លោកនាយករដ្ឋមន្ត្រី ប្រាយុទ្ធ ចាន់អូចា បានប្តេជ្ញាថា រដ្ឋប្រហារឆ្នាំ២០១៤ ដែលផ្តួលរំលំរដ្ឋាភិបាលថៃ គឺជារដ្ឋប្រហារលើកចុងក្រោយរបស់គាត់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រី ប្រាយុទ្ធ បាននិយាយអំពីរឿងនេះ ខណៈការបោះឆ្នោតសកលខិតជិតមកដល់ ចំពេលមានការបញ្ជាក់របស់ឧបនាយករដ្ឋមន្ត្រី និងជាមេដឹកនាំគណបក្ស Palang Pracharath (PPRP) លោក Prawit Wongsuwon នៅលើ Facebook កាលពីថ្ងៃពុធទី០៩ខែមីនា។

លោក Prawit ដែលជាបេក្ខភាពនាយករដ្ឋមន្ត្រីរបស់គណបក្ស PPRP និងកាន់តំណែងជានាយករដ្ឋមន្ត្រីស្តីទីកាលពីឆ្នាំមុន បាននិយាយថា គាត់អាចជំរុញការបង្រួបបង្រួមជាតិ និងសម្របសម្រួលការអភិវឌ្ឍជាតិរវាងអ្នកនយោបាយ និងឥស្សរជនបានល្អជាងអ្នកដទៃ ដោយសារតែគាត់យល់ដឹង អំពីរចនាសម្ព័ន្ធអំណាចរបស់ប្រទេស។ លោក Prawit និយាយថា “ខ្ញុំ​​ដឹង​ហើយ​ថា អ្នក​​គាំទ្រ​រដ្ឋប្រហារ ​មិន​ដែល​មាន​នៅ​ក្នុង​រចនាសម្ព័ន្ធ​អំណាច​ឡើយ”។

ងាកមកលោក ប្រាយុទ្ធ វិញ, នាយករដ្ឋមន្ត្រីរូបនេះ បានឡើងកាន់អំណាចក្រោយរដ្ឋប្រហារ បន្ទាប់ពីបាតុកម្មប្រឆាំងរដ្ឋាភិបាលរយៈពេលច្រើនខែកាលពីថ្ងៃទី២២ខែឧសភាឆ្នាំ២០១៤។ គាត់បានផ្តួលរំលំរដ្ឋាភិបាលដឹកនាំដោយគណបក្សភឿថៃ និងបានគ្រប់គ្រងប្រទេស។ គាត់និយាយថា គាត់បានអានការបង្ហោះរបស់ Prawit ហើយ និងមិនឃើញមានកំហុសអ្វីនោះទេ។

នៅពេលសួរអំពីរដ្ឋប្រហារដែលបានលើកឡើងក្នុងការបង្ហោះនោះ លោកប្រាយុទ្ធអះអាងថា រដ្ឋប្រហារចុងក្រោយបានកើតឡើងតាំងពីយូរយារណាស់មកហើយ ហើយគាត់បានបញ្ជាក់ថា គាត់ជឿជាក់ថា នឹងមិនមានជម្លោះធ្ងន់ធ្ងរនៅក្នុងប្រទេសនោះទេ។

លោកប្រាយុទ្ធ គូសបញ្ជាក់ថា “ប្រទេសត្រូវតែមានសន្តិភាព ហើយប្រជាជនមានសេចក្តីសុខ កុំត្រលប់ទៅស្ថានភាពដដែលអី។ តើអ្នកណានឹងធ្វើរដ្ឋប្រហារ? ខ្ញុំ​បាន​និយាយ​ជា​យូរ​មក​ហើយ​ថា រដ្ឋ​ប្រហារ​ឆ្នាំ២០១៤ គឺជា​លើក​ចុង​ក្រោយ។ មិនត្រូវមានរដ្ឋប្រហារម្តងទៀតទេ តែវាក៏អាស្រ័យលើអ្នកគ្រប់គ្នាផងដែរ ដើម្បីជួយទប់ស្កាត់។ ប្រសិន​បើ​ជម្លោះ​ធ្ងន់ធ្ងរ​កើត​ឡើង​ម្តង​ទៀត ខ្ញុំ​មិន​ដឹង​ថា​ត្រូវ​ដោះ​ស្រាយ​យ៉ាង​ណា​ទេ ព្រោះឥឡូវនេះ ​មិន​មាន​អ្វីសោះ”។

គួរបញ្ជាក់ថា ថ្មីៗនេះ លោក ប្រាយុទ្ធ បានចាកចេញពីគណបក្ស PPRP ទៅចូលរួមជាមួយគណបក្ស United Thai Nation (UTN)។ គាត់នឹងឈរឈ្មោះជាបេក្ខជននាយករដ្ឋមន្ត្រី៕

ប្រែសម្រួល៖ Vann Vann

ប្រភព៖ Thaiger

ចុចអាន៖ លោក ប្រាយុទ្ធ ចូលជ្រកកោនជាមួយគណបក្សថ្មី ដើម្បីស្វែងរកអាណត្តិទី ២