​​ហេតុអ្វី ត្រាំ ចេញមុខ​គាំទ្រនាយករដ្ឋមន្ត្រី អាមេនី ចំពេល រុស្ស៊ី​កំពុងខឹងសម្បារខ្លាំង?

ការប្រជែងឥទ្ធិពលគ្នាយ៉ាងស្រួចស្រាវរវាងមហាអំណាចអាមេរិក និងរុស្ស៊ី​នៅ​លើ​ឆាក​នយោបាយ​អាមេនី​​ជា​ប្រទេស​តូច​មួយ​ស្ថិតនៅ​តំបន់​កូកាស​ខាងត្បូង បានផ្ទុះឡើងយ៉ាងក្តៅគគុក បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសគាំទ្រយ៉ាងពេញទំហឹង ដល់នាយករដ្ឋមន្ត្រីអាមេនី លោក នីកុល ផាស៊ីនីយ៉ាន (Nikol Pashinyan)  សម្រាប់ការបោះឆ្នោតសភានៅថ្ងៃទី៧ ខែមិថុនា ខាងមុខ។

ការចេញមុខ​គាំទ្រ​ជាចំហ​របស់លោក ត្រាំ នាពេលនេះ​​ បន្ទាប់ពីទីក្រុងមូស្គូបានគំរាមកាត់ផ្តាច់ការផ្គត់ផ្គង់ប្រេង ឧស្ម័ន និងត្បូងពេជ្រ​ធម្មជាតិ​តម្លៃថោក ដោយឯកតោភាគី ប្រសិនបើ​ប្រមុខ​ដឹកនាំ​​អាមេនី នៅតែបន្តដំណើរការចូលជាសមាជិកសហភាពអឺរ៉ុប (EU)។ នេះបើយោងតាមការចុះផ្សាយរបស់​ AFP កាលពីថ្ងៃ ទី២៨ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កត្តាសំខាន់ដែលរុញច្រានឲ្យលោក ត្រាំ លូកដៃកាងមេដឹកនាំអាមេនី គឺដើម្បីការពារគម្រោងច្រករបៀងដឹកជញ្ជូនថាមពល​ថ្មីមួយ ដែលត្រូវបានប្រសិទ្ធនាមថា «ផ្លូវត្រាំសន្តិភាព និងវិបុលភាពអន្តរជាតិ» ឬហៅកាត់ថា TRIPP ដែលរត់កាត់ទឹកដីអាមេនី តភ្ជាប់ប្រទេសអាស៊ែបៃហ្សង់ ទៅកាន់តំបន់ ណាកជីហ្វាន (Nakhchivan) ។

គម្រោងយុទ្ធសាស្ត្រដែលសម្របសម្រួលដោយអាមេរិកមួយនេះ គឺជាសរសៃឈាមសេដ្ឋកិច្ចថ្មី ជួយបើកផ្លូវឲ្យក្រុមហ៊ុនថាមពលយក្សរបស់អាមេរិក អាចចូលទៅគ្រប់គ្រង និងទាញយកប្រភពប្រេងនិងឧស្ម័នដ៏មហាសាល ចាប់តាំងពីតំបន់អាស៊ីកណ្តាល រហូតមកដល់អាមេរិក។ ការជួយឲ្យលោក ផាស៊ីនីយ៉ាន ឈ្នះឆ្នោត គឺដើម្បីធានាថា គម្រោងថាមពលដ៏ធំមួយនេះនឹងមិនត្រូវរអាក់រអួលដោយសារឥទ្ធិពលរបស់រុស្ស៊ីឡើយ។

ក្រៅពីផលប្រយោជន៍សេដ្ឋកិច្ច វ៉ាស៊ីនតោនក៏បានប្រើប្រាស់​មធ្យោបាយ​«ការទូតរហ័ស​» ដោយបញ្ជូនរដ្ឋមន្ត្រីការបរទេស លោក ម៉ាកូ រូប៊ីយ៉ូ ឲ្យទៅបំពេញទស្សនកិច្ចនៅរដ្ឋធានីយេរេវ៉ាន់ និងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រភ្លាមៗ ដើម្បីធានាសន្តិសុខ និងសេដ្ឋកិច្ចជំនួសតំណែងរុស្ស៊ី។

វត្តមានរបស់លោក រូប៊ីយ៉ូ និងការបញ្ជាក់របស់លោក ត្រាំ លើបណ្តាញសង្គម Truth Social បានបង្ហាញថា វ៉ាស៊ីនតោនកំពុងដេញថ្លៃយ៉ាងខ្លាំងក្លាដើម្បីជំនួសតំណែងរបស់ម៉ូស្គូ ក្នុងនាមជាអ្នកធានាសន្តិសុខ និងជាដៃគូសេដ្ឋកិច្ចឈានមុខគេរបស់អាមេនី ដោយទាញយកផលចំណេញពីភាពរកាំរកូសរវាងអាមេនី និងរុស្ស៊ី ដែលបានកើតឡើងតាំងពីវិបត្តិរុស្ស៊ីខកខានមិនបានជួយការពារអាមេនី ក្នុងការវាយលុកយោធារបស់អាស៊ែបៃហ្សង់នៅតំបន់ ការ៉ាបាក់ (Karabakh) កាលពីឆ្នាំ២០២៣។

យ៉ាងណាមិញ ចំណាត់ការចុងក្រោយរបស់អាមេរិក បានធ្វើឲ្យការបោះឆ្នោតនៅអាមេនីនាខែមិថុនាខាងមុខ ក្លាយជាសមរភូមិភូមិសាស្ត្រនយោបាយដ៏ចំហរវាងមហាអំណាចទាំងពីរ ខណៈដែលអាមេនីព្យាយាមកាត់ផ្តាច់ខ្លួនពីទីក្រុងម៉ូស្គូ ដើម្បីងាកទៅរកកិច្ចព្រមព្រៀងសន្តិភាព និងវិបុលភាព ក្រោមការជ្រោមជ្រែងពីអាមេរិក៕

អត្ថបទ ៖ សាង ស្រីល័ក្ខ

លោក ត្រាំ ចេញមុខគាំទ្រប្រមុខរដ្ឋាភិបាល អាមេនី ខណៈរុស្ស៊ី​ព្រមាន​កាត់ផ្តាច់​ផ្គត់ផ្គង់ថាមពល​