ក្រុមហាម៉ាស ថា បទឈប់បាញ់មិនអាចទៅរួច ដោយសារពាក្យសម្តីលោក បៃដិន ប៉ុន្មានម៉ាត់

ក្រោយបទឈប់បាញ់រវាងអ៊ីស្រាអែលនិងក្រុមហាម៉ាសមិនអាចលេចចេញជារូបរាងបាន ស្រាប់តែក្រុមសកម្មប្រយុទ្ធប៉ាឡេស្ទីន ចេញមុខប្រកាសថា បរាជ័យនេះ គឺដោយសារតែសម្តីប៉ុន្មានម៉ាត់របស់ប្រធានាធិបតីអាមេរិក ចូ បៃដិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AFP កាលពីថ្ងៃអាទិត្យទី១២ខែឧសភា, ក្រុមហាម៉ាស ប្រកាសថា ពាក្យសម្តីរបស់លោក បៃដិន ដែលថា បទឈប់បាញ់នៅហ្គាហ្សា អាចទៅរួចប្រសិនបើចលនាសកម្មប្រយុទ្ធប៉ាឡេស្ទីន ដោះលែងចំណាប់ខ្មាំងនោះ គឺជាឧបសគ្គចំពោះការចរចាហើយ។

ប្រធានាធិបតីអាមេរិក បានលើកប្រធានបទពាក់ព័ន្ធចំណាប់ខ្មាំងនេះ ក្នុងអំឡុងសុន្ទរកថានៅទីក្រុង Seattle បន្ទាប់ពីព្រមានអ៊ីស្រាអែលថា លោកនឹងឈប់ផ្គត់ផ្គង់គ្រាប់កាំភ្លើងធំ និងសព្វាវុធផ្សេងទៀត ប្រសិនបើទីក្រុងហ្ស៊េរុយសាឡិម ដាក់ទ័ពជើងគោកចូលទីក្រុង Rafah ហើយលោកថែមអះអាងទៀតថា បទឈប់បាញ់នៅក្នុងសង្គ្រាមអ៊ីស្រាអែល-ហាម៉ាស អាចកើតឡើងបាននៅថ្ងៃស្អែក ប្រសិនបើចលនាសកម្មប្រយុទ្ធប៉ាឡេស្ទីនដោះលែងចំណាប់ខ្មាំង ដែលចាប់យកក្នុងការវាយប្រហារថ្ងៃទី៧ខែតុលាឆ្នាំ២០២៣។

មិនយូរប៉ុន្មាន ក្រុមហាម៉ាស បានចេញសេចក្តីថ្លែងការណ៍មួយ ដោយថ្កោលទោសចំពោះគោលជំហររបស់ប្រធានាធិបតីអាមេរិក ហើយចាត់ទុកពាក្យសម្តីនេះថា ជាការបំផ្លាញលទ្ធផលនៃកិច្ចចរចាដែលសឹងតែឈានដល់ព្រមព្រៀងទៅហើយ។

ការចរចារវាងក្រុមហាម៉ាសនិងអ៊ីស្រាអែល សម្រាប់កិច្ចព្រមព្រៀងបទឈប់បាញ់ និងដោះដូរចំណាប់ខ្មាំង ដែលសម្របសម្រួលដោយអេហ្ស៊ីប កាតា និងសហរដ្ឋអាមេរិក ត្រូវជាប់គាំងចំពេលយោធារបស់លោក Benjamin Netanyahu ធ្វើសកម្មភាពឥតដកដៃនៅភាគខាងត្បូង តំបន់ហ្គាហ្សា។

ម្យ៉ាងវិញទៀត ក្រុមហាម៉ាស ក៏ចោទនាយករដ្ឋមន្ត្រីអ៊ីស្រាអែលផងដែរ ថាធ្វើឲ្យការចរចាត្រូវដួលរលំដោយសារតែបើកប្រតិបត្តិការវាយលុកនៅទីក្រុង Rafah។ រដ្ឋាភិបាលអ៊ីស្រាអែល បានបង្កើនការសម្លាប់រង្គាលដ៏ឃោរឃៅ នៅកន្លែងផ្សេងៗក្នុងតំបន់ហ្គាហ្សាស្ទ្រីប ហើយលាតត្រដាងឲ្យឃើញច្បាស់ៗអំពីសង្រ្គាមប្រល័យពូជសាសន៍ជាបន្តនៅ ហ្គាហ្សា។

សូមជម្រាបថា តាមការបញ្ជាក់ពីក្រសួង​សុខាភិបាល​ហ្គាហ្សា​, គិតត្រឹមពេលនេះ ប្រតិបត្តិការ​របស់​អ៊ីស្រាអែល បាន​សម្លាប់​ប្រជាជន​ប៉ាឡេស្ទីន​ជិត ៣៥ ០០០ នាក់ និង​របួស​ជិត ៨ ម៉ឺន​នាក់ ភាគ​ច្រើន​ជា​ជនស៊ីវិលស្លូតត្រង់។ នេះគឺដើម្បីសងសឹកទៅនឹងការវាយប្រហារឆ្លងដែនរបស់ក្រុមសកម្មប្រយុទ្ធហាម៉ាស លើប្រទេសអ៊ីស្រាអែលនៅថ្ងៃទី៧ខែតុលា ដែលពេលនោះបានផ្តាច់ជីវិតមនុស្សប្រហែល ១ ២០០ នាក់ និងចាប់ជាចំណាប់ខ្មាំង ២៥២នាក់ទៀត៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល នៅតែផ្គើនអាមេរិក ចេញបញ្ជាឲ្យជនស៊ីវិល ឆាប់ជម្លៀសចេញពី Rafah ខណៈខ្លួន វាយសន្ធាប់