អាស៊ាន ចាប់ផ្ដើមបន្ទន់ឥរិយាបថ និងបើកផ្លូវចរចា ជាមួយមីយ៉ាន់ម៉ា ឡើងវិញ

បន្ទាប់ពីដាក់ឲ្យ​នៅឯកោអស់រយៈពេលប្រាំឆ្នាំ ក្រោយការធ្វើរដ្ឋប្រហារ ពេលនេះសញ្ញានៃការផ្សះផ្សារវាងប្លុកអាស៊ាន និងប្រទេសមីយ៉ាន់ម៉ា ចាប់ផ្ដើមកក់ក្ដៅឡើងវិញហើយ។ នេះ​បើយោងតាម​សារព័ត៌មាន South China Morning Post ចុះផ្សាយ​ថ្ងៃទី​៨ ខែ​ឧសភា ឆ្នាំ​២០២៦។

នៅក្នុងកិច្ចប្រជុំកំពូលអាស៊ាន ដែលកំពុងប្រារព្ធធ្វើឡើងនៅប្រទេសហ្វីលីពីន អគ្គលេខាធិការអាស៊ាន លោក កៅ គឹមហួន បានបង្ហើបឲ្យដឹងថា រដ្ឋមន្ត្រីការបរទេស នៃបណ្ដាប្រទេសសមាជិកទាំងអស់ បានព្រមព្រៀងគ្នា ក្នុងការរៀបចំកិច្ចសន្ទនាតាមប្រព័ន្ធវីដេអូជាមួយរដ្ឋមន្ត្រីការបរទេសមីយ៉ាន់ម៉ា នាពេលឆាប់ៗខាងមុខ។ ការសម្រេចចិត្តនេះ កើតឡើង បន្ទាប់ពីខាងភាគីមីយ៉ាន់ម៉ា បានបង្ហាញបំណងចង់ឲ្យ​ទំនាក់ទំនងវិលមករកភាពប្រក្រតីវិញ ខណៈដែលអាស៊ាន ក៏ចង់ឃើញការកាត់បន្ថយជម្លោះ និងការផ្ដល់ជំនួយមនុស្សធម៌មានភាពប្រសើរឡើងផងដែរ។

មន្ត្រីជាន់ខ្ពស់នៃក្រសួងការបរទេសកម្ពុជា លោក គង់ ភោគ បានលើកឡើងថា ការវិវត្តថ្មីៗនៅមីយ៉ាន់ម៉ា ដូចជា ការដោះលែងអ្នកទោសជាង ៤ ០០០នាក់ និងការផ្លាស់ប្តូរលោកស្រី អ៊ុងសាន ស៊ូជី ពីពន្ធនាគារឲ្យ​មកឃុំខ្លួនក្នុងផ្ទះវិញ គឺជាហេតុផលសមរម្យ ដែលអាស៊ានគួរតែបង្កើនការទំនាក់ទំនងឲ្យ​កាន់តែជិតស្និទ្ធជាងមុន។ លោកបានសង្កត់ធ្ងន់ថា ទោះបីជាមានបញ្ហាប្រឈមច្រើន ក៏​មីយ៉ាន់ម៉ានៅតែជាសមាជិកគ្រួសារអាស៊ានដ៏សំខាន់មួយ ហើយវាគឺជាការទទួលខុសត្រូវរួមគ្នា ក្នុងការជួយគ្នាទៅវិញទៅមក ដើម្បីរកច្រកចេញពីវិបត្តិ។

ជាមួយគ្នានេះដែរ ប្រទេសសមាជិកដទៃទៀតដូចជា ឥណ្ឌូណេស៊ី ថៃ និងហ្វីលីពីន ក៏បានបង្ហាញទស្សនៈវិជ្ជមាន ចំពោះការផ្លាស់ប្តូរនេះដែរ។ ឥណ្ឌូណេស៊ី បានចាត់ទុកការដោះលែងអ្នកទោសនយោបាយ ថាជាសញ្ញាល្អសម្រាប់ស្ថិរភាព នាពេលអនាគត។ យ៉ាង​ណាមិញ ចំពោះសំណួរថាតើលោក មីន អ៊ុងឡាំង នឹងត្រូវអញ្ជើញឲ្យ​ចូលរួមកិច្ចប្រជុំកំពូលនៅខែវិច្ឆិកាដែរឬទេនោះ គឺនៅមិនទាន់មានការបញ្ជាក់ច្បាស់លាស់នៅឡើយ ព្រោះវាទាមទារឲ្យ​មានការឯកភាពគ្នាពីសមាជិកទាំង១០ ផ្សេងទៀតជាមុនសិន។

សូម​ជម្រាប​ថា ការបោះឆ្នោតនៅមីយ៉ាន់ម៉ាកាលពីដើមឆ្នាំនេះ ត្រូវបានលោកខាងលិចរិះគន់ថាខ្វះតម្លាភាព និងអាស៊ាន​គ្នា​ឯង ក៏មិនទាន់មានការឯកភាពគ្នាលើការទទួលស្គាល់លទ្ធផលបោះឆ្នោតនោះដែរ ប៉ុន្តែការសម្រេចចិត្តបើកផ្លូវចរចាឡើងវិញនេះ គឺជាសញ្ញាបង្ហាញថា អាស៊ានកំពុងប្រើប្រាស់មធ្យោបាយការទូត ដើម្បីព្យាយាមបញ្ចប់ជម្លោះស៊ីវិល និងស្តារសន្តិភាព​ឲ្យវិលត្រឡប់មកក្នុងតំបន់វិញ៕

ប្រែសម្រួល៖ ឈាង