ប្រើពេលសម្រាកចុងសប្តាហ៍តែ ២ថ្ងៃ ធ្វើម៉េចអាចដើរលេងបានច្រើនកន្លែង នៅកោះកុង?

ខេត្តកោះកុង ត្រូវបានគេស្គាល់ថា តារារះនាទិសនិរតី ជាតំបន់កទេសចរណ៍ប្រជុំកោះ ទឹកធ្លាក់ និងរមណីយដ្ឋានបែប កែច្នៃជាច្រើន។ ថ្វីបើត្រូវធ្វើដំណើររៀងវែងឆ្ងាយបន្តិច ដោយសារតែស្ថានភាពផ្លូវទៅខេត្តទេសចរណ៍មួយនេះ ជាផ្លូវ​ឡើង​ចុះភ្នំខ្ពស់ តែទឹកដីនៃខេត្តមួយនេះ តែងផ្តល់ការកម្សាន្តសម្បូរបែបដល់ទេសចរ មិនឱ្យជិនណាយ មានទាំង​ដំណើរកម្សាន្តដោយការជិះទូក​ស្ទូច​សត្វសមុទ្រ តំបន់ទឹកធ្លាក់ធម្មជាតិ សមុទ្រ កោះ និងការស្នាក់លក្ខណៈឯកជន ក៏ដូចជា បោះតង់ ឬតាមចំណូលចិត្តជាដើម។ ហេតុនេះ គួររៀបចំដំណើរកម្សាន្តបែបណា ដើម្បីអាចប្រើពេល​សម្រាក​ចុងសប្តាហ៍តែ ២ថ្ងៃ ហើយដើរលេងបានច្រើនកន្លែង?

ដូចនេះ ​កម្ពុជាថ្មី​សូមណែនាំពីរបៀបដើរលេងសន្សំពេល និងបានច្រើនកន្លែង តាមគម្រោងខាងក្រោមនេះ​៖
រៀបចំការធ្វើដំណើរ
ការធ្វើដំណើរទៅកាន់ខេត្តកោះកុង គឺត្រូវប្រើពេលដល់ទៅជាង ៥ម៉ោង ដូចនេះបើសិនជាយើងចេញដំណើរពីភ្នំពេញ នៅវេលាម៉ោង ៥ទៀបភ្លឺ បូករួមនឹងប្រើពេលសម្រាកទទួលទានអាហារពេលព្រឹក និងចូលទីតាំងសក្ការៈលោកយាយម៉ៅ (ពេជ្រនិល) ផងនោះ យើងនឹងទៅដល់ផ្លូវបំបែក មួយឆ្ពោះទៅខេត្តព្រះសីហនុ និងមួយខ្សែទៀតឆ្ពោះទៅ ខេត្តកោះកុង
នៅចន្លោះម៉ោងប្រហែលជា ៩:០០នាទី-៩:៣០នាទី ​។ គួរបញ្ជាក់ដែរថា បច្ចុប្បន្នស្ថានភាពផ្លូវជិត៨គីឡូម៉ែត្រនេះ ជាផ្លូវគ្រួសក្រហម ដោយតែកំពុងស្ថាបនា។
មកដល់ទីនេះ គឺកៀកនឹងម៉ោងទទួលទានអាហារថ្ងៃត្រង់ល្មម ដូចនេះលោកអ្នកអាចបន្តដំណើរប្រមាណ ២៧គីឡូម៉ែត្រ ទៀត ទៅសហគមន៍ឆ្នេរនេសាទ ដើម្បីបានទាំងទទួលទានអាហារថ្ងៃត្រង់ផង និងសម្រាកលំហែកាយផង។

១. តំបន់សហគមន៍ឆ្នេរនេសាទ
ក្នុងតំបន់ឆ្នេរនេសាទ អាចទៅលេងឯណាបានខ្លះ?
ក្នុងដំណើរឆ្ពោះទៅកាន់សហគមន៍ឆ្នេរនេសាទ ជាមួយផ្លូវក្រាលគ្រួសក្រហមប្រហែល ២០គីឡូម៉ែត្រមួយខ្សែនេះ មិន​មែន​មាន​តែ​ទីតាំងគោលដៅទេសចរណ៍ ១កន្លែងនោះទេ ក្រៅពីការកម្សាន្តដែលរៀបចំដោយសហគមន៍ ក៏នៅមានកន្លែង ឯកជនដទៃផ្សេងទៀត ដូចជា​សហគមន៍ឆ្នេរជ្រោយស្វាយ រមណីយដ្ឋានឆ្នេរសុភមង្គល រីស៊តឆ្នេរកោងកាងជាដើម ដែលនៅតាមបណ្តោយ​ផ្លូវនេះផងដែរ។ គ្រាន់តែចូលតំបន់នេះ អាចទស្សនារមណីយដ្ឋានដល់ទៅ ៣-៤កន្លែងទៅហើយ។

