រុស្ស៊ី ឡើងថតឈុតឆាកខ្សែភាពយន្តផ្ទាល់ៗនៅទីអវកាស

តារាសម្តែងជនជាតិរុស្សីម្នាក់ និងអ្នកដឹកនាំរឿងម្នាក់កំពុងស្ថិតនៅឯស្ថានីយ៍អវកាសអន្តរជាតិ (ISS) ក្នុងបេសកកម្មថតឈុតឆាកខ្សែភាពយន្តលើកដំបូងដែលថតនៅទីអវកាស ។

គម្រោងនេះគឺជាគំនិតរបស់ទីភ្នាក់ងារអវកាសរុស្ស៊ី Roscosmos និងស្ថានីយ៍ទូរទស្សន៍រុស្ស៊ី (RTS) ខណៈការថតនៅលើស្ថានីយ៍អវកាសអន្តរជាតិ (ISS) ត្រូវបានគ្រោងទុករយៈពេល ១២ ថ្ងៃ ។

យាន Soyuz MS-19 បានហោះចេញពីទីអវកាស Baikonur Cosmodrome ប្រទេសកាហ្សាក់ស្ថានកាលពីថ្ងៃអង្គារ ។ នៅលើយន្តហោះមានតារាសម្តែងស្រី Yulia Peresild អ្នកដឹកនាំរឿង Klim Shipenko និងមគ្គុទេសក៍អវកាសយានិកជើងចាស់របស់ពួកគេ ។

នៅក្នុងខ្សែភាពយន្តនោះតួឯកស្រី Peresild ដែលដើរតួជាគ្រូពេទ្យវះកាត់ម្នាក់គឺប្រញាប់ទៅស្ថានីយអវកាសដើម្បីជួយសង្គ្រោះសមាជិកនាវិក ។

ថ្លែងទៅកាន់អ្នកយកព័ត៌មានកាលពីថ្ងៃចន្ទ មុនពេលការហោះហើរទៅទីអវកាស តួឯកស្រី Peresild បាននិយាយថា ការហ្វឹកហាត់យ៉ាងម៉ត់ចត់ដែលនាងទទួលបាន គឺជាបញ្ហាប្រឈមទាំងផ្លូវចិត្ត និងរាងកាយ ប៉ុន្តែនាងកំពុងរង់ចាំការថតរឿងនេះ ។

គួរបញ្ជាក់ថា គម្រោងថតរឿងរបស់រុស្ស៊ីកើតឡើង មុនផែនការស្រដៀងគ្នារបស់អាមេរិកដែលពាក់ព័ន្ធនឹងតារាសម្តែង Tom Cruise ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ជោគជ័យបាញ់មីស៊ីលល្បឿនលឿនជាងសំឡេងចេញពីនាវាមុជទឹក ដើរដោយថាមពលនុយក្លេអ៊ែរ