រុស្ស៊ី ចេញដីកាចាប់ខ្លួននាយករដ្ឋមន្ត្រីប្រទេសជាសមាជិកណាតូ

តាមការចុះផ្សាយរបស់សារព័ត៌មាន TASS កាលពីថ្ងៃអង្គារទី១៣ខែកុម្ភៈ, អាជ្ញាធររុស្ស៊ី បានចាប់ផ្តើមសំណុំរឿងឧក្រិដ្ឋកម្ម ដោយចេញដីកាចាប់ខ្លួននាយករដ្ឋមន្ត្រីអេស្តូនី លោកស្រី Kaja Kallas និងរដ្ឋលេខាធិការលោក Taimar Peterkop ជុំវិញតួនាទីរបស់អ្នកទាំងពីរ ក្នុងការវាយកម្ទេចស្តូបអនុស្សាវរីយ៍សង្គ្រាមលោកលើកទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Kallas បានប្រកាសក្នុងឆ្នាំ២០២២ថា រដ្ឋាភិបាលអេស្តូនី បានសម្រេចចិត្តដកនិមិត្តសញ្ញាសូវៀតទាំងអស់ចេញពីទីសាធារណៈ ឲ្យបានឆាប់តាមដែលអាចធ្វើទៅបាន។ វិមានសូវៀតរាប់រយ ដែលនៅសេសសល់ក្នុងប្រទេសអេស្តូនី បានដាស់អារម្មណ៍ឲ្យនឹកឃើញដល់របួសជាប្រវត្តិសាស្ត្រ ជាពិសេសក្នុងបរិបទនៃសកម្មភាពរបស់រុស្ស៊ីនៅអ៊ុយក្រែន ដូច្នេះហើយស្តូបទាំងនោះត្រូវតែដកចេញ។

ក្នុងរយៈពេលប៉ុន្មានឆ្នាំថ្មីៗនេះ សមាជិកអង្គការណាតូគឺប្រទេសអេស្តូនី ក៏ដូចជាអ្នកជិតខាងឡាតវីនិងលីទុយអានី កាន់តែយល់ឃើញថា វិមានសង្រ្គាមសម័យសូវៀត គឺជានិមិត្តសញ្ញានៃអាណានិគម ជាពិសេសរឿងរ៉ាវកាន់តែក្តៅរោល ចាប់តាំងពីរុស្ស៊ីបើកការវាយលុកអ៊ុយក្រែន ក្នុងខែកុម្ភៈឆ្នាំ២០២២។

ទាក់ទិនបញ្ហានេះ អ្នកនាំពាក្យវិមានក្រឹមឡាំង លោក Dmitry Peskov បានចោទប្រកាន់រដ្ឋាភិបាលអេស្តូនី ថាកំពុងធ្វើសង្គ្រាមជាមួយប្រវត្តិសាស្ត្ររួម។ លោកនិយាយ​ថា​ “​ការ​កម្ទេច​វិមានទាំងនេះ ​គឺបង្ហាញពីកំហឹង ហើយ​មិន​ធ្វើ​ឲ្យ​ប្រទេស​ណាល្អប្រសើរទេ ​រួម​ទាំង​អេស្តូនី​ផងដែរ”។

ក្រោមការដឹកនាំរបស់លោកស្រី Kallas, ប្រទេសអេស្តូនី ត្រូវបានគេមើលឃើញកាន់តែច្បាស់ជាអ្នកគាំទ្រដ៏ស្មោះស្ម័គ្របំផុតរបស់អ៊ុយក្រែន ដោយកាលពីខែមុនបានសន្យាផ្តល់ជំនួយក្នុងទំហំទឹកប្រាក់១.៣ពាន់លានដុល្លារដល់ទីក្រុងកៀវ រហូតដល់ឆ្នាំ២០២៧។

ក្នុងខែមករាដដែលនោះ អេស្តូនី រួមជាមួយឡាតវីនិងលីទុយអានី បានបង្ហាញផែនការរួម បង្កើតខែលការពារនៅតាមព្រំដែនរៀងៗខ្លួនជាមួយរុស្ស៊ីនិងបេឡារុស ហើយជាផ្នែកមួយក្នុងសំណើនោះ រដ្ឋាភិបាលទីក្រុង Tallinn នឹងសាងសង់លេនដ្ឋានចំនួន៦០០កន្លែងទៀតផង។

សូមបញ្ជាក់ អេស្តូនី ឡាតវីនិងលីទុយអានី គឺស្ថិតនៅក្រោមការគ្រប់គ្រងរបស់ចក្រភពរុស្ស៊ីពេញមួយសតវត្សរ៍ទី១៩ ប៉ុន្តែបានប្រកាសឯករាជ្យបន្ទាប់ពីបដិវត្តឆ្នាំ១៩១៧។ សហភាពសូវៀត បានត្រួតត្រារដ្ឋទាំងបី ដោយមានជំនួយពីក្រុមកុម្មុយនិស្តក្នុងស្រុក បន្ទាប់ពីការផ្ទុះសង្គ្រាមលោកលើកទីពីរ ប៉ុន្តែមិនយូរប៉ុន្មាន ទឹកដីទាំងនោះត្រូវបាន ណាស៊ីអាល្លឺម៉ង់ ដណ្តើមកាន់កាប់វិញ។

យ៉ាងណា ក្រោយកងកម្លាំងសូវៀតរំដោះបានអេស្តូនី ឡាតវី និងលីទុយអានី, អតីតសាធារណរដ្ឋទាំង៣នេះ បានក្លាយជាផ្នែកមួយនៃសហភាពសូវៀតរហូតដល់ឆ្នាំ១៩៩១៕

អត្ថបទ៖ សុខ សុវណ្ណ

ចុចអាន៖ តើសមាជិកណាតូណាខ្លះ មិនបំពេញតាមគោលដៅចំណាយ?