ត្រីបាឡែន ៣១ ក្បាលងាប់នៅឆ្នេរសមុទ្រភាគខាងលិច អូស្ត្រាលី

ត្រីបាឡែនជាង ១០០ ក្បាលដែលជាប់នៅឆ្នេរសមុទ្រភាគខាងលិចប្រទេសអូស្ត្រាលីត្រូវបានជួយសង្គ្រោះ ខណៈដែល ៣១ ក្បាលផ្សេងទៀតបានងាប់ ក្រោយទើរនៅលើច្រាំង ។ នេះបើយោងតាមការចេញផ្សាយដោយទីភ្នាក់ងារព័ត៌មាន AP​ នៅថ្ងៃទី​២៥ ខែមេសានេះ ។

ក្រុមអ្នកស្ម័គ្រចិត្តរាប់រយនាក់បានជួយសង្រ្គោះត្រីបាឡែនប្រមាណ ១០០ ក្បាលក្នុងចំណោម ២០០ ក្បាលដែលអណ្ដែតមកជាប់នៅលើតំបន់ឆ្នេរ Toby’s Inlet ហើយមាន ៣១ ក្បាលបានងាប់មិនអាចជួយសង្គ្រោះបានឡើយ ខណៈក្រុមអ្នកជួយសង្គ្រោះបានព្យាយាមសម្រួលត្រីបាឡែនទាំងនោះឲ្យដាក់ក្បាលរបស់ពួកវាចេញពីទឹកដើម្បីអាចដកដង្ហើមបាន ។

ស្របពេលជាមួយគ្នានេះ រយៈពេល ១ ម៉ោងក្រោយមកត្រីបាឡែនដែលនៅរស់រានមានជីវិតបានហែចូលទៅសមុទ្រវិញ ចំណែកត្រីបាឡែនដែលងាប់ត្រូវបានអូសចេញពីទឹក ដើម្បីកុំឲ្យគ្រោងឆ្អឹងរបស់ពួកវាក្លាយជាចំណីត្រីឆ្លាម ។

គួរបញ្ជាក់ថា ទីក្រុង Dunsborough គឺជាកន្លែងដែលធ្លាប់មានត្រីបាឡែនហែអណ្ដែតមកទើរជាប់ចំនួន ៣២០ ក្បាលក្នុងឆ្នាំ ១៩៩៦ ខណៈពេលនោះមានងាប់តែ ២០ ក្បាលប៉ុណ្ណោះ បន្ទាប់ពីក្រុមអ្នកជួយសង្គ្រោះបានជួយទាន់ពេលវេលា ។

ឆ្លើយតបនឹងបញ្ហានេះ អ្នកវិទ្យាសាស្ត្រក៏ទាន់ហ៊ានដាក់ការសន្និដ្ឋានពីមូលហេតុអ្វីដែលបណ្តាលឲ្យត្រីបាឡែនទើរមកជាប់នោះទេ ខណៈមានទ្រឹស្ដី​រួម​បានលើកឡើង​ថា ត្រីបាឡែនទាំងនេះកំពុងហែគេចពីសត្វ​ត្រីបាឡែនឈ្មោលតាមប្រមាញ់ មួយវិញទៀតសំឡេងរំខាន​នៅ​ក្រោម​សមុទ្រ​ដែល​បង្ក​ដោយ​មនុស្ស​ក៏​អាច​ជាការរំខាន​ដល់​ការហែកម្សាន្ត​របស់​ពួកវាផងដែរ ៕

អត្ថបទ ៖ ប៊ុន សុភាព