តើសមាជិកណាតូណាខ្លះ មិនបំពេញតាមគោលដៅចំណាយ?

ផ្ទុះការភ្ញាក់ផ្អើលយ៉ាងខ្លាំងនៅពេលអតីតប្រធានាធិបតិអាមេរិកលោក ដូណាល់ ត្រាំ ប្រកាសថា គាត់នឹងមិនការពារប្រទេសណាតូណាមួយឡើយ ហើយលើកទឹកចិត្តរុស្ស៊ីឲ្យវាយប្រហារថែមទៀត លើសមាជិកណា ដែលមិនបំពេញតាមគោលដៅចំណាយ២%នៃផលិតផលក្នុងស្រុកសរុប (GDP) របស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរំពេចនោះ សេតវិមាន ក៏បានប្រតិកម្មខ្លាំងៗ ដោយចាត់ទុកការអត្ថាធិប្បាយរបស់គាត់ថា “ជារឿងដ៏ហួសចិត្ត” ហើយអះអាងថា លោក ត្រាំ កំពុងបង្កចលាចលដ៏គ្រោះថ្នាក់។

លើសពីនេះ ប្រមុខអង្គការសន្ធិសញ្ញាអាត្លង់ទិកខាងជើង លោក Jens Stoltenberg ​ក៏ប្រតិកម្មភ្លាមៗ​ដែរថា “សម្តីបែបនេះគឺជាការបំផ្លាញ​សន្តិសុខ​របស់​យើង​ទាំងអស់ ហើយក៏ធ្វើឲ្យទាហានអាមេរិកនិងអឺរ៉ុប ប្រឈមហានិភ័យកាន់តែខ្លាំងផងដែរ”។

ងាកទៅមើលឆ្នាំ២០១៤ សមាជិកសម្ព័ន្ធភាពមួយនេះ បានប្តេជ្ញាចំណាយយ៉ាងហោចណាស់ ២% នៃផលិតផលក្នុងស្រុកសរុបរបស់ពួកគេជារៀងរាល់ឆ្នាំ លើវិស័យការពារជាតិ ប៉ុន្តែកាលពីឆ្នាំមុន សមាជិកភាគច្រើនមិនអាចបំពេញតាមគោលដៅនោះបានទេ។

ក្នុងចំណោមនោះ មានប្រទេសធំ២ ដែលមិនអាចបំពេញតាមគោលការណ៍បាន នោះគឺជាបារាំង និងអាល្លឺម៉ង់ ដែលសុទ្ធជាប្រទេសមហាអំណាចសេដ្ឋកិច្ចទាំងពីររបស់សហភាពអឺរ៉ុប និងជាសមាជិកស្ថាបនិកនៃសម្ព័ន្ធភាពនេះទៀតផង។

ឆ្នាំមុន បារាំងធ្វើបានត្រឹម១,៩% ប៉ុណ្ណោះ ខណៈដែលអាល្លឺម៉ង់ ធ្វើបាន១,៥៧%។

ខាងក្រោមនេះ គឺជាសមាជិកណាតូចំនួន១៨ប្រទេស ដែលខកខានបំពេញតាមគោលដៅចំណាយ២%នៃផលិតផលក្នុងស្រុកសរុប៖

1. បារាំង (១,៩%)
2. ម៉ុងតេណេហ្គ្រោ (១,៨៧%)
3. ម៉ាសេដូនីខាងជើង (១,៨៧%)
4. ប៊ុលហ្គារី (១,៨៤%)
5. ក្រូអាត (១,៧៩%)
6. អាល់បានី (១,៧៦%)
7. ហូឡង់ (១,៧%)
8. ន័រវែស (‌១,៦៧%)
9. ដាណឺម៉ាក (១,៦៥%)
10. អាល្លឺម៉ង់ (១,៥៧%)
11. សាធារណរដ្ឋឆែក (១,៥%)
12. ព័រទុយហ្គាល់ (១,៤៨%)
13. អ៊ីតាលី (១,៤៦%)
14. កាណាដា (១,៣៨%)
15. ស្លូវេនី (១,៣៥%)
16. តួកគី (១,៣១%)
17. អេស្ប៉ាញ (១,២៦%)
18. បែលហ្ស៊ិក (១,២៦%)

សូមបញ្ជាក់ថា បើបូកបញ្ចូលគ្នាទៅ ប្រទេសចំនួន៣១របស់សម្ព័ន្ធភាពនេះ មានកញ្ចប់ថវិកាយោធារួមជាង១.១ពាន់ពាន់លានដុល្លារ, ទ័ពសកម្មជាង៣លាននាក់, ទ័ពបម្រុង២.៧លាននាក់ និងទ័ពប៉ារ៉ាជាង៧០០០០០នាក់៕

ចុចអាន៖ ប្រមុខណាតូ ប្រតិកម្មចំពោះសម្តីលោក ត្រាំ