រថក្រោះអ៊ីស្រាអែល ច្រឡំដៃបាញ់សម្លាប់ទ័ពគ្នាឯង អស់មួយក្រុម 

ទាហានអ៊ីស្រាអែលបានច្រឡំដៃ បាញ់រថក្រោះចំទ័ពគ្នាឯងមួយក្រុម បណ្តាលឲ្យស្លាប់ ៥នាក់ នៅក្នុងអ្វីដែលខ្លួនហៅថាជា គ្រោះថ្នាក់ដ៏អាក្រក់បំផុត ចាប់តាំងពីសង្គ្រាមជាមួយក្រុមហាម៉ាស ផ្ទុះឡើងកាលពីខែតុលាឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីទ័ព៥នាក់ស្លាប់ ក៏នៅមាន៧នាក់ទៀតរងរបួសផងដែរ ដោយក្នុងនោះ មាន៣នាក់ ត្រូវរបួសធ្ងន់។

តាមសេចក្តីរាយការណ៍របស់ BBC, ហេតុការណ៍នេះកើតឡើងកាលពីថ្ងៃពុធទី១៥ខែឧសភា នៅក្នុងទីក្រុង Jabalia ភាគខាងជើងតំបន់ហ្គាហ្សា ជាទីដែលកងទ័ពរបស់លោក Netanyahu កំពុងធ្វើសង្គ្រាមឥតដកដៃជាមួយក្រុមសកម្មប្រយុទ្ធប៉ាឡេស្ទីន។ 

សេចក្តីរាយការណ៍ដដែលបន្តថា ទ័ពទាំង៥នាក់ដែលបាត់បង់ជីវិត គឺសុទ្ធសឹងជាទ័ពមកពីកងវរសេនាតូចលេខ២០២ នៃកងពលតូចឆ័ត្រយោង ហើយមកទល់ពេលនេះ កងកម្លាំងការពារអ៊ីស្រាអែលហៅកាត់ IDF កំពុងបើកការស៊ើបអង្កេតដើម្បីរកឲ្យឃើញថាតើ ហេតុអ្វីបានជាពួកគេ ត្រូវរថក្រោះបាញ់ចំបែបនេះ។

ទោះបីជាយ៉ាងណាក៏ដោយ ការស៊ើបអង្កេតបឋមរកឃើញថា ទាហានទាំងនោះ បានចូលកាន់កាប់អគារមួយ ក្នុងជំរំជនភៀសខ្លួន Jabalia ដែលមានចម្ងាយរាប់សិបម៉ែត្រពីរថក្រោះអ៊ីស្រាអែល ដែលក៏កំពុងឈរជើងនៅក្នុងតំបន់ដែរ។

សូមជម្រាបថា សង្គ្រាមអ៊ីស្រាអែល-ហាម៉ាស កើតឡើងនៅថ្ងៃទី៧ខែតុលាឆ្នាំ២០២៣ នៅពេលចលនាសកម្មប្រយុទ្ធប៉ាឡេស្ទីន សម្រុកចូលភាគខាងត្បូងប្រទេសអ៊ីស្រាអែល សម្លាប់មនុស្សប្រហែល១ ២០០នាក់និងចាប់ជាចំណាប់ខ្មាំង ២៥២នាក់ទៀត។

មិនទុកយូរឡើយ ​អ៊ីស្រាអែល បានបើកប្រតិបត្តិការសងសឹក ដោយ​សម្លាប់​ប្រជាជន​ប៉ាឡេស្ទីន​ជិត ៣៥ ០០០ នាក់ និង​របួស​ជិត ៨ ម៉ឺន​នាក់ ដែលភាគ​ច្រើន​ជា​ជនស៊ីវិលស្លូតត្រង់៕

អត្ថបទ៖ សុខ សុវណ្ណ

ចុចអាន៖ ក្រុមហាម៉ាស ថា បទឈប់បាញ់មិនអាចទៅរួច ដោយសារពាក្យសម្តីលោក បៃដិន ប៉ុន្មានម៉ាត់