មន្ត្រីជាន់ខ្ពស់ ឆ្មាំបដិវត្តន៍អ៊ីរ៉ង់ ត្រូវគេបាញ់សម្លាប់ ក្នុងរថយន្ត ខាងក្រៅផ្ទះ

កាលពីថ្ងៃអាទិត្យទី២២ខែឧសភា មន្ត្រីជាន់ខ្ពស់ម្នាក់នៃឆ្មាំបដិវត្តន៍ដ៏មានឥទ្ធិពលរបស់ប្រទេសអ៊ីរ៉ង់ ត្រូវបានខ្មាន់កាំភ្លើងមិនស្គាល់អត្តសញ្ញាណ បាញ់សម្លាប់នៅក្នុងរថយន្ត ខាងក្រៅផ្ទះរបស់គាត់ក្នុងទីក្រុង តេហេរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្មាំបដិវត្តន៍អ៊ីរ៉ង់និយាយថា មន្ត្រីរបស់ខ្លួនម្នាក់គឺវរសេនីយ៍ឯក Hassan Sayyad Khodaei គឺជាជនរងគ្រោះនៃការធ្វើឃាតដ៏កម្រនេះ។

​យោងតាមឆ្មាំបដិវត្តន៍, អ្នក​វាយប្រហារ​២​នាក់​បាន​បាញ់៥គ្រាប់ ​សម្លាប់លោក Khodaei នៅខាងក្នុងរថយន្តម៉ាក Kia Pride ដែលផលិតនៅប្រទេសអ៊ីរ៉ង់​។

ទីភ្នាក់ងារសារព័ត៌មាន ISNA បានរាយការណ៍ថា សមាជិកនៃបណ្តាញសេវាស៊ើបការណ៍សម្ងាត់អ៊ីស្រាអែល ត្រូវបានរកឃើញ និងចាប់ខ្លួនដោយឆ្មាំបដិវត្តន៍។

ថ្វីបើឆ្មាំបដិវត្តន៍ បានផ្តល់ព័ត៌មានលម្អិតតិចតួចអំពីការវាយប្រហារក៏ដោយ ប៉ុន្តែក្រុមនេះបានស្តីបន្ទោសការសម្លាប់នេះលើភាពក្រអឺតក្រទមជាសកល ដែលពាក្យនេះជាទូទៅ អ៊ីរ៉ង់ប្រើដើម្បីសំដៅលើសហរដ្ឋអាមេរិក និងអ៊ីស្រាអែល។

មិនមានការអះអាងភ្លាមៗ ទទួលខុសត្រូវចំពោះការវាយប្រហារនេះទេ ហើយការិយាល័យនាយករដ្ឋមន្ត្រីអ៊ីស្រាអែល ក៏បដិសេធធ្វើអត្ថាធិប្បាយលើព្រឹត្តិការណ៍នៅទីក្រុងតេហេរ៉ង់​ ដែរ។

មានព័ត៌មានតិចតួចណាស់ ត្រូវបានបង្ហាញជាសាធារណៈអំពីលោក Khodaei ដោយសារតែមន្រ្តីឆ្នាំបដិវត្តន៍ តែងតែទៅបំពេញបេសកកម្មយោធាសម្ងាត់គាំទ្រក្រុម Hezbollah ដែលជាក្រុមសកម្មប្រយុទ្ធលីបង់ និងកងជីវពលផ្សេងទៀតនៅក្នុងប្រទេសស៊ីរី អ៊ីរ៉ាក់ និងកន្លែងផ្សេង៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ីស្រាអែល បង្កើតមូលដ្ឋានទ័ពសម្ងាត់តាមដានសកម្មភាពនុយក្លេអ៊ែររបស់ អ៊ីរ៉ង់