អ្នកជំនាញបញ្ជាក់អំពីការចម្លងកូវីដ-១៩ តាមរយៈការប៉ះពាល់សម្ភារៈ​ដែល​​មានវីរុសតោងជាប់

ប្រភពពី LIVESCIENCE បានឱ្យដឹងថា វីរុសកូវីដ-១៩ អាចលាក់ខ្លួននៅលើសម្ភារប្រើប្រាស់ និងផ្ទៃផ្សេងទៀត​រាប់ម៉ោងរហូតច្រើនថ្ងៃ តែវាមិនបង្កហានិភ័យចម្លងគួរឱ្យបារម្ភនោះទេ។

ស្របពេលគ្នានេះដែរ មជ្ឈមណ្ឌលគ្រប់គ្រងនិងបង្ការជំងឺឆ្លងអាមេរិក (CDC) បានធ្វើបច្ចុប្បន្នភាពបញ្ជាក់បន្ថែមថា វីរុសកូវីដ-១៩ កម្រចម្លងតាមរយៈការប៉ះពាល់ផ្ទៃវត្ថុ ឬសូម្បីតែតាមរយៈម្ហូបអាហារក៏ដោយ​​ ក៏វាមិនងាយកើតឡើងស្រួលៗឡើយ។

​ថ្វីត្បិតការសិក្សាដំបូងៗបានណែនាំអំពីការរស់នៅរបស់វីរុសលើដែក​ ឈើ ប្លាស្ទិក សម្លៀកបំពាក់ ក្រដាសប្រាក់ ទូរសព្ទ និងសម្ភារជាច្រើនទៀតដែលយើងប្រើប្រចាំថ្ងៃក៏ពិតមែន ប៉ុន្តែមកទល់នឹងបច្ចុប្បន្ន កូវីដ-១៩ ត្រឹមអាចទុំជាប់ប៉ុណ្ណោះ រីឯសមត្ថភាពចម្លងគឺមានទាបណាស់។

ទោះបីជាយ៉ាងណា អ្នកជំនាញមិនបានលើកទឹកចិត្តឱ្យគ្រប់គ្នាធ្វេសប្រហែស ឬមើលស្រាលនោះទេ ព្រោះវាអាចទៅរួចនៅពេលយើងយកដៃទៅប៉ះពាល់ផ្ទៃមានវីរុសតោងជាប់ ហើយយកមកប៉ះមាត់ ច្រមុះ ឬភ្នែក។

ចំណែកអង្គការសុខភាពពិភពលោក បានរំឭកឲ្យដឹងថា វីរុសកូវីដ-១៩ មានការរាលដាលពីមនុស្សម្នាក់ទៅមនុស្សម្នាក់ទៀតតាមរយៈដំណក់ទឹកដែលសាយភាយពីមាត់នៅពេលកណ្ដាស់ ក្អក ឬនិយាយ និងតាមរយៈខ្យល់ដង្ហើមតូចៗដែលចេញពីច្រមុះ។

ដើម្បីធានាសុវត្ថិភាពខ្ពស់មានតែប្រកាន់ឱ្យនូវការសម្អាតសម្ភារប្រើប្រាស់ជាប្រចាំ បាញ់ឬជូតសម្អាតផ្ទៃដែលឧស្សាហ៍ប៉ះពាល់ និងលាងដៃជាមួយសាប៊ូនិងទឹក ឬប្រើទឹកអាល់កុល ពាក់ម៉ាស​ ព្រមទាំងរក្សាគម្លាតសង្គម កុំបីអាក់ខាន៕

ប្រែសម្រួល៖ សន្យា

ចុចអាន៖ ក្រុមអ្នកជំនាញបញ្ជាក់ច្បាស់ៗថា កូវីដមិនឆ្លងតាមរយៈអាហារដែលយើងហូបឡើយ

ចុចអាន៖ អ្នកវិទ្យាសាស្ត្ររកឃើញ វីរុសកូវីដ-១៩ រស់នៅលើគ្រែនិងផ្ទៃផ្សេងទៀតក្បែរអ្នកជំងឺបានច្រើនម៉ោង

ចុចអាន៖ ការពារខ្លួន! កូវីដអាចរស់នៅក្នុងទូទឹកកករហូត១ខែ និងលោហៈធាតុផ្សេងទៀតរាប់ថ្ងៃឯណោះ