អ៊ីរ៉ង់ បង្ហាញគំនូរដ៏ធំ ព្រមានទៅ សហរដ្ឋអាមេរិក

កាលពីថ្ងៃអាទិត្យទី២៥ខែមករាឆ្នាំ២០២៦ អ៊ីរ៉ង់បានបង្ហាញគំនូរដ៏ធំមួយនៅទីក្រុងតេហេរ៉ង់ ដែលព្រមានដល់សហរដ្ឋអាមរិក កុំឲ្យធ្វើអន្តរាគមន៍នៅក្នុងប្រទេសរបស់ខ្លួនឲ្យសោះ។

តាមការផ្សាយរបស់ Sky News, គំនូរនេះគូរដោយ «អង្គការឃោសនាឥស្លាម» នៅ Enghelab Square ដែលបង្ហាញពី យន្តហោះរងការខូចខាតយ៉ាងដំណំនៅលើនាវាដឹកយន្តហោះចម្បាំង រួមជាមួយពាក្យស្លោកជាភាសាហ្វាស៊ី និងភាសាអង់គ្លេសថា៖ «បើអ្នកសាបព្រោះខ្យល់ អ្នកនឹងប្រមូលផលជាខ្យល់ព្យុះ»។

នេះគឺជាសុភាសិតដែលមានអត្ថន័យជ្រាលជ្រៅ! សាបព្រោះខ្យល់ គឺសំដៅលើការចាប់ផ្ដើមធ្វើអំពើមិនល្អ ឬការបង្កជម្លោះតូចតាច ចំណែកប្រមូលផលជាខ្យល់ព្យុះ គឺសំដៅលើការទទួលបានលទ្ធផលតបស្នងមកវិញយ៉ាងធ្ងន់ធ្ងរ ឬមហន្តរាយដែលមិនអាចគ្រប់គ្រងបាន។

ដូច្នេះក្នុងបរិបទនេះ អ៊ីរ៉ង់ចង់ព្រមានសហរដ្ឋអាមេរិកថា ប្រសិនបើលោក ដូណាល់ ត្រាំ ចាប់ផ្ដើមវាយប្រហារយោធាបន្តិចបន្តួចលើពួកគេ នោះអាមេរិកនឹងត្រូវទទួលរងនូវការវាយបកវិញយ៉ាងសាហាវឃោរឃៅបំផុត។

គំនូរព្រមាននេះ ត្រូវបង្ហាញបន្ទាប់ពីប្រធានាធិបតីអាមេរិក ដូណាល់ ត្រាំ ថ្លែងកាលពីថ្ងៃអង្គារ​ទី​២០​ខែ​មករា​ឆ្នាំ​២០២៦​​ថា អ៊ីរ៉ង់នឹងត្រូវ «បំផ្ទុះខ្ទេចជា​ផេះ» រលាយ​បាត់​ចេញ​ពី​ផែនដី បើមេដឹកនាំ​ខ្លួន​ហ៊ាន​អនុវត្ត​គម្រោង​ធ្វើឃាតលើរូបលោក។

ក្នុង​បទ​សម្ភាសន៍​ជាមួយ​សារព័ត៌មាន NewsNation លោកត្រាំ ប្រាប់​ថា «ពួកគេមិនគួរធ្វើបែបនោះទេ» ហើយលោកដាក់បញ្ជារួចហើយក្នុងការវាយបក បើមានការវាយប្រហារណាមួយ​បង្ក​ឡើង​ដោយ​អ៊ីរ៉ង់។

ការលើកឡើងនោះទៀតសោត ធ្វើឡើងចំពេលមានការតវ៉ាប្រឆាំងរដ្ឋាភិបាលជាច្រើនសប្តាហ៍នៅក្នុងប្រទេសអ៊ីរ៉ង់ ដែលបណ្តាល​ឲ្យ​មនុស្សរាប់ពាន់នាក់ស្លាប់ ហើយលោកត្រាំ ព្រមានថា សកម្មភាពយោធារបស់​អាមេរិកនៅតែជាជម្រើស ក្នុង​ករណី​ការប្រហារជីវិត​ក្នុង​ប្រទេស​អ៊ីរ៉ង់​នៅតែបន្ត៕

អត្ថបទ៖ សុខ សុវណ្ណ