ព័ត៌មានអន្ដរជាតិ

លោក Erdogan ថា អឺរ៉ុបកំពុងភ័យស្លន់ស្លោរឿងជនភៀសខ្លួន

បានផុស

៤ years មុន

នៅ

ថ្ងៃចន្ទ ៦ មិថុនា ២០២២

ដោយ

រដ្ឋជាសមាជិកនៃសហភាពអឺរ៉ុប និងបណ្តាប្រទេសអឺរ៉ុបផ្សេងទៀតកំពុងស្ថិតក្នុងស្ថានភាពភ័យស្លន់ស្លោជុំវិញលំហូរជនភៀសខ្លួនពីប្រទេសអ៊ុយក្រែន។ លោកប្រធានាធិបតីតួកគី Recep Tayyip Erdogan បានអះអាងកាលពីថ្ងៃអាទិត្យម្សិលមិញ។

លោកប្រធានាធិបតីតួកគី Recep Tayyip Erdogan

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅចំពោះមុខអ្នកគាំទ្ររបស់គណបក្សលោកនៅទីប្រជុំជន Kizilcahamam លោក Erdogan បានលើកឡើងថា ៖«ខណៈពេលតួកគីបានកំពុងគ្រប់គ្រងប្រកបដោយជោគជ័យចំពោះជនចំណាកស្រុកមិនទៀងទាត់ពីប្រទេសស៊ីរីរយៈពេល១១ឆ្នាំមក យើងកំពុងមើលឃើញការភ័យស្លន់ស្លោនៅអឺរ៉ុប ដោយសារតែវិបត្តិសង្គ្រាមអ៊ុយក្រែន-រុស្ស៊ី»។ ប្រមុខរដ្ឋតួកគីបានសម្តែងនូវសេចក្តីសង្ឃឹមថា ពិភពលោកនឹងចាកចេញពីដំណាក់កាលដ៏សំខាន់ដែលកំពុងឆ្លងឲ្យបានឆាប់រហ័សតាមដែលអាចទៅរួច។

យោងតាមរបាយការណ៍មួយរបស់លោក Amin Awad ជំនួយការអគ្គលេខាធិការអង្គការសហប្រជាជាតិ និងអ្នកសម្របសម្រួលវិបត្តិរបស់ UN ប្រចាំអ៊ុយក្រែនបង្ហាញកាលពីថ្ងៃសុក្រថា ចាប់តាំងពីរុស្ស៊ីធ្វើការវាយប្រហារអ៊ុយក្រែនកាលពីចុងខែកុម្ភៈមក ប្រជាជនអ៊ុយក្រែនជិត១៤លាននាក់បានធ្វើការផ្លាស់ទីលំនៅដ្ឋាន។ មនុស្ស៦លាននាក់ត្រូវបានគេជឿថា បានភៀសខ្លួនទៅប្រទេសជិតខាង។

រដ្ឋជាសមាជិកសហភាពអឺរ៉ុបដូចជា ប៉ូឡូញ រ៉ូម៉ានី និងហុងគ្រីជាដើមស្ថិតក្នុងចំណោមគោលដៅឈានមុខគេ។

ក្រៅពីបញ្ហាចំណាកស្រុកដែលបង្កឡើងដោយសង្គ្រាមនៅអ៊ុយក្រែន លោក Erdogan ក៏បានប៉ះពាល់ទៅនឹងការស្ន់សុំចូលជាសមាជិកអង្គការណាតូរបស់ប្រទេសស៊ុយអែត និងហ្វាំងឡង់ ដែលត្រូវបានដាក់ស្នើកាលពីពាក់កណ្តាលខែឧសភាដោយយោងទៅការគំរាមកំហែងពីរុស្ស៊ី។

លោកប្រធានាធិបតីតួកគីបានធ្វើការបញ្ជាក់យ៉ាងច្បាស់ថា ទីក្រុង Ankara នឹងរក្សារារាំងប្រទេសទាំងពីរនោះពីការចូលជាសមាជិកប្លុកយោធាណាតូ រហូតដល់តួកគីទទួលបាននូវអ្វីដែលរំពឹងទុក៕

ប្រែសម្រួល៖ វីរបុត្រ
ប្រភព៖ Reuters

Related Topics: