រុស្ស៊ី នឹងចាប់ដៃចិន ទៅសង់រោងចក្រនុយក្លេអ៊ែរ នៅឋានព្រះចន្ទ

យោងតាមសារព័ត៌មាន RT, ប្រធានក្រុមហ៊ុន Roscosmos លោក Yury Borisov បានប្រាប់មហោស្រពយុវជនពិភពលោកជិតទីក្រុង Sochi ថា មន្ត្រីអវកាសរុស្ស៊ីនិងចិន កំពុងពិចារណាយ៉ាងយកចិត្តទុកដាក់លើគម្រោងរួមគ្នាមួយ ដើម្បីសាងសង់ស្ថានីយថាមពលនុយក្លេអ៊ែរនៅឋានព្រះចន្ទ ក្នុងរយៈពេលប្រហែលមួយទសវត្សរ៍ទៀត ដើម្បីបង្កើតថាមពលអគ្គិសនីសម្រាប់ការតាំងទីលំនៅ នៅទីនោះ នាថ្ងៃអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Borisov ដែលក៏ជាអតីតឧបនាយករដ្ឋមន្ត្រីនិងជាប្រធានទីភ្នាក់ងារអវកាសរុស្ស៊ីក្នុងឆ្នាំ២០២២ផងដែរនោះ បានអះអាងកាលពីថ្ងៃអង្គារទី៥ខែមីនាថា “បច្ចេកវិទ្យាដែលត្រូវការសម្រាប់ការអភិវឌ្ឍនុយក្លេអ៊ែរលើឋានព្រះចន្ទគឺជិតសម្រេចរួចរាល់ហើយ។ ថ្ងៃនេះយើងកំពុងពិចារណាយ៉ាងហ្មត់ចត់នូវគម្រោងមួយ ដើម្បីសាងសង់រោងចក្រថាមពលនៅលើផ្ទៃព្រះចន្ទរួមជាមួយភាគីចិនរបស់យើង អាចថានៅចន្លោះឆ្នាំ២០៣៣ ដល់ឆ្នាំ២០៣៥”។

តាមការបញ្ជាក់ពីលោក Borisov, ថាមពលនុយក្លេអ៊ែរ អាចជាដំណោះស្រាយសម្រាប់ការផ្តល់ថាមពលដែលត្រូវការបើមានមនុស្សទៅរស់នៅលើឋានព្រះចន្ទមែន។ បន្ទះ​ស្រូប​ពន្លឺ​ព្រះ​អាទិត្យ​ នឹង​មិន​អាច​បង្កើត​អគ្គិសនី​បាន​គ្រប់​គ្រាន់​ទេ មនុស្សយន្តនឹងត្រូវបានប្រើដើម្បីដំឡើងចង្ក្រានរ៉េអាក់ទ័រ។

រឿងនេះកើតឡើងចំពេលអ្នកសង្កេតការណ៍មួយចំនួន កំពុងតាមដានការប្រកួតប្រជែងអវកាសសម័យទំនើប រវាងសហរដ្ឋអាមេរិកនិងសម្ព័ន្ធមិត្ត ជាមួយរុស្ស៊ីនិងចិន យ៉ាងដិតដល់ជាទីបំផុត។

ប្រធានបញ្ជាការដ្ឋានអវកាសអាមេរិក ឧត្តមសេនីយ៍ Stephen Whiting អះអាងថា ប្រទេសចិនកំពុងអភិវឌ្ឍសមត្ថភាពយោធាលើលំហ ក្នុងល្បឿនដ៏លឿនអស្ចារ្យ ប៉ុន្តែក្រសួងការពារជាតិចិនបានព្រមានវិញថា ទីក្រុងវ៉ាស៊ីនតោនឯណោះទេ ដែលកំពុងបញ្ឆេះសង្គ្រាមលើអវកាសដ៏គ្រោះថ្នាក់។

ដោយឡែក កាលពីខែមុនប្រធានគណៈកម្មាធិការស៊ើបការណ៍សម្ងាត់របស់សភាអាមេរិក លោក Mike Turner បានចោទប្រកាន់ថា រុស្ស៊ីព្យាយាមដាក់ពង្រាយប្រព័ន្ធស្ទាក់ចាប់មីស៊ីលនៅក្នុងលំហ ដែលអាចមានបំពាក់ក្បាលគ្រាប់នុយក្លេអ៊ែរទៀតផង ដើម្បីបង្កើនសមត្ថភាពប្រឆាំងផ្កាយរណបរបស់ខ្លួន។

ទោះបីជាយ៉ាងណាក៏ដោយ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឆ្លើយតបដោយបដិសេធថា ទីក្រុងវ៉ាស៊ីនតោន កំពុងប្រតិដ្ឋរឿង ដើម្បីទទួលសាងឥទ្ធិពលដាក់អាវុធខ្លួនឯងក្នុងលំហអវកាសប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី រៀបគម្រោងបញ្ជូនមនុស្សទៅឋានព្រះចន្ទនៅទសវត្សរ៍ក្រោយ