ការកម្សាន្តនៅទីនេះ គឺមិនអាចប្រើពេល ១-២ម៉ោង ដើម្បី​រីករាយ​និងគយគន់ឱ្យអស់សព្វកន្លែងបានក៏ពិតមែន ប៉ុន្តែបើគ្រាន់តែថតរូបលេងកម្សាន្ត និងសម្រាកទទួលទាន គឺអាចសមល្មម។ ដើម្បីចំណេញពេលបានដើរលេងកន្លែងផ្សេងទៀត គួរតែចំណាយពេលនៅទីនេះត្រឹមតែ ២-៣ម៉ោង បានហើយ រួចបន្តដំណើរទៀត។

បើយើងចេញពីឆ្នេរនេសាទនៅម៉ោងប្រហែលជា ១២ថ្ងៃត្រង់ យើងនឹងឆ្លងកាត់រមណីយដ្ឋាន ៣តំបន់ នៅតាមបណ្តោយ ផ្លូវឆ្ពោះទៅក្រុង ប៉ុន្តែសម្រាប់ពេលវេលាដ៏ខ្លីនេះ យើងអាចជ្រើសយក ១ក្នុងចំណោមកន្លែងកម្សាន្តដទៃផ្សេងទៀត រួមមាន​តំបន់អេកូទេសចរណ៍ជីផាត តំបន់កម្សាន្តប្រជុំកោះ (កោះស្តេច កោះស្មាច់ កោះខ្មោច ជាដើម-ល-) និងទឹកធ្លាក់តាតៃ។ ដូច្នេះជម្រើសល្អបំផុតនៅពេលនេះ គឺការកម្សាន្តទឹធ្លាក់តាតៃ ព្រោះទីតាំងទឹកធ្លាក់នេះ នៅមិនឆ្ងាយប៉ុន្មានពីផ្លូវជាតិ និងចម្ងាយតែ ២៧គីឡូម៉ែត្រប៉ុនណោះ ពីក្រុងខេមរភូមិន្ទ។

២. រមណីយដ្ឋានទឹកធ្លាក់តាតៃ
ការធ្វើដំណើរមកកាន់តំបន់ទឹកធ្លាក់នេះ គឺប្រើពេលប្រហែលជាជិត ៣ម៉ោងដោយរថយន្ត ចម្ងាយប្រមាណ ១៤២គីឡូ​ម៉ែត្រ យើងនឹងដល់ទីតាំងចំណុចស្ពានតាតៃ ហើយដើម្បីបានទៅកម្សាន្តទឹកធ្លាក់ គឺត្រូវបន្តដំណើរដោយទូក ដែលយើងនឹងឃើញមានទីតាំងចំណតទូកនៅក្រោមស្ពានតែម្តង។ ចំពោះការជួលទូក១គ្រឿង គឺមានតម្លៃ ១២ម៉ឺនរៀល សម្រាប់គោលដៅទស្សនារីសតនិងទឹកធ្លាក់ ប៉ុន្តែលោកអ្នកក៏អាចជ្រើសរើសគោលដៅតែមួយ ឆ្ពោះទៅទឹកធ្លាក់តែម្តងក៏បាន ដោយចំណាយតែ ៨ម៉ឺនរៀល និងប្រើពេលប្រហែល ១០-១៥នាទី។

ជាមួយនឹងទេសភាពដ៏ស្រស់ត្រកាលនៃធម្មជាតិនៅហែរហមដំណើរ យើងក៏អាចទស្សនារីស៊តប៉ុន្មានកន្លែងទើបនឹងបង្កើត ថ្មី តាមបណ្តាយផ្លូវទឹកខៀវស្រងាត់នេះ មុននឹងទៅដល់គោលដៅ។ អ្វីដែលពិសេស តំបន់ទឹកធ្លាក់នេះ គឺជាទឹកធ្លាក់ដែល ហូរចុះចូលទៅក្នុងសមុទ្រ (ពាក់កណ្តាលទឹកសាប ពាក់កណ្តាលទឹកប្រៃ)។

