ក្រោយ អូមីក្រុង ចូលដល់ កម្ពុជា នេះជារោគសញ្ញាគួរតាមដាន

កាលពីយប់ម្សិលមិញនេះ កម្ពុជាបានរកឃើញករណីវិជ្ជមានវីរុសកូវីដ-១៩ បំប្លែងថ្មីប្រភេទ អូមីក្រុង (Omicron) នៅ លើខ្លួនស្ត្រីខ្មែរម្នាក់ វ័យ២៣ឆ្នាំ ដែលត្រឡប់មកពីធ្វើការនៅ ប្រទេសហ្គាណា។ នេះបើតាមចេញសេចក្ដីជូនដំណឹងរបស់ក្រសួងសុខាភិបាល ដែលទទួលបានលទ្ធផលវិភាគ បញ្ជាក់ដោយ​វិទ្យាស្ថានប៉ាស្ទ័រកម្ពុជានៅថ្ងៃទី១៤ ខែធ្នូ ឆ្នាំ២០២១ ។

គួររំលឹកថា វីរុសកូវីដបំប្លែងខ្លួនថ្មីប្រភេទ អូមីក្រុង បានរកឃើញជាលើកដំបូងកាលពីថ្ងៃទី២៤ ខែវិច្ឆិកា ឆ្នាំ២០២១ នៅអាហ្វ្រិកខាងត្បូង។ វីរុសនេះ កាន់តែមានភាពគ្រោះថ្នាក់ជាងវីរុសបំប្លែងខ្លួនណាៗទាំងអស់ ខណៈអ្នកវិទ្យាសាស្ត្រ កំពុងរកវិធីទប់ស្កាត់យ៉ាងមមាញឹក។

ស្របពេលជាមួយគ្នាដែរ អ្នកវិទ្យាសាស្ត្រ បានព្រមានពីគ្រោះដែលបណ្ដាលមកពី អូមីក្រុង ព្រោះវីរុសបំប្លែងខ្លួនប្រភេទនេះ មានសមត្ថភាពចម្លងយ៉ាងរហ័ស ព្រមទាំងខ្លាំងជាង ដែលតា ទៅទៀត។ ចំណែកឯរោគសញ្ញាវិញ ខុសគ្នាពីរោគសញ្ញារបស់ ដែលតា មួយចំនួន។

ក្នុងនោះដែរ ប្រភពពីគេហទំព័រ Daily Mail បានឱ្យដឹងថា រោគសញ្ញាទូទៅនៃវីរុស​បំប្លែង​ខ្លួន អូមីក្រុង មានដូចជា អស់ក​ម្លាំង ឈឺសាច់ដុំ ក្អកស្ងួត ឈឺបំពង់ក ឈឺក្បាល ឡើងកម្ដៅ ជីពចរលោតញាប់ និងពុំមានអាការបាត់បង់ក្លិន ឬរសជាតិឡើយ។

ដូច្នេះហើយ ប្រសិនបើលោកអ្នកមានអាការមិនស្រួលខ្លួន និងលេចចេញរោគសញ្ញាប៉ុន្មានខាងលើនេះ សូមប្រញាប់ទាក់ទងទៅកាន់គ្រូពេទ្យ ឬទូរសព្ទទៅលេខ ១១៥ ដើម្បីស្វែងរកការតេស្ត និងព្យាបាលឱ្យទាន់ពេលវេលា៕

អត្ថបទ៖ សន្យា

ចុចអាន៖ ប្រៀបធៀបវីរុសបំប្លែងថ្មី Omicron និង Delta៖ ​យើងត្រូវការវ៉ាក់សាំងថ្មី ឬអត់?

ចុចអាន៖ ចាក់វ៉ាក់សាំងដូសជំរុញបានប៉ុន្មានខែ ទើបអាចការពារ Omicron ?