ការផ្ទុះដ៏សាហាវ នៅ មីយ៉ាន់ម៉ា សម្លាប់មនុស្ស ៥៥នាក់ និងជាង ៧០នាក់ទៀត ត្រូវរបួស

ការផ្ទុះដ៏សាហាវមួយនៅតំបន់ក្រុមផ្តាច់ខ្លួននៃប្រទេសមីយ៉ាន់ម៉ា បានផ្តាច់ជីវិតមនុស្សចំនួន ៥៥នាក់ ក្នុងនោះមានប្រុស ៣០នាក់ និងស្រ្តី ២៥នាក់ ខណៈមនុស្សជាង ៧០នាក់ទៀត រងរបួស។

តាមការផ្សាយរបស់ BBC, ហេតុការណ៍នេះ កើតឡើងនៅម៉ោង ៥ល្ងាចថ្ងៃអាទិត្យ ទី៣១ ខែឧសភា ឆ្នាំ២០២៦ ក្នុងភូមិ Kaung Tat នៃរដ្ឋ Shan  ជាប់ព្រំដែនចិន។

មិនមានព័ត៌មានផ្លូវការបញ្ជាក់ថា ការផ្ទុះនោះគឺជាអ្វីឡើយ ប៉ុន្តែបើតាមការអះអាងពីកងទ័ពរំដោះជាតិដាអាង (TNLA), ការផ្ទុះគឺបណ្តាលមកពីសារធាតុផ្ទុះ ដែលគេប្រើក្នុងវិស័យរ៉ែ និងការដ្ឋានវាយថ្ម។

សាក្សីនៅកន្លែងកើតហេតុ បានប្រាប់អ្នកកាសែតថា ពួកគេបានឮស្នូរផ្ទុះដ៏ខ្លាំង និងមើលឃើញផ្សែង ហុយខ្មួលខ្មាញ់។ ផ្ទះជាច្រើនខ្នង ត្រូវខ្ទេច ហើយមនុស្សម្នា នាំគ្នាយំ យ៉ាងទ្រហឹង។

សូមជម្រាបថា ប្រទេសមីយ៉ាន់ម៉ា បានធ្លាក់ចូលក្នុងភាពចលាចល ចាប់តាំងពីកងទ័ព ដណ្តើមបានអំណាចពីរដ្ឋាភិបាលជាប់ឆ្នោត របស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១។

បន្ទាប់ពីបាតុកម្មដោយសន្តិវិធី ត្រូវបានបង្ក្រាបដោយប្រើកម្លាំងបាញ់សម្លាប់ ក្រុមអ្នកប្រឆាំងនឹងការគ្រប់គ្រងរបស់យោធាជាច្រើនក្រុម បានចាប់អាវុធឡើងប្រយុទ្ធ ហើយតំបន់ភាគច្រើននៃប្រទេសនេះ ត្រូវធ្លាក់ចូលទៅក្នុងជម្លោះ៕

អត្ថបទ៖ សុខ សុវណ្ណ