កម្សាន្តនៅទីនេះរួចហើយ យើងត្រូវបន្តដំណើរ ២៧គីឡូម៉ែត្រទៀត ទៅក្រុង។ គួរបញ្ជាក់ថា សម្រាប់ដំណើរបន្តនេះ លោកអ្នក​គួរតែលៃលកពេលឱ្យសមល្មមយ៉ាងណា កុំឱ្យថ្ងៃលិចទាន់ ព្រោះថាស្ថានភាពផ្លូវនេះ មិនមានភ្លើងបំភ្លឺនៅពេលយប់ឡើយ ជាហេតុធ្វើឱ្យពិបាកមើលផ្លូវបន្តិច។

៣. ច្រកចាំយាម
មកដល់ក្រុង យើងអាចរកការស្នាក់នៅណា ដែលមានកន្លែងអាចកម្សាន្តអារម្មណ៍នាពេលរាត្រី ដូចជាជាប់ឆ្នេរ ឬជាប់នឹងព្រែក។ ឯសម្រាប់ការទទួលទានអាហារពេលល្ងាច លោកអ្នកអាចទទួលទានអាហារនៅច្រកចាំយាម ព្រោះកន្លែងនេះ​នៅជាប់ឆ្នេរ មានបរិយាកាសល្អ រួមជាមួយនឹងជម្រើសភោជនីយដ្ឋានជាច្រើន ដោយគ្រាន់តែឆ្លងស្ពាន​ពីក្រុងទៅកាន់ផ្លូវច្រកព្រំដែន ប្រហែល១០គីឡូម៉ែត្រ។

ដំណើរកម្សាន្តថ្ងៃបន្ទាប់
បើសិនកន្លែងស្នាក់នៅដែលយើងជ្រើន ជាតំបន់មាត់ឆ្នេរ ហើយអាចគយគន់ថ្ងៃរះបាននោះ ចាត់ទុកថា ជាវេលាដ៏វិសេស វិសាលមួយសម្រាប់ដំណើរកម្សាន្តចុងសប្តាហ៍នេះមួយទៀត។ បន្ទាប់ពីស្រស់ស្រូបអាហារពេលព្រឹក គប្បីកុំរំលង​ទីតាំងចេតិយឃុនឆាង​ឱ្យ​សោះ មានទីតាំងនៅក្បែរស្ពានរង្វង់មូលក្រុងខេមរភូមិន្ទតែម្តង។

៤. ឆ្នេរប៉ាក់ខ្លង
ដោយសារតែទីតាំងឆ្នេរនេះ ស្ថិតនៅផ្លូវត្រើយម្ខាងជាមួយចេតិយឃុនឆាងស្រាប់ លោកអ្នកគួរតែទៅកម្សាន្តនៅឆ្នេរ​ប៉ាក់​ខ្លង​បន្តិច ដែលមានចម្ងាយតែប្រមាណ ៧-៨គីឡូម៉ែត្រ ពីចេតិយ។

៥. ព្រៃកោងកាង
តំបន់ព្រៃកោងកាងដ៏ល្បីមួយនេះ ជារមណីយដ្ឋានធម្មជាតិ ដែលតែងមានទេសចរមកកម្សាន្តមិនដែលដាច់ ដោយសារតែ ឈើកោងកាងដែលដុះឈរជ្រោងច្រាង ចាំងឆ្លុះពីផ្ទៃទឹក បានផ្តល់នូវរូបភាពល្អត្រជាក់ភ្នែក រួមនឹងខ្យល់អាកាស ដែល​បក់​ផាយផាត់​ធ្វើឱ្យត្រជាក់កាយទៀតនោះ លោកអ្នកអាចទស្សនាកម្សាន្តសម្រស់ល្អឯកនេះ ដោយមានស្ពានឈើ ធ្វើជាអ្នកជូនដំណើរ។

រយៈពេល ២ថ្ងៃ ១យប់ នៃដំណើរកម្សាន្តចុះសប្តាហ៍នេះ គួរតែបញ្ចប់ត្រឹមនេះ ឬបន្តដំណើរទៅកន្លែងផ្សេងទៀតក្បែរៗ នោះ តាមចំណង់ចំណូលចិត្ត។ បន្ទាប់ពីនោះ លោកអ្នកអាចចេញដំណើរត្រឡប់មកភ្នំពេញវិញ ក្រោយទទួលទានអាហារ ថ្ងៃត្រង់រួច៕