ព័ត៌មានអន្ដរជាតិ

លោក ត្រាំ ព្រមានកម្ទេចក្រុមហ៊ូធីឲ្យរលាយសូន្យពីលើលោក និងឲ្យអ៊ីរ៉ង់ឈប់គាំទ្រក្រុមនេះ

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានចេញការព្រមានយ៉ាងម៉ឺងម៉ាត់ចំពោះក្រុមឧទ្ទាមហ៊ូធីរបស់ប្រទេសយេម៉ែន ដោយប្តេជ្ញាថានឹង«បំផ្លាញឲ្យរលាយបាត់សូន្យពីលើលោក» បន្ទាប់ពីការវាយប្រហារនាពេលថ្មីៗនេះលើទ្រព្យសម្បត្តិរបស់កងទ័ពជើងទឹកអាមេរិកនៅសមុទ្រក្រហម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ លោកប្រធានាធិបតីក៏បានព្រមានអ៊ីរ៉ង់ឲ្យបញ្ឈប់ការគាំទ្ររបស់ខ្លួនចំពោះក្រុមហ៊ូធីផងដែរ ហើយប្រាប់ឲ្យក្រុងតេហេរ៉ង់ទទួលខុសត្រូវចំពោះសកម្មភាពរបស់ក្រុមឧទ្ទាមនេះ។

លោក ត្រាំ បានសរសេរសារនៅលើបណ្ដាញសង្គម Truth Social កាលពីថ្ងៃពុធទី១៩ខែមីនាថា៖ «អ៊ីរ៉ង់ត្រូវតែបញ្ឈប់ការបញ្ជូនការផ្គត់ផ្គង់ទាំងនេះជាបន្ទាន់។ ឲ្យក្រុមហ៊ូធីប្រយុទ្ធដោយខ្លួនឯង ទោះយ៉ាងណាក៏ដោយក៏ពួកគេចាញ់ ប៉ុន្តែវិធីនេះពួកគេចាញ់យ៉ាងឆាប់រហ័ស»។

ភាពតានតឹងកាន់តែខ្លាំងឡើង បន្ទាប់ពីក្រុមហ៊ូធីត្រូវបានគេចោទប្រកាន់ថាបានបើកការវាយប្រហារដោយយន្តហោះគ្មានមនុស្សបើក សំដៅទៅលើក្រុមនាវាផ្ទុកយន្តហោះអាមេរិកមួយក្រុមនៅក្នុងសមុទ្រក្រហម។ ជាការសងសឹក អាមេរិកបានធ្វើការវាយប្រហារតាមអាកាសទៅលើទីតាំងរបស់ក្រុមហ៊ូធី នៅក្នុងរដ្ឋធានីសាណា របស់ប្រទេសយេម៉ែន ជាពិសេសវាយលុកសង្កាត់ Al-Jarraf ក្បែរព្រលានយន្តហោះ។

ប្រតិបត្តិការទាំងនេះ បានបណ្តាលឲ្យមានអ្នកស្លាប់យ៉ាងហោចណាស់ ៣១នាក់ ដែលជាសកម្មភាពយោធាដ៏ធំបំផុតរបស់អាមេរិកនៅក្នុងប្រទេសយេម៉ែន គិតចាប់តាំងពីលោក ត្រាំ បានឡើងកាន់តំណែងក្នុងខែមករា។

លោក ត្រាំ បានសង្កត់ធ្ងន់ថា ការវាយប្រហាររបស់ហ៊ូធីបន្ថែមទៀត នឹងត្រូវបានចាត់ទុកថាជាសកម្មភាពផ្ទាល់របស់អ៊ីរ៉ង់ ដោយប្ដេជ្ញាថាអ៊ីរ៉ង់នឹងទទួលរងផលវិបាកធ្ងន់ធ្ងរ។ មេដឹកនាំអាមេរិកវ័យ៧៨ឆ្នាំ បាននិយាយថា៖ «រាល់ការបាញ់ប្រហារដោយពួកហ៊ូធីនឹងត្រូវឃ្លាំមើល… ដូចជាការបាញ់ចេញពីអាវុធ និងការដឹកនាំរបស់អ៊ីរ៉ង់ ហើយអ៊ីរ៉ង់នឹងត្រូវទទួលខុសត្រូវ និងទទួលរងនូវផលវិបាក ហើយផលវិបាកទាំងនោះនឹងធ្ងន់ធ្ងរ!»។

ទោះបីជាមានការគាបសង្កត់ផ្នែកយោធារបស់អាមេរិកក៏ដោយ ក៏ក្រុមហ៊ូធីបានប្រកាសបន្តការវាយលុករបស់ពួកគេ រួមទាំងការគំរាមកំហែងប្រឆាំងនឹងគោលដៅរបស់អ៊ីស្រាអែល រហូតដល់ការទាមទាររបស់ពួកគេត្រូវបានបំពេញ។ ថ្មីៗនេះ ពួកគេបានបាញ់មីស៊ីលផ្លោងមួយគ្រាប់ឆ្ពោះទៅកាន់ប្រទេសអ៊ីស្រាអែល ហើយបានប្រកាសពីផែនការពង្រីកគោលដៅវាយប្រហាររបស់ពួកគេថែមទៀត។ ចាប់តាំងពីចុងឆ្នាំ២០២៣មក ក្រុមហ៊ូធីបានអនុវត្តការវាយប្រហារជាង ១០០ដងលើនាវាដឹកជញ្ជូន ដែលរំខានដល់ពាណិជ្ជកម្មពិភពលោក។

អ៊ីរ៉ង់ ខណៈដែលបដិសេធជាសាធារណៈនូវការគាំទ្រខាងយោធាដោយផ្ទាល់ដល់ក្រុមហ៊ូធីនោះ បានជាប់ពាក់ព័ន្ធនឹងការផ្តល់អាវុធ ការបណ្តុះបណ្តាល និងជំនួយហិរញ្ញវត្ថុដល់ក្រុមឧទ្ទាមមួយនេះ។ ក្រុមអ្នកជំនាញរបស់អង្គការសហប្រជាជាតិទទួលបន្ទុកនៅប្រទេសយេម៉ែន បានរាយការណ៍ថា អ៊ីរ៉ង់កំពុងដឹកជញ្ជូនប្រេងដោយខុសច្បាប់ទៅកាន់យេម៉ែន ដោយប្រាក់ចំណូលពីការលក់ត្រូវបានប្រើប្រាស់សម្រាប់ផ្តល់ហិរញ្ញប្បទានដល់កិច្ចខិតខំប្រឹងប្រែងសង្រ្គាមរបស់ហ៊ូធី។ ជាការឆ្លើយតបទៅនឹងស្ថានការណ៍កាន់តែតានតឹង អ៊ីរ៉ង់តាមសេចក្តីរាយការណ៍បានជំរុញឲ្យក្រុមហ៊ូធី កាត់បន្ថយភាពតានតឹងនៅសមុទ្រក្រហម ដែលជាសញ្ញានៃការផ្លាស់ប្តូរសំខាន់ក្នុងវិធីសាស្រ្តរបស់ទីក្រុងតេហេរ៉ង់ ចំពេលមានការបង្កើនការត្រួតពិនិត្យជាអន្តរជាតិ។

ជម្លោះដែលកំពុងកើតឡើង បានបង្កក្តីបារម្ភផ្នែកមនុស្សធម៌យ៉ាងខ្លាំង។ ការវាយប្រហារតាមអាកាសនាពេលថ្មីៗនេះរបស់អាមេរិកនៅក្នុងតំបន់ដែលគ្រប់គ្រងដោយក្រុមហ៊ូធី រួមទាំងទីក្រុងសាណា និងទីក្រុងសាដា បានបណ្តាលឲ្យមានជនស៊ីវិលស្លាប់បាត់បង់ជីវិត ជាមួយនឹងរបាយការណ៍បង្ហាញថា មនុស្សយ៉ាងហោចណាស់ ៥៣នាក់បានស្លាប់រួមទាំងកុមារផងដែរ។ អង្គការសហប្រជាជាតិ បានផ្អាកប្រតិបត្តិការរបស់ខ្លួនក្នុងទីក្រុងសាដា ក្នុងខែកុម្ភៈ ដោយសារការព្រួយបារម្ភផ្នែកសន្តិសុខបន្ទាប់ពីការឃុំខ្លួនបុគ្គលិករបស់អង្គការសហប្រជាជាតិ ដែលម្នាក់ក្នុងចំណោមពួកគេបានស្លាប់នៅពេលជាប់ពន្ធនាគារដោយក្រុមហ៊ូធី៕

ដោយ៖ ឈាង

ចុចអាន៖ ហ៊ូធី បាញ់មីស៊ីលដាក់អ៊ីស្រាអែល ក្រោយហ្គាហ្សាផ្ទុះអាវុធឡើងវិញស្លាប់មនុស្សជាង៤០០នាក់