម្លោះលើបញ្ហាពន្ធគយ និងគោលនយោបាយអន្តោប្រវេសន៍។

ភាពតានតឹងដ៏អាក្រក់ បានកើនឡើងកាន់តែខ្លាំងកាលពីខែមេសា បន្ទាប់ពីក្រសួងយុត្តិធម៌អាមេរិក បានចោទប្រកាន់មន្ត្រីម៉ិកស៊ិកចំនួន ១០ រូប រួមទាំងអភិបាលរដ្ឋ Sinaloa គឺលោក Ruben Rocha មកពីគណបក្ស Morena ដែលកំពុងកាន់អំណាច ជុំវិញការសង្ស័យថា មានទំនាក់ទំនងជាមួយការជួញដូរគ្រឿងញៀន។

បន្ទាប់ពីមានការចោទប្រកាន់ពីអាមេរិកលើអ្នកនយោបាយនៃគណបក្ស Morena មក លោកស្រី Sheinbaum បានជម្រុញ និងបង្កើនការអំពាវនាវកាន់តែខ្លាំងក្នុងការការពារអធិបតេយ្យភាពជាតិ៕

អត្ថបទ ៖ សាង ស្រីល័ក្ខ