សុខភាព

អស់បារម្ភ! ដោះស្រាយបញ្ហាមុនខ្នងជាមួយក្បួនធម្មជាតិប៉ុន្មាននេះ

បានផុស

៥ years មុន

នៅ

ថ្ងៃព្រហស្បតិ៍ ១១ កុម្ភៈ ២០២១

ដោយ

មុនកើតមាននៅពេលដែលយើងមានខ្លាញ់ និងកោសិកាងាប់ច្រើនផ្ដុំគ្នា ហើយការផ្តុំនេះបានបង្កឲ្យស្ទះរន្ធញើស និងមានបាក់តេរី។ មុនក៏អាចបង្កដោយមូលហេតុផ្សេងទៀតដែរដូចជា ហ្សែន ថ្នាំ អ័រម៉ូន ញើស និងស្ត្រេស។ សូម្បីតែអាហារដែលយើងញ៉ាំរាល់ថ្ងៃ ក៏អាចមានទំនាក់ទំនងនឹងការកើតមុនដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កើតមុនលើខ្នង យើងគួរព្យាបាលតាមរបៀបណា?

ក្នុងករណីទូទៅ យើងអាចបំបាត់មុនបានដោយគ្រាន់តែផ្លាស់ប្ដូររបៀបរស់នៅ និងប្រើក្បួនបំបាត់មុនធម្មជាតិក៏អាចកម្ចាត់មុនបានដែរ គ្រាន់ត្រូវការអត់ធ្មត់បន្តិច ដែលក្បួនធម្មជាតិៗទាំងនោះរួមមាន៖

– ងូតទឹកក្រោយហាត់ប្រាណ៖ បើយើងទុកឲ្យញើស និងធូលីជាប់នឹងស្បែកយូរក្រោយពីហាត់ប្រាណអាចជាមូលហេតុមួយដែលបង្កឲ្យមានមុនខ្នង។ ដូចនេះយើងគួរងូតទឹកភ្លាមៗក្រោយហាត់ប្រាណ និងបោកសម្អាតសម្លៀកបំពាក់ហាត់ប្រាណឲ្យបានទៀងទាត់។

– ខាត់ស្បែក៖ ការប្រើប្រដាប់ខាត់ស្បែកដែលមានអាស៊ីដសាលីស៊ីលិក (Salicylic acid) អាចជួយកម្ចាត់នូវធូលីដី និងខ្លាញ់ចេញពីស្បែកដែលអាចជួយបន្ថយបរិមាណកោសិកាងាប់ស្ទះនៅរន្ធញើស។

– របបអាហារ៖ របបអាហារមិនល្អអាចប៉ះពាល់ដល់រាងកាយបាន។ ប្រសិនជាយើងងាយឡើងមុន អាហារមួយចំនួនអាចជាមូលហេតុបង្ក។ ការសិក្សាបានបង្ហាញថាអាហារដែលធ្វើឲ្យជាតិស្ករក្នុងឈាមឡើងលឿនអាចធ្វើឲ្យបញ្ហាមុនកាន់តែធ្ងន់ធ្ងរ។ អាហារទាំងនោះមាននំប៉័ង បាយ និងដំឡូងបារាំង។ របបអាហារដែលល្អរួមមានបន្លែ ផ្លែឈើ សាច់ និងគ្រាប់ធញ្ញជាតិជាដើម។

– ចៀសវាងកម្ដៅថ្ងៃ៖ កម្ដៅថ្ងៃអាចធ្វើឲ្យមុនកាន់តែខ្មៅជាងមុន និងបង្កឲ្យមានស្នាមនៅលើខ្នង។ ដូចនេះគួរលាបឡេការពារកម្ដៅថ្ងៃពេលចេញទៅក្រៅ។ នេះមិនត្រឹមតែជួយបន្ថយបញ្ហាមុនទេ នៅអាចការពារស្បែកពីការខូចខាតដោយកម្ដៅថ្ងៃ និងបង្ការជំងឺមហារីកស្បែកបានដូចគ្នា។

– ចងសក់៖ សម្រាប់ស្រីៗយើងវិញ សក់វែងអាចបន្ថែមជាតិខ្លាញ់ និងធូលីទៅលើស្បែកនៅខ្នង និងបង្កឲ្យមានមុន។ ការកក់សក់ជាប្រចាំ និងចងសក់ឡើងពេលហាត់ប្រាណក៏អាចជួយបន្ថយបញ្ហាមុនខ្នងដែរ។ ម៉្យាងទៀត សាប៊ូកក់សក់ និងសាប៊ូបន្ទន់សក់ក៏អាចធ្វើឲ្យស្ទះរន្ធញើស និងបង្កបញ្ហាមុនដែរ។

គ្នាយើងដែលមានមុនខ្នង អាចធ្វើតាមរូបមន្តបំបាត់មុនធម្មជាតិខាងលើ ឬរូបមន្តផ្សេងៗ ប៉ុន្តែបើអនុវត្តយូរទៅៗ មិនទទួលបានលទ្ធផល យើងគួរតែទៅរកគ្រូពេទ្យជំនាញសើរស្បែក ដើម្បីពិនិត្យមើលត្រឹមត្រូវ ឬករណីខ្លះ គ្រូពេទ្យអាចចេញវេជ្ជបញ្ជាថ្នាំបំបាត់មុនផងដែរ៕

អត្ថបទផ្ដល់សិទ្ធិដោយ៖ Hellokrupet

សូមចុចអាន៖ ឲ្យតែឈឺក្បាលលេបថ្នាំៗ មិនមែនជាដំណោះស្រាយល្អទេ ហើយអាចប៉ះពាល់សុខភាពទៀត

សូមចុចអាន៖ អ្នកខ្លះមានប្រតិកម្មញ៉ាំស៊ុតមិនបាន តើគួរធ្វើម៉េច?