អ្នកវិទ្យាសាស្ត្ររកឃើញ វីរុសកូវីដ-១៩ រស់នៅលើគ្រែនិងផ្ទៃផ្សេងទៀតក្បែរអ្នកជំងឺបានច្រើនម៉ោង

វីរុសកូវីដ-១៩អាចរស់បាននៅលើគ្រែ ឥដ្ឋ និងផ្ទៃផ្សេងទៀតនៅក្បែរអ្នកជំងឺបានច្រើនម៉ោង តែមិនបង្កហានិភ័យឆ្លងខ្លាំងឡើយ។ នេះបើតាមការស្រាវជ្រាវថ្មីមួយបានរកឃើញ។

អ្នកស្រាវជ្រាវនៅសាលាវេជ្ជសាស្ត្រនៃសាកលវិទ្យាល័យកាលីហ្វ័រញ៉ា សហរដ្ឋអាមេរិក បានសិក្សាលើផ្ទៃផ្សេងៗជុំវិញបន្ទប់អ្នកជំងឺកូវីដ-១៩ នៅមុនពេល អំឡុងពេល និងក្រោយពេលពួកគេតេស្តវិជ្ជមានវីរុសនេះ។

លទ្ធផលរកឃើញថា គ្មានបុគ្គលិកថែទាំសុខភាពណាម្នាក់បានធ្វើតេស្តវិជ្ជមានកូវីដ-១៩នោះទេ ទោះបីជាមានការប៉ះផ្ទៃមុខញឹកញាប់ក៏ដោយ ដោយសារការបញ្ជូនវីរុសលើផ្ទៃនានាកើតមានកម្រ ហើយដោយសារក្រុមគ្រូពេទ្យពាក់ឧបករណ៍ការពារផ្ទាល់ខ្លួនផង។

នៅដំណាក់កាលដំបូងនៃការរាតត្បាត អ្នកជំនាញផ្នែកសុខភាពសាធារណៈបានព្រមានសាធារណជនឱ្យប្រយ័ត្នប្រយែងចំពោះការឆ្លងបណ្ដាលមកពីផ្ទៃផ្សេងៗដែលមេរោគអាចទុំជាប់ដូចជា លើទ្វារ តុ កៅអី និងរបស់របរដទៃទៀត។

ប៉ុន្តែមកទល់ឥឡូវនេះ អ្នកជំនាញបានរកឃើញថា ការបញ្ជូនវីរុសតាមផ្ទៃវត្ថុគឺជាករណីដ៏កម្រមួយសម្រាប់វីរុសកូវីដ-១៩។

ផ្ទុយទៅវិញ វីរុសកូវីដ-១៩អាចឆ្លងរាលដាលខ្លាំងក្នុងខ្យល់តាមរយៈភាគល្អិតដែលបានបញ្ចេញនៅពេលអ្នកផ្ទុកជំងឺនិយាយ កណ្តាស់ ឬក្អក ព្រោះថាបំណែកតូចៗទាំងនោះអាចធ្វើឱ្យសាយភាយបានឆ្ងាយ។ ចំណែកការបញ្ជូនរោគតាមវត្ថុនានាគឺកម្រកើតមានបំផុត៕

ប្រែសម្រួល៖ សន្យា

ប្រភព៖ Mail Daily

ចុចអាន៖ អ្នកវិទ្យាសាស្រ្តបញ្ជាក់ហេតុផលធំមួយ ដែលជំរុញឲ្យកូវីដរាតត្បាតយ៉ាងឆាប់រហ័ស

ចុចអាន៖ ពិសេសណាស់! វ៉ាក់សាំងចាក់តែមួយដូស Johnson & Johnson អះអាងថា មានប្រសិទ្ធភាពការពារកូវីដបំប្លែងខ្លួនច្រើនប្រភេទ