ជប៉ុនបង្កើនការការពារពីការគំរាមរបស់ចិន និងកូរ៉េខាងជើង

នាយករដ្ឋមន្រ្តីជប៉ុនលោក Yoshihide Suga បានផ្តល់សញ្ញាដល់ប្រទេសកូរ៉េខាងជើង និងប្រទេសចិនថា លោកនឹងជួយពង្រឹងវិស័យយោធារបស់ជប៉ុនដើម្បីប្រឆាំងនឹងការគំរាមកំហែងនានាដែលពួកគេបានធ្វើដល់ប្រទេសនេះដោយផ្តល់ប្រាក់ប្រមាណ ៥ ពាន់លានដុល្លារសម្រាប់ការស្ទាក់ចាប់មីស៊ីលនៅតាមសមុទ្រ និងមីស៊ីលថ្មីប្រឆាំងនាវា ។

គណៈរដ្ឋមន្រ្តីរបស់លោកនៅថ្ងៃសុក្រនេះបានអនុញ្ញាតឲ្យចំណាយប្រាក់ដើម្បីបន្ថែមនាវាពិឃាតបំពាក់ដោយប្រព័ន្ធរ៉ាដា Aegis ចំនួនពីរគ្រឿងដល់កងនាវារបស់ជប៉ុនដោយធ្វើឲ្យកងនាវានេះកើនដល់ ១០ គ្រឿង និងធ្វើឲ្យវាធំជាងគេនៅពីក្រោយកងទ័ពជើងទឹកសហរដ្ឋអាមេរិក ។ ពួកគេក៏នឹងអភិវឌ្ឍមីស៊ីលបាញ់ចេញពីនាវារយៈចម្ងាយឆ្ងាយដែលអាចទប់ទល់នឹងការគំរាមកំហែងនៅតាមសមុទ្រ និងប្រឆាំងនាវាចម្បាំងមកពីចិនដែលបានចុះចតនៅជិតកោះសមុទ្រចិនខាងកើតដែលគ្មានមនុស្សរស់នៅ និងអះអាងទាមទារដោយប្រជាជាតិទាំងពីរនេះ ។

លោក Katsunobu Kato លេខាធិការខុទ្ទកាល័យបានប្រាប់សន្និសីទកាសែតមួយថា “ជប៉ុននឹងពង្រឹងសមត្ថភាពការពារខ្លួនពីការគំរាមកំហែងពីខាងក្រៅដើម្បីធានាសុវត្ថិភាពដល់បុគ្គលិកកងកម្លាំងស្វ័យការពារ” ។

កាសែត Nikkei បានរាយការណ៍ថាមិនមានចំនួនទឹកប្រាក់ត្រូវបានផ្តល់ឲ្យសម្រាប់ការចំណាយសម្រាប់ប្រព័ន្ធការពារមីស៊ីលផ្លោងថ្មីនៅក្នុងផែនការថវិកាឆ្នាំសារពើពន្ធបន្ទាប់ទេ ប៉ុន្តែការចំណាយសម្រាប់នាវាពិឃាតនេះមានចំនួនជិត ៥ ពាន់លានដុល្លារ ។ ចំណែកទីភ្នាក់ងារសារព័ត៌មានក្យូដូបានរាយការណ៍ថា ការចំណាយលើការអភិវឌ្ឍមីស៊ីលថ្មីនេះត្រូវបានគេប៉ាន់ស្មានថាមានចំនួន ៣៣.៥ ពាន់លានយ៉េន (៣២៤ លានដុល្លារ) ។

ថវិកានេះមិនរាប់បញ្ចូលការចំណាយសម្រាប់ផែនការដែលត្រូវបានរៀបចំឡើងក្រោមការដឹកនាំរបស់លោក Shinzo Abe នោះទេដើម្បីអភិវឌ្ឍប្រព័ន្ធមីស៊ីលដែលអនុញ្ញាតឲ្យប្រទេសនេះវាយប្រហាររ៉ុកកែតរបស់សត្រូវ មុនពេលពួកគេបាញ់ចេញពីជើងទម្រដោយមើលឃើញថានេះជាវិធានការការពារ ។

ប្រទេសជប៉ុនចាត់ទុកប្រព័ន្ធ Aegis មកពីក្រុមហ៊ុន Lockheed Martin Corp ជាការការពារមួយពីការគំរាមកំហែងនៃមីស៊ីលដែលកំពុងកើនឡើងរបស់ចិន និងកូរ៉េខាងជើង ។ កាលពីខែមិថុនាលោក Taro Kono រដ្ឋមន្រ្តីក្រសួងការពារជាតិបានប្រកាសដាក់ពង្រាយប្រព័ន្ធការពារមីស៊ីល Aegis Ashore ដែលមានតម្លៃប្រមាណ ៥ ពាន់លានដុល្លារ ប៉ុន្តែក្រោយមកត្រូវលុបចោលដោយសារបញ្ហាការចំណាយ និងសុវត្ថិភាព ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg