​មុន​​ផ្ទុះ​វិបត្តិ​នយោបាយ​​ថៃ​​​ពេលនេះ​ តើ​ផែថងថាន បានធ្វើអ្វីខ្លះ​​ក្នុងឆាក​អន្តរជាតិ?

នាយករដ្ឋមន្ត្រីថៃ ផែថងថាន ស៊ីណាវ៉ាត្រ (Paetongtarn Shinawatra) ដែលជាកូនស្រីពៅរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រ បានចូលកាន់តំណែងកាលពីថ្ងៃទី ១៦ ខែសីហា ឆ្នាំ ២០២៤ រហូតមកដល់ពេលនេះមាន​រយៈពេល ១០ខែ មុនឈានដល់មានបញ្ហានយោបាយផ្ទៃក្នុងរហូតដល់ប្រជាជននិងមន្រ្តីមួយចំនួនជំរុញឲ្យលោកស្រីលាលែងពីតំណែង។

តើរយៈ១០ខែតាំងពីចូលកាន់តំណែង នាយករដ្ឋមន្ត្រីថៃ លោកស្រី ផែងថងថាន បានដឹកនាំនិងចូលរួមវេទិកាអន្តរជាតិសំខាន់ៗអ្វីខ្លះ? បើយោងតាមការចេញផ្សាយរបស់សារព័ត៌មានថៃ និង សារព័ត៌មានអន្តរជាតិមួយចំនួន ខាងក្រោមនេះគឺជាវេទិការអន្តរជាតិធំៗនិងសំខាន់ៗដែលលោកស្រីបានចូលរួម។​

កិច្ចសន្ទនាកិច្ចសហប្រតិបត្តិការអាស៊ីលើកទី៣ (ACD) (២-៤ តុលា ២០២៤)

នៅក្នុងកិច្ចប្រជុំកំពូល ACD លើកទី ៣ នៅទីក្រុង Doha ប្រទេសកាតា នាយករដ្ឋមន្ត្រីថៃ ផែថងថាន បានដឹកនាំដំណើរទស្សនកិច្ចបរទេសដ៏សំខាន់លើកដំបូងរបស់លោកស្រី ដោយអំពាវនាវឱ្យមានកិច្ចសហការផ្នែកបច្ចេកវិទ្យា សន្តិសុខស្បៀង និងភាពជាដៃគូកាន់តែរឹងមាំនៅអាស៊ី។ លោកស្រីបានសង្កត់ធ្ងន់ទៅលើគម្រោង Bio-Circular-Green (BCG) របស់ប្រទេសថៃសម្រាប់កំណើនប្រកបដោយនិរន្តរភាព។

កិច្ចប្រជុំកំពូលអាស៊ាន ( ៩-១១ តុលា ២០២៤)

លោកស្រីបានតំណាងឱ្យប្រទេសថៃនៅក្នុងកិច្ចប្រជុំកំពូលអាស៊ានលើកទី ៤៤ និង ៤៥ នៅទីក្រុងវៀងចន្ទន៍ ប្រទេសឡាវ ដោយបានចូលរួមកិច្ចប្រជុំជាង ២០ រួមទាំងកិច្ចប្រជុំកំពូលជាមួយប្រទេសចិន កូរ៉េខាងត្បូង និងជប៉ុន ដែលលោកស្រីបានណែនាំ «ចក្ខុវិស័យ ABC» សម្រាប់បច្ចេកវិទ្យា ការអភិវឌ្ឍន៍ប្រកបដោយតុល្យភាព និងសេដ្ឋកិច្ចច្នៃប្រឌិត។

កិច្ចប្រជុំកំពូល ACMECS/GMS លើកទី ១០ (៦-៧ វិច្ឆិកា ២០២៤)

នៅក្នុងកិច្ចប្រជុំកំពូលយុទ្ធសាស្ត្រកិច្ចសហប្រតិបត្តិការសេដ្ឋកិច្ចអៃយ៉ាវ៉ាឌី-ចៅប្រាយ៉ា-មេគង្គលើកទី១០ (ACMECS) និងកិច្ចប្រជុំកំពូលមេគង្គ(GMS) នៅទីក្រុង Kunming ប្រទេសចិន នាយករដ្ឋមន្ត្រីថៃរូបនេះ បានគាំទ្រហេដ្ឋារចនាសម្ព័ន្ធឆ្លងព្រំដែន ថាមពលបៃតង និងការគ្រប់គ្រងទឹក។ លោកស្រី​បាន​ជំរុញ​ឱ្យ​មាន​កិច្ចសហប្រតិបត្តិការ​ស៊ីជម្រៅ​លើ​បញ្ហា​អាកាសធាតុ និង​ស្ថិរភាព​ក្នុង​តំបន់ ជាពិសេស​ទាក់ទង​នឹង​វិបត្តិ​មី​យ៉ាន់​ម៉ា​។

កិច្ចប្រជុំ APEC Economic Leaders’ Week (១០-១៨ វិច្ឆិកា ២០២៤)

កិច្ចប្រជុំនេះធ្វើឡើងក្នុងទីក្រុង Lima ប្រទេសប៉េរូ លោកស្រី ថងថាន បានលើកកម្ពស់ថាមពលស្អាត កំណើនសេដ្ឋកិច្ចឌីជីថល និងការថែទាំសុខភាពជាសកល។ លោកស្រីបានជួបពិភាក្សាសំខាន់ៗជាមួយមេដឹកនាំមកពីសហរដ្ឋអាមេរិក ចិន និងប៉េរូ ហើយបានលើកឡើងពីគម្រោង Landbridge របស់ប្រទេសថៃផងដែរ។

កិច្ចប្រជុំកំពូល BIMSTEC ( ៤ មេសា ២០២៥)

នៅក្នុងកិច្ចប្រជុំកំពូល BIMSTEC នៅទីក្រុងបាងកក នាយករដ្ឋមន្ត្រី ថងថាន បានដឹកនាំកិច្ចពិភាក្សាកម្រិតខ្ពស់ស្តីពីការតភ្ជាប់ក្នុងតំបន់ ពាណិជ្ជកម្ម និងការទប់ទល់នឹងគ្រោះមហន្តរាយ។ លោកស្រីបានជំរុញឱ្យមានកិច្ចសហប្រតិបត្តិការឌីជីថល និងបានចុះហត្ថលេខាលើកិច្ចព្រមព្រៀងសំខាន់ៗ ដើម្បីជំរុញទំនាក់ទំនងក្នុងតំបន់។

ទស្សនកិច្ចផ្លូវការនៅកម្ពុជា (២៣-២៤ មេសា ២០២៥)

នៅទីក្រុងភ្នំពេញ លោកស្រី បានប្រារព្ធខួបលើកទី ៧៥ នៃទំនាក់ទំនងការទូត និងបានជួបជាមួយនាយករដ្ឋមន្ត្រីកម្ពុជា សម្ដេចមហាបវរធិបតីហ៊ុន ម៉ាណែត ប្រធានព្រឹទ្ធសភាសម្ដេចតេជោ ហ៊ុន សែន និងព្រះមហាក្សត្រ សម្ដេចបរមនាថ នរោត្តម សីហមុនី។ ដំណើរ​ទស្សន​កិច្ច​នេះ​រួម​មាន​ការ​ដាក់​បង្ហាញ​នូវ​និមិត្តសញ្ញា​រំលឹក និង​ការ​ចុះ​ហត្ថលេខា​លើ​អនុស្សរណៈ​មួយចំនួនស្តី​ពី​កិច្ច​សហប្រតិបត្តិការ​ផ្នែក​ហេដ្ឋារចនាសម្ព័ន្ធ ការងារ និង​បរិស្ថាន។

ដំណើរទស្សនកិច្ចទៅកាន់ប្រទេសចិន និង Asian Winter Games ( ៥-៨ កុម្ភៈ ២០២៥)

លោកស្រី ផែថងថាន បានជួបជាមួយប្រធានាធិបតីចិន លោក ស៊ី ជីនពីង (Xi Jinping) ដើម្បីបង្កើនកិច្ចសហប្រតិបត្តិការលើរថយន្ត EVs, បន្ទះឈីប និងមជ្ឈមណ្ឌលទិន្នន័យ។ លោកស្រីក៏បានចូលរួមព្រឹត្តិការណ៍ Asian Winter Games ឆ្នាំ ២០២៥ នៅទីក្រុង Harbin ផងដែរ។ ក្នុង​ដំណើរ​ទស្សនកិច្ច​នេះ លោកស្រី​បាន​ប្រកាស​ដាក់​ទណ្ឌកម្ម​លើ​តំបន់​ព្រំដែន​មីយ៉ាន់ម៉ា ដើម្បី​ប្រឆាំង​នឹង​ការ​ឆបោក​ឆ្លង​ដែន។

ទស្សនកិច្ចផ្លូវរដ្ឋរបស់ប្រធានាធិបតីឥណ្ឌូណេស៊ី (១៩ ឧសភា ២០២៥)

ថៃធ្វើជាម្ចាស់ផ្ទះទទួលប្រធានាធិបតីឥណ្ឌូនេស៊ី Prabowo Subianto នៅទីក្រុងបាងកក។ លោកស្រីបានដឹកនាំទស្សនកិច្ចនាយករដ្ឋមន្រ្តីឥណ្ឌូណេស៊ីតាមរយៈការតាំងពិពណ៌វប្បធម៌ និងម្ហូបថៃនៅវិមានរដ្ឋាភិបាល ដោយសង្កត់ធ្ងន់លើការប្រើប្រាស់ការទូតវប្បធម៌ដើម្បីពង្រឹងទំនាក់ទំនងទ្វេភាគី។

ក្រៅពីកិច្ចពីវេទិកានិងកិច្ចប្រជុំអន្តរជាតិផ្លូវការទាំងនេះ លោកស្រី ក៏បានចូលរួមកិច្ចប្រជុំពិគ្រោះយោបល់ទ្វេភាគីជាមួយថ្នាក់ដឹកនាំ និងរដ្ឋមន្ត្រីរបស់ប្រទេសមួយចំនួនទៀតផងដែរក្នុងរយៈពេលកាន់តំណែងមិនដល់មួយឆ្នាំនេះ៕

អត្ថបទ៖​ ប៊ុន សុភាព