ជម្លោះ​នៅ​មីយ៉ាន់ម៉ា​ បន្តជំរុញឲ្យ​ប្រជាជនរត់​ភៀស​ខ្លួន​​​ ដើម្បី​​សុវត្ថិភាព​

យោងតាមការចេញផ្សាយរបស់សារព័ត៌មាន CNA នៅ​ថ្ងៃទី១៥ខែមិថុនានេះ កាលពីចុងសប្តាហ៍មុន ជនស៊ីវិលជាង ៦០០នាក់ត្រូវបានជម្លៀសចេញពីភូមិ Saung Nang Khae ក្នុង រដ្ឋ Shan របស់ប្រទេសមីយ៉ាន់ម៉ា ខណៈដែលការប៉ះទង្គិច​ដោយ​​អាវុធ​​កាន់តែខ្លាំងឡើងរវាងយោធា​​​​​របស់​របប​សឹក​ និងកងកម្លាំងប្រឆាំងរដ្ឋប្រហារ។

អ្នករៀបចំក្នុងតំបន់ រួមទាំងក្រុមយុវជនមកពីគណបក្ស Kayan New Land បាននិយាយថា ពួកគេបានជួយជម្លៀសមនុស្សជាង ៦០០ នាក់។ ដោយមានជំនួយពីក្រុមផ្សេងទៀត ចំនួនអ្នកភូមិសរុបបានផ្លាស់ទៅ​កាន់​ទីកន្លែង​​សុវត្ថិភាពនៅ BC Kone ដែលមានចម្ងាយប្រហែល ៦០ គីឡូម៉ែត្រពីភូមិ Saung Nang Khae អាចមានច្រើនជាង ១៥០០នាក់ ។

ប្រទេស​​មីយ៉ាន់ម៉ា បានជាប់គាំង​ក្នុង​​សង្រ្គាមស៊ីវិល ចាប់តាំងពីរដ្ឋប្រហារឆ្នាំ ២០២១ របស់យោធា ដោយមនុស្សជាង ៣,៥ លាននាក់ត្រូវភៀសខ្លួន។ យោធា​ដែល​រង​ការ​បាត់បង់​ទឹកដី​​​ជាបន្តបន្ទាប់​បាន​ងាក​ទៅ​រកការទប់ទល់ដោយហិង្សាតាម​រយៈការវាយប្រហារ​តាមផ្លូបគោក​ និងតាមអាកាស និង​ពឹងផ្អែក​យ៉ាង​ខ្លាំង​លើ​ការ​គាំទ្រ​ពី​ចិន និង​រុស្ស៊ី។

ប្រជាជនជាច្រើនបានរត់គេចខ្លួនដ៏ឈឺចាប់ជាមួយនឹងអនាគតមិនច្បាស់លាស់ ខណៈដែលសង្រ្គាមឈានចូលដល់ឆ្នាំទីបួន ជនស៊ីវិលនៅតែជាជនរងគ្រោះចម្បងនៃអំពើហិង្សាដែលកំពុងបន្ត។ ទោះបីជាមានការសន្យាថា នឹងមាន​បទ​ឈប់​បាញ់​បន្ទាប់ពីការរញ្ជួយដីដ៏វិនាសកម្ម​​មួយ​កាលពីខែមីនាក៏ដោយ ការប្រយុទ្ធគ្នាបានកើនឡើង ដោយមានកាំភ្លើងធំ និងការវាយប្រហារតាមអាកាសសំដៅលើតំបន់ជនស៊ីវិល៕

អត្ថបទ៖ ប៊ុន សុភាព