តាំងពីព្រឹក មកដល់ម៉ោងនេះ ស្ថានការណ៍នៅ អ៊ុយក្រែន យ៉ាងណាហើយ?

ក្រោយពេល ​លោកប្រធានាធិបតី វ្ល៉ាឌីមៀរ ពូទីន បញ្ជាទ័ពឱ្យវាយប្រហារ​អ៊ុយក្រែន កាលពីថ្ងៃព្រហស្បតិ៍ ទី២៤ ខែកុម្ភៈ ម្សិលមិញ នាថ្ងៃសុក្រនេះ ស្ថានភាពប្រទេស អ៊ុយក្រែន កាន់តែតានតឹងថែមមួយកម្រិតទៀត ខណៈប្រទេសនេះក៏ត្រូវបានប្រកាសដាក់ក្នុងភាពអាសន្នផងដែរ។

ខាងក្រោមជាហេតុការណ៍សំខាន់ៗ ដែលកើតឡើងនៅថ្ងៃនេះ៖

– នាព្រឹកព្រលឹមប្រហែលម៉ោង ៤ឬ៥ ទៀបភ្លឺ នៅថ្ងៃសុក្រនេះ យន្តហោះរុស្ស៊ី ត្រូវបានបាញ់ទម្លាក់ដោយកងកម្លាំងអ៊ុយក្រែន ពីលើទីក្រុងគៀវ ដែលបណ្តាលឲ្យកម្ទេចកម្ទីយន្តហោះធ្លាក់មកលើអគារផ្ទះល្វែង និងឆាបឆេះ ខណៈការបាញ់នេះកើតចេញពីប្រព័ន្ធការពារដែនអាកាសរបស់អ៊ុយក្រែនទៅលើយន្តហោះរុស្ស៊ី។

-នាថ្ងៃដដែលនេះ រថយន្តយោធាអ៊ុយក្រែនចំនួន ៤១គ្រឿង រថក្រោះ និងរថពាសដែកប្រយុទ្ធ ១៨គ្រឿង ប្រព័ន្ធរ៉ុកកែត ៧គ្រឿង និងទូកប្រយុទ្ធចំនួន ៥គ្រឿងត្រូវបានបំផ្លាញដោយកងកម្លាំងរុស្ស៊ី។ យោងតាមប្រភពពី Sputnik។

-ក្រោយរុស្ស៊ីនិងអ៊ុយក្រែនដណ្ដើមគ្នាគ្រប់គ្រងតំបន់នៃរោងចក្រថាមពលនុយក្លេអ៊ែរ Chernobyl ពេលនេះរុស្ស៊ីបានកាន់កាប់តំបន់នេះហើយ ដែលវាមានទីតាំងប្រហែល ១៣០គីឡូម៉ែត្រ ​ពីរដ្ឋធានីគៀវ របស់អ៊ុយក្រែន។ មិនតែប៉ុណ្ណោះ កងទ័ព​របស់​រុ​ស្សី​ ​បាន​ចាប់​បុគ្គលិក​បម្រើ​ការ​នៅ​ទីនោះ​ធ្វើ​ជា​ចំណាប់ខ្មាំងទៀតផង​។ នេះ​បើ​យោង​តាម​ការ​បញ្ជាក់​របស់​មន្ត្រី​អ៊ុយ​ក្រែ​ន​។

ប្រភពពីសារព័ត៌មាន BBC បានឱ្យដឹងថា ការគ្រប់គ្រងទីក្រុង Chernobyl ​​ភាគ​ខាងលិច​រដ្ឋធានី​ គៀវ ​អាច​ផ្តល់​ផ្លូវ​ចូល​ក្នុង​ទីក្រុង​សម្រាប់​កងទ័ព​​របស់​រុ​ស្ស៊ីយ៉ាងងាយស្រួល។

-នៅរសៀលនេះ ប្រភពពី Business Insider បានចុះផ្សាយថា កងកម្លាំងរុស្ស៊ី និងអ៊ុយក្រែនបានប្រឈមមុខដាក់គ្នាអស់ជាច្រើនម៉ោងនៅអាកាសយានដ្ឋាន នៅជាយក្រុងគៀវ រដ្ឋធានីអ៊ុយក្រែន ដែលមានទីតាំងនៅចម្ងាយប្រហែល ១០គីឡូម៉ែត្រប៉ុណ្ណោះ ពីរដ្ឋធានីគៀវ។

-ដោយឡែក នៅល្ងាចថ្ងៃសុក្រនេះ ប្រធានាធិបតីអ៊ុយក្រែនលោក Zelensky បានអំពាវនាវឱ្យ ពូទីន ចូលតុដើម្បីចរចាគ្នា។ នេះបើតាមសារវីដេអូថ្មីមួយ ដែលបានបង្ហោះនៅលើហ្វេសប៊ុក លោក Zelensky។ ក្រោយលើកសំណើនេះឡើង ​ប្រធានាធិបតីរុស្ស៊ី លោក វ្ល៉ាឌីមៀរ ពូទីន ត្រៀមបញ្ជូនគណៈប្រតិភូទៅទីក្រុង Minsk ដើម្បីចចារផងដែរ។

-រយៈពេលតែ ២ថ្ងៃនៃការបាញ់ប្រហារ មកទល់នឹងម៉ោងនេះ មនុស្សយ៉ាងហោចណាស់ ១សែននាក់ បានភៀសខ្លួនចេញពី ប្រទេសអ៊ុយក្រែន ចូលទៅក្នុងប្រទេសជិតខាង។ នេះបានយោងតាមរបាយការណ៍ពី UN៕

អត្ថបទ៖ សន្យា

ចុចអាន៖ រឿង​សំខាន់​​ៗ​​ត្រូវ​​ដឹង​​ពី​បច្ចុប្បន្នភាព​​​​សង្គ្រាម​​នៅ​អ៊ុយក្រែន