ព័ត៌មានអន្ដរជាតិ

ត្រីបាឡែនជាង១៥០ក្បាលបានជាប់គាំងរដូករណែលនៅឆ្នេរសមុទ្រអូស្រ្តាលី

បានផុស

១ year មុន

នៅ

ថ្ងៃពុធ ១៩ កុម្ភៈ ២០២៥

ដោយ

ត្រីបាឡែនជាង១៥០ក្បាលដែលមានទម្ងន់ចាប់ពី៥០០គីឡូក្រាមទៅ៣តោន បានជាប់គាំងយ៉ាងរដូករណែលនៅឆ្នេរសមុទ្ររដ្ឋ Tasmania ប្រទេសអូស្ត្រាលី។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១៩ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានធនធានធម្មជាតិ និងបរិស្ថានបានឲ្យដឹងថាត្រីបាឡែនសរុបចំនួន១៥៧ក្បាលបានជាប់គាំងនៅជិតទីប្រជុំជននៃព្រែក Arthur នៅឆ្នេរសមុទ្រភាគខាងលិចប្រទេសអាស្រ្តាលី។ ការសង្កេតដំបូងបង្ហាញថា យ៉ាងហោចណាស់៩០ ក្នុងចំណោមពួកវានៅរស់។

មន្ត្រីទំនាក់ទំនងនៃនាយកដ្ឋានលោក Brendon Clark បានឲ្យដឹងថា លក្ខខណ្ឌសមុទ្រ និងបញ្ហាប្រឈមក្នុងការទទួលបានឧបករណ៍ឯកទេសទៅកាន់តំបន់ដាច់ស្រយាលកំពុងធ្វើឱ្យមានភាពស្មុគស្មាញដល់ការឆ្លើយតប។ ជាមួយគ្នានេះត្រីបាឡែនអាចមានទម្ងន់ពី ៥០០ គីឡូក្រាម ដល់៣តោនដែលពិបាកក្នុងការបញ្ជូនពួកវាទៅកាន់សមុទ្រវិញ។

ត្រីបាឡែនទាំងនេះត្រូវបានគេរកឃើញកាលពីរសៀលថ្ងៃអង្គារ ដែលខ្លះអាចជាប់គាំងអស់រយៈពេល ៤៨ម៉ោងរហូតដល់ព្រឹកថ្ងៃពុធ។ អ្នកជំនាញកំពុងរកវិធីសមស្របក្នុងការបញ្ជូនត្រីទាំងនេះទៅក្នុងសមុទ្រវិញ ដែលជាបញ្ហាមួយទាមទារឲ្យមានកម្លាំងមនុស្សច្រើន និងបង្កហានិភ័យដល់បុគ្គលិកផងដែរ។

លោកClarkបានបដិសេធមិនធ្វើការសន្និដ្ឋានថាហេតុអ្វីបានជាមានការជាប់គាំងនេះទេ។ លោកបានបន្តថា គ្រោងឆ្អឹងត្រីបាឡែនដែលងាប់នឹងត្រូវពិនិត្យដើម្បីរកតម្រុយ។

ការជាប់គាំងនេះគឺជាលើកទីមួយរបស់ត្រីបាឡែន False killer នៅ Tasmania ចាប់តាំងពីឆ្នាំ១៩៧៤ ដោយកាលនោះមានហ្វូងត្រីបាឡែននេះជាង ១៦០ ក្បាល បានជាប់គាំងនៅលើឆ្នេរក្បែរទីក្រុង Stanley។

កាលពីឆ្នាំ ២០២២ ត្រីបាឡែន Pilot ចំនួន ២៣០ក្បាលបានជាប់គាំងនៅនៅឆ្នេរសមុទ្រភាគខាងលិចនៅឯកំពង់ផែ Macquarie ផងដែរ។ ចំណែកការជាប់គាំងដ៏ធំបំផុតនៅក្នុងប្រវត្តិសាស្ត្រអូស្ត្រាលីបានកើតឡើងនៅក្នុងកំពង់ផែដូចគ្នាក្នុងឆ្នាំ ២០២០ដែលត្រីបាឡែនចំនួន៤៧០ក្បាលបានជាប់គាំង។ ភាគច្រើននៃត្រីបាឡែនដែលជាប់គាំងនៅឆ្នេរសមុទ្រទាំងពីរលើកបានងាប់។

យ៉ាងណាមូលហេតុនៃការជាប់គាំងទាំងនេះនៅតែមិនច្បាស់លាស់ ការសន្និដ្ឋានខ្លះថាដោយសារការវង្វេងដែលបណ្ដាលមកពីសំឡេងខ្លាំង ជំងឺវ័យចំណាស់របស់វា ការរងរបួស ការរត់គេចពីសត្វផ្សេងតាមប្រមាញ់ និងបញ្ហាអាកាសធាតុជាដើម៕