មីយ៉ាន់ម៉ាស្នើ​ចុះ​បញ្ជី​ម្សៅលាបមុខ Thanakha ​នៅ​អង្គការ​យូណេស្កូ​

ប្រទេសមីយ៉ាន់ម៉ាកំពុងស្នើសុំបញ្ចូលម្សៅលាបមុខ Thanakha ពណ៌លឿងធ្វើពីសំបកឈើដែលជាគ្រឿងសម្អាងធម្មជាតិបែបប្រពៃណីទៅក្នុងបញ្ជីបេតិកភណ្ឌវប្បធម៌អរូបីពិភពលោករបស់អង្គការយូណេស្កូ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១៣ខែកុម្ភៈនេះ។

ការ​និយម​​ប្រើប្រាស់ម្សៅ​​លាប​មុខ Thanakha ត្រូវបានគេជឿថា មានអាយុកាលជាង១​សហសវត្សរិ៍ (១០០០ឆ្នាំ)មកហើយ។ បើតាមផ្ទាំងគំនូរដែលបង្ហាញពីការប្រើប្រាស់ត្រូវបានគេឃើញនៅក្នុងប្រាសាទសតវត្សទី១១​នៅក្នុងរាជធានីចាស់ Bagan ដែលជាតំបន់បេតិកភណ្ឌពិភពលោករបស់អង្គការយូណេស្កូ។ ម្សៅ Thanakha ធ្វើពីសំបកឈើជាច្រើន​ប្រភេទ ដែលដុះនៅតំបន់ដីស្ងួតភាគកណ្តាលនៃប្រទេសមីយ៉ាន់ម៉ា។

កាលពីថ្ងៃពុធ សមាជិកនៃអង្គការសង្គមចំនួន៣៦​ដែលមានអាយុចាប់ពី​៥​ដល់៨០ឆ្នាំបានមកជួបជុំគ្នានៅក្នុងឧទ្យានមួយក្នុងទីក្រុង Yangon ដែលជាទីក្រុងធំបំផុតរបស់ប្រទេសមីយ៉ាន់ម៉ា ដើម្បីបង្ហាញ ម្សៅ​​លាបមុខ​ Thanakha ជានិមិត្តរូប​នៃ​សង្គមមីយ៉ាន់ម៉ា ដោយ​មានការប្រកួតប្រជែងបទចម្រៀង និងរបាំប្រពៃណី និងមាន​តូប​គ្រឿង​សម្អាងធ្វើ​ពី Thanakha ផងដែរ។

អង្គការ​សង្គម ​Myanmar Cultural Heritage Trust ដែលរៀបចំកម្មវិធី​ប្រកួតនេះ បាននិយាយថា ពីធីនេះត្រូវបានប្រារព្ធឡើងដើម្បីរំលេចវប្បធម៌ Thanakha និងជួយនាំយកវាទៅឲ្យពិភពលោកចាប់អារម្មណ៍។

មនុស្សដែលមានលាបម្សៅ Thanakha មានគ្រប់ទីកន្លែងនៅក្នុងប្រទេសមីយ៉ាន់ម៉ា ភាគច្រើនស្ត្រី និងកុមារ លាបលើថ្ពាល់ ច្រមុះ ថ្ងាស ក កំភួនដៃ និងកំភួនជើង បន្ទាប់ពីងូតទឹកនៅពេលព្រឹក អំឡុងពេលថ្ងៃ និងមុនពេលចូលគេង។ ឥឡូវនេះ ប្រពៃណីនេះនឹងត្រូវបានពិចារណាដោយទីភ្នាក់ងារវប្បធម៌របស់អង្គការសហប្រជាជាតិ។

គួរបញ្ជាក់ថា ដំបូងឡើយម្សៅ Thanakha ត្រូវបានស្នើឱ្យដាក់បញ្ចូលក្នុងបញ្ជីបេតិកភណ្ឌវប្បធម៌អរូបីរបស់អង្គការយូណេស្កូក្នុងខែមីនាឆ្នាំ ២០២០ ប៉ុន្តែពាក្យស្នើសុំត្រូវបានបដិសេធដោយសារមិនពេញលេញ។ ក្រសួង​កិច្ចការ​សាសនា និង​វប្បធម៌​របស់​រដ្ឋាភិបាល​យោធា​កំពុង​ធ្វើ​ការ​ដាក់​បញ្ចូលជា​ថ្មី​នៅ​ចុង​ខែ​មីនាឆ្នាំនេះ។

ប្រសិនបើការទទួលស្គាល់ត្រូវបានសម្រេច Thanakha នឹងក្លាយជាបេតិកភណ្ឌវប្បធម៌អរូបីទីពីររបស់ប្រទេស​មីយ៉ាន់ម៉ាដែលត្រូវបានទទួលស្គាល់ដោយអង្គការយូណេស្កូ បន្ទាប់ពីពិធីបុណ្យអុំទូកប្រពៃណីរបស់ប្រទេសនេះត្រូវបាដាក់បញ្ចូលកាលពីខែធ្នូឆ្នាំមុន៕

អត្ថបទ៖ ប៊ុន សុភាព