អ៊ីស្រាអែល បង្កើតមូលដ្ឋានទ័ពសម្ងាត់តាមដានសកម្មភាពនុយក្លេអ៊ែររបស់ អ៊ីរ៉ង់

គេហទំព័រព័ត៌មាន The Walla បានរាយការណ៍កាលពីថ្ងៃសៅរ៍ថា កងទ័ពអ៊ីស្រាអែលបានបង្កើតមូលដ្ឋានស៊ើបការណ៍សម្ងាត់ និងវិភាគ ដើម្បីតាមដានសកម្មភាពរបស់អ៊ីរ៉ង់ ជាពិសេសទាក់ទងនឹងកម្មវិធីនុយក្លេអ៊ែររបស់ខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេហទំព័រព័ត៌មានខាងលើបាននិយាយថា មូលដ្ឋានសម្ងាត់ដែលប្រមូលផ្តុំដោយមន្ត្រីស៊ើបការណ៍ និងអ្នកវិភាគអ៊ីស្រាអែល ត្រូវបានបើកដំណើរការក្នុងរយៈពេលប៉ុន្មានខែចុងក្រោយនេះ ដោយសារលទ្ធផលនៃការកែទម្រង់ប្រព័ន្ធស៊ើបការណ៍សម្ងាត់តាមបែបវិទ្យាសាស្ត្រ ។

មូលដ្ឋាននេះគឺមានមុខងារកំណត់ និងវិភាគសកម្មភាពលាក់កំបាំងរបស់ទីក្រុងតេអេរ៉ង់ ដែលត្រូវបានចោទថា មានបំណងលាក់បាំងកម្មវិធីនុយក្លេអ៊ែរ ។

ដោយដកស្រង់សម្តីពីមន្រ្តីកងទ័ពជាន់ខ្ពស់អ៊ីស្រាអែល គេហទំព័រ The Walla បានបន្ថែមថា អ៊ីស្រាអែលបានប្រមូលព័ត៌មានគ្រប់គ្រាន់អំពីកម្មវិធីនុយក្លេអ៊ែររបស់អ៊ីរ៉ង់ ហើយបានកត់សម្គាល់ថា បុគ្គលិកមូលដ្ឋាននោះប្រើបច្ចេកវិទ្យា AI និងបច្ចេកវិទ្យាចុងក្រោយបំផុតដើម្បីប្រមូល និងវិភាគទិន្នន័យ ។

ទន្ទឹមនោះ មូលដ្ឋាននេះក៏ដើរតួយ៉ាងសំខាន់ផងដែរក្នុងការកំណត់អត្តសញ្ញាណវត្តមានយោធាអ៊ីរ៉ង់នៅក្នុងប្រទេសស៊ីរី ក៏ដូចជាការវាយប្រហារប្រដាប់អាវុធគាំទ្រអ៊ីរ៉ង់នៅទីនោះជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ីស្រាអែល បង្កើតវិធីថ្មីប្រើបច្ចេកវិទ្យា AI សម្រាប់ព្យាបាលជំងឺមួយនេះ