ថៃ ប្រយ័ត្នខ្លាំង បន្ទាប់ពីស្រ្តីចិនម្នាក់ ស្លាប់ដោយសារជំងឺផ្តាសាយបក្សី (មានវីដេអូ)

ស្របពេលដែលមនុស្សគ្រប់គ្នាកំពុងភ័យខ្លាចអំពីជំងឺកូវីដ១៩ និងវីរុសបំប្លែងខ្លួន Omicron, នាយកដ្ឋានអភិវឌ្ឍន៍បសុសត្វ កំពុងមានការប្រុងប្រយ័ត្នខ្ពស់ បន្ទាប់ពីស្ត្រីម្នាក់ស្លាប់ដោយសារជំងឺផ្តាសាយបក្សីកាលពីខែមុន។

ស្ត្រីរូបនេះបានស្លាប់នៅក្នុងប្រទេសចិន ដោយសារជំងឺគ្រុនផ្តាសាយបក្សី H5N6 ហើយក្រុមមន្ត្រីនៅក្នុងប្រទេសថៃ កំពុងព្យាយាមធ្វើឲ្យប្រាកដថា មេរោគនេះមិនឆ្លងឆ្លងព្រំដែនចូលប្រទេសថៃទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេញមួយឆ្នាំនេះ ជំងឺគ្រុនផ្តាសាយបក្សីកំពុងកើនឡើងយ៉ាងខ្លាំង ខណៈអង្គការសុខភាពសត្វពិភពលោកបាននិយាយថា មនុស្សចំនួន៦១នាក់បានឆ្លងជំងឺនៅឆ្នាំនេះ។ នៅក្នុងខេត្ត Sichuan ប្រទេសចិន ស្ត្រីអាយុ៥៤ឆ្នាំម្នាក់ បានឆ្លងមេរោគនេះ ហើយស្លាប់កាលពីថ្ងៃទី២៣ខែវិច្ឆិកា។

ថ្វីបើបច្ចុប្បន្នប្រទេសថៃមានសុវត្ថិភាពពីមេរោគនេះក៏ដោយ ប៉ុន្តែនាយកដ្ឋានបសុសត្វ កំពុងរឹតបន្តឹងការនាំចូល និងនាំចេញសត្វពីប្រទេសណាមួយដែលមានការឆ្លងជំងឺផ្តាសាយបក្សី ដើម្បីការពារកុំឲ្យមានករណីឆ្លងនៅក្នុងប្រទេសថៃ។

អគ្គនាយកនៃនាយកដ្ឋានបានរាយការណ៍ថា មិនមានករណីលើមនុស្ស ឬសត្វណាមួយនៅក្នុងប្រទេសថៃទេ។ យ៉ាង​ណា​ក៏​ដោយ ក្រុមមន្ត្រី​ត្រូវ​បាន​ព្រមាន​ឲ្យចាត់​វិធានការ​បង្ការ និង​តាម​ដាន​ការ​ចិញ្ចឹម​សត្វ​របស់​ខ្លួន ជា​ពិសេស​តាម​ខេត្ត និង​តាម​បណ្តោយ​ព្រំដែន​អន្តរជាតិ។

នាយកដ្ឋាន ក៏ស្នើឲ្យពលរដ្ឋរក្សាការប្រុងប្រយ័ត្នផងដែរ ជាពិសេសលើសត្វទាំងអស់ និងសុខភាពរបស់ពួកគេ ដើម្បីរកមើលជំងឺផ្តាសាយបក្សីដែលអាចកើតមាន។ អគ្គនាយកបានស្នើឲ្យអ្នកដែលសម្គាល់ឃើញរោគសញ្ញាមិនប្រក្រតីណាមួយនៅលើសត្វរបស់ពួកគេ ឬការស្លាប់ខុសពីធម្មតា ត្រូវទាក់ទងអាជ្ញាធរជាបន្ទាន់ដើម្បីឲ្យពួកគេផ្តល់ជំនួយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Thaiger

ចុចអាន៖ ជប៉ុន សម្លាប់មាន់ជាង ១០ម៉ឺនក្បាល បន្ទាប់ពីផ្ទុះជំងឺផ្តាសាយបក្